موضوع:

امتى حسيت إنك كنت محتاج حد يسمعك وملاقيتش؟

أنا بمر بفترة صعبة أوي اليومين دول، وكل يوم بيعدي عليا حاسة فيه بالوحدة بشكل مرهق وموجع. بجد، لو كنا نعرف إن الطفولة هي أحلى وقت في عمرنا، كنا فضلنا متونسين بأهلنا وباللي بيحبونا، كنا حافظنا على الدفا اللي كنا بنحسه واحنا صغيرين. بس حتى الطفولة، أنا انعزلت فيها بدري. كنت دايمًا الوحدي، ولما كبرت، قلت أجرب أختار صحاب يكونوا جدعان وطيبين، بس للأسف اكتشفت إن الطيبة بقت عملة نادرة، وكل واحد بقى بيدور على مصلحته وبس. فضلت أختار ناس على أساس إنهم أصحاب طريق، نمشي مع بعض، نضحك ونحلم... بس لما الطريق بيخلص، بنتجاوز بعض وكأننا ما كناش نعرف بعض يوم. سوء الحظ ده حاجة صعبة، خصوصًا لما تلاقي الناس شايفين إن الشخص قليل الحظ ده "طاقة سلبية" أو "متشائم"، مع إن كل اللي محتاجه بس كلمة حلوة أو حضن أمان. أنا مش بعترض على قضاء ربنا، ديني فوق راسي، وبحاول أتمسك وأكون قوية، بس أنا بني آدم، قلبي بيتوجع، وفرحي مش بيكمل، وحياتي مليانة فراغ نفسي، ملل، وحدة، إحساس بالفشل، وكل يوم بيمشي وأنا مش لاقية أي حاجة تفرحني أو حتى تطبطب عليا. نفسي حد يسمعني، حد أحكيله كل يوم عن اللي بيوجعني، ويكون في حياتي كعوض حقيقي... نفسي في حضن مخلص، صديق بجد، قلب كبير يفهمني ويحبني من غير حسابات. نفسي الناس تبطل تفهم كلامي غلط، كل اللي بقوله من باب الحب والنصيحة، مش ضعف ولا تكرار ولا دراما. بس للأسف، الناس بقت شبه الدنيا، قاسية وباردة. أنا حامدة ربنا إني لسه طيبة، ولسه بحس بالناس، ولسه عندي عقل بيفكر وقلب بيدق... بس نفسي يوم أحس بالأمان، أبطل أخاف، أبطل أقلق، أبطل أحس إني دايمًا مش مطمئنة.

2

5