انا شاب وعندى ٢٦ سنة ، الحمد لله بشتغل فى وظيفة كبيرة أوى فى وزارة الدفاع نادر حد فسنى يكون وصل لحاجة زى كدة وده من فضل ربي عليا ، مشكلتى بدأت من وانا ف الجامعة، فى البداية خالص اتعرفت على بنت بالصدفة، انا مش من النوع اللى بيجرى ورا البنات ولا اللى بيسعى انه يلفت انتباه حد ليه ، بالعكس انا بهتم بنفسي وباللى بعمله وبس ، ومش انطوائي انا اجتماعى جدا، المهم عرفتها بالصدفة، كانت محتاجة خدمة منى وهى مكانتش قاعدة فمصر اصلا والجو ده جديد عليها فخدمتها ، وبعدها حضرنا المحاضرة مع بعض ، مرة فالتانية بقينا زمايل ومحاضرة تجيب محاضرة ويوم يجيب يوم بقينا صحاب وخدنا ارقام بعض ، واتكلمنا كتير بشكل شبه يومى ، فالفترة دى من حياتى انا كنت بمر بظروف صعبة جدا ، وكذلك هى ، انا عمرى م اتخليت عنها ولا هي ، دايما كنا فضهر بعض ، طول م احنا سوا محدش كان بيحتاج حاجة ابدا، لدرجة انى مش هبالغ لو قولت انى ادمنتها، احساس اول مرة احسه، ولما هى عرفت رفضت ده وطلبت نفضل زمايل ، وانها مش عاوزة نخسر بعض، انا كان كل همى مخسرهاش وكملت معاها، ولكن حبى ليها مراحش ابدا ، قعدنا ال ٤ سنين سوا فعلاقة مش مفهومة، هى اعلى من الصداقة بس مش حب، انا بعشقها بس هى بتعشق وجودى وبس، وخلال الفترة دى حبت كذا حد مر ف حياتها وكانت تيجي تحكيلى وكإنى شفاف، ولكن يعلم الله عمرى م نصحتها غير بالصح ، ودايما اختياراتها كانت غلط ولما كنت اقولها كدة كانت تتعصب وتكره كلامى وتفكر انى عاوز ابعدها عن اي علاقة ، وكانت تكمل وتدخل العلاقة وانا اطلع من حياتها ، وبعد فترة ترجعلى بعد م خدت الخازوق ، بقيت اقدم كتير اوى ، وهي بتاخد وبس وكان على قلبي زى العسل ، وفاخر علاقة هى دخلتها انا خرجت من حياتها ، بعدها رجعت وقالتلى مقدرتش تكمل وانا مش فحياتها ، وقالت لازم نبقي ف حياة بعض طول العمر حتى لو كل واحد فينا اتجوز نعرف عوايلنا ببعض ،واتخرجنا ، وانا بعشقها وهى لا ، وتعلقي بيها زاد يوم عن يوم وكل شوية كنت بقدم حاجات حلوة كتير ، وهى مش فارق معاها ، بتقول شكرا 😂 وفجأة اهتمامها بدأ يقل حبة حبة ، ومرة واحدة لقيتها داخلة تقولى ان خطوبتها كمان اسبوع، بطريقة تتفهم اللى هو اطلع من حياتى، رغم انها كانت طول الوقت تقولى احنا عمرنا م هنفترق ابدا، وطلع مين خطيبها ، الشخص اللى ياما اداها خوازيق وكانت نظرتى فيه دايما صح، للحظة حسيت اد ايه انا رخيص اوى ، واخدانى تسلية عشان اهون عليكى لحد م البيه يحن عليكى ، اتقرى فاتحتك ولبستى دبل ، وكل ده بتتكلمى معايا ومنيمانى ومغفلانى ، انا رخيص اوي كدة ، ده انا عملت حسابى انك فحياتى العمر كله حتى لو صحاب ، وقتها سكت وخرجت من حياتها للابد ، مر عالموضوع ده ٣ سنين وشهرين و٩ ايام، هى اتجوزت وخلفت ، وانا شوفت حالى واشتغلت على نفسي ، وبقيت فمراتب عالية بفضل الله، لكن عمرى م نسيتهامعرفتش اخرجها من دماغى ، بدور وراها من وقت للتانى احاول اعرف اخبارها، مش قادر انسي حبي ليها بس بكرهها ، بحبها لكن لو رجعتلى مش هقبلها وهدوس عليها باوسخ جزمة ، بكرهها لكن مش قادر انساها ولا قادر احب بعدها ، انا حققت كل حاجة ناجحة ممكن شاب ف سنى يوصلها ، لكن فشلت اكون انسان قادر يتخطى الماضي ، فشلت اكون انسان يبقي عنده مشاعر حقيقية ممكن تتولد فيوم من الايام تجاه حد تانى ، نجحت فحاجة واحدة ، انى ابقي احلى تسلية ليها لحد م تفرج ، واهى فرجت ليها ، وانا اللى خسرت، انا اسف على الاطالة ، الكلام ده جوايا بقاله سنيين واول مرة اخرجه دلوقتى ، فات ٨ سنين على اول يوم شوفتها فيه، وعمرى م نسيتها ولا هنساها ، احلى واسوأ بصمة فحياتى. شكرا.

1

0