#الرجل-الذي-فقد-نفسه! ـــــــــــــــــــــــــــــــــــــــــــــ فيه حاجة مابتتوصفش مش وجع… ومش حزن واضح هي حاجة شبه الفراغ بس تقيلة شبه السكون بس بيخبط شبه الحياة بس من غير طعم بقيت بصحى كل يوم جسمي صاحي وروحي نايمة بمشي وسط الناس بعين شايفة ومش شايفة كل حاجة باهتة حتى الضحك بقى مرهق والكلام بقى عبء والسكوت بقى أريح… رغم إنه بيخليني أختنق أكتر الوقت بيجري حواليا بأقصى سرعة بس جوايا متجمّد كأني محبوس في لحظة واحدة مطّولة أقنع نفسي إنها هتعدي بس كل ما الوقت يعدي بحس إنها بتثبت أكتر مخي مش سايبني أفكار فوق أفكار سؤال بيرد على سؤال تشكيك في كل خطوة وصراع داخلي مابيهدّيش والنتيجة؟ جسمي بيعيش إرهاق مش مفهوم تعب دائم حتى وأنا مابعملش حاجة حتى وأنا نايم وكل اللي بيبان للناس إني بقيت كسلان بارد مش عايز أتحرك مع إني بواجه معركة حقيقية جوا دماغي كل لحظة بقيت حاسس إني مش موجود فعلًا جسديًا موجود، بس فعليًا؟ كأني مش مع حد ولا حتى مع نفسي مش طالب كتير مش مستني حد يفهم كل ده بس اللي هيدخل ينصح يحاول الأول يحط نفسه مكاني مش علشان يبررلي بس علشان يعرف إن فيه ناس حالتها مش محتاجة شد قد ما محتاجة حضن صامت أو حتى كلمة خفيفة ماتوجعش أكتر وبعد كل اللي فوق ده أنا ساكت بس جوايا صوت صغير بيتكلم وبيسأل بهمس هو أنا لسه هنا…؟ ولا اللي فاضل مني بس عادة بتتنفس…؟

9

0