حياتى اتحطمت بعد نتيجه الثانويه.. ثقتى فى نفسى وربنا ضعفت

Question

انا.. من يوم نتيجه الثانويه العامه بتحتى من سنتين.. وانا حياتى مش زى الاول..  
كنت دحيحه من الى بيزاكرو ١٨ ساعه فاليوم دول.. واثقه فمستوايا جدا وعارفه انى هجيب المجموع الى عايزاه ده اكييد.. وكنت شايفه ان ربنا استحاله استحااله ميدينيش الى انا عايزاه رغم مجهودى و تعبى و دعائى وثقى فيه .. بسس.. اختصارا مجبتش المجموع.. و جبت اقل بكتير.. وكانت صدمه من صدمات العمر.. كنت بانيه على الحلم ده حياتى.. فلحظه اتبخر.. مش شايفه نفسى غير فالكليه الى كنت عايزاها.. المشكله هنا انى.. اتهزيت.. رغم انى معترفتش بده لحد.. بس انا ثقتى فنفسى اتهزت.. و علاقتى بربنا ضعفت.. مبقيتش عندى طموح تانى خلاص.. زى ما تيحى تيجى.. مش عارفه اضغط على نفسى او اجبر نفسى على ال حاجه تانى زى ما كنت بجبر نفسى عالمزاكره.. حتى لو كانت الصلاه! قطعت فصلاتى لاول مره من سنين.. مش عارفه التزم باى حاجه فالحياه.. طبعا مزاكرتى فالجامعه متدمره وشيلت تلت مواد..كل تيرم بطلع بماده.. مش عارفه ازاكر تانى خلاص حتى فليالى الامتحان .. وفى كوزات محضرتهاش عشان مش جايه على هوايا.. كل حاجه فحياتى بقت اهمال.. حتى علاقتى بربنا.. مبقيتش عارفه لقول لنفسى لازم تعملى كذا.. بهرب من اى حاجه مفروضه عليا اكنى مش قابله اعمل حاجه غصب عنى او اتعب نفسى فاى حاجه تانى.. والمشكله انى فعلا كنت واثقه ثقه عمياء فربنا ان تعبى مش هيضيع.. اكنى يعنى هشرط على ربنا عشان دعيتله و تعبت شويه.. اكن ربنا وعدنى بتحقيق احلامى الى اختارها.. انا عارفه ان تفكيرى كان غلط.. بس انا اتهويت هزه وحشه.. خسيت بالخذلان.. و خسيت بالذنب انى خسيت بالخذلان.. وكل خاجه فحياتى بايظه من يومها..

Avocado_57638 🇪🇬 · Accepted Answer

وانا والله زيك بالضبط 🥲
بس انا كنت السنه اللي فاتت 
نفس كل حاجه والله انتي مش لوحدك بس بقيت بقول ان هي مش امتحان الاخره واهو بحاول اهون علي نفسي وافرح نفسي ب اي حاجه اه لحد دلوقتي لما اشوف الكليه اللي كان نفسي فيها بزعل بس بقول هي اللي خسرتني مش انا و الحمدلله على كل حال وربنا يعوض علينا ويكرمنا بزوج حنين لين يعوضنا عن كل حاجه بقااا 😂❤

Strawberry_58144 🇪🇬 · Answer

انا بقيت فتالته كليه ولسه بالحاله دى🥺 انا خبيت الكليه خلاص و رجعت ازاكر بس اثرها فحياتى لسه موجود.. انا مش عارفه التوم باى حاجه مش عارفه حتى اعمل اى طلب اتكلب منى مش عارفه اسمع كلام اى حد مش عارفه اجبر نفسى على عاده جديده ولا عارفه التزم بالصلاه حتى! مش عارفه الحل اى بجد

Tomato_62425 🇪🇬 · Answer

أنا المفروض كنت اكون دلوقتي في ثانيه كليه بس أنا لسه في اولى عادي جداً هدخل مع الناس البيمنحنوا ثالثه ثانوي دلوقتي لنفس السبب كليه مكنتش هدف ولا كانت في التوقعات أصلا واتهزيت هزه جامده جدا نفس الكلام بظبط كنت بصلي وبدعي وواثق و....
الحمدلله أنا اه لسه في اولى ومدخلتش الكليه العايزها 
بس اتعلمت حاجات كثير أوي ممكن أقول الرضا أولهم مكنتش هفرح بالكليه مثلا لو لقدر الله جالي مرض ويكفي إني عرفت اني مدمن

Tomato_62425 🇪🇬 · Answer

الحمدلله ومتقبل إن جوايا آثار الجروح الخفت والكل متيجي السيره ترجع احساسها بس أنا عارف إن ربنا أرحم بيا من ابويا وأمي 
وعارف إن لو كشفت الاقدار لخترت ما قدر الله لي فهو الخير الخير وإن رأت عيني القاصره أنه بخلاف ذالك 
اياكِ مهما حصل تقطع صلاتك وفضل واثق في ربك والله هتشوفي جبره ليكِ في حياتك مش شرط كانت الكليه دي

Blueberry_63218 🇪🇬 · Answer

بصي يا روحي 💜
قصتك قريبة لقصتي شوية 💜
كنت شبهك برضو وكنت حابه أبقي طبيبة مخ وأعصاب وسبحان الله الحلم ده متحققش كنت دفعة المرونة بعدها ولمدة سنتين كنت كل ما افتكر أنهار بس صراحة شخصيتي محاربة وأنا بعيط لما النتيجة طلعت قولت حلم راح رغم وجع الكلام وقتها طيب نمسك في حلم جديد 💜
كنت شخصية اجتماعية بس واقع بس مليش أي تعاملات سوشيال ميديا إلا قليل قولت بإذن الله هدخل عالم التطوع علشان لو زاحمت حياتي بخير

Blueberry_63218 🇪🇬 · Answer

ربنا هيباركلي فيها وكدا دخلت كذا مكان تطوعي اتعلمت وعلمت 💜
وبسبب الثانوية العامة والخبرات إللي اكتسبتها في طريقي لكتابة كتاب عن الثانوية وكدا 💜
بس أهم حاجة إني مستسلمتش للوجع سبحان الله لو حد قالي اختاري هختار إللي ربنا كتبهولي 💜

Blueberry_63218 🇪🇬 · Answer

وأنتِ يا لطيفة واحدة واحدة هتعرفي الحكمة 💜
ممكن تقابلي زميل محترم يكون زوجك في المستقبل
فرصة شغل جديدة من كلمة تسمعيها
حلم طفولة تحققيه مكنتيش هتحققيه من الطريق الأول 💜
حاسه بيكي جامد والله بس ربك بيعوض يا لطيفة 🥺💜

Blueberry_63218 🇪🇬 · Answer

نصيحتي ليكي ورقة وقلم وشوفي أنتي محتاجة إيه بجد من حياتك 💜
وأفتكري لو مخسرناش الجنة إحنا مخسرناش حاجة 💜