عندي مشكله كل ما أحاول أتخطاها معرفش لأنها بتخليني عصبيه معظم الوقت ألا وهي إن فيه تفريق ف المعامله من أمي بجد،دائمًا شايفاني آخر أولوياتها ف كل حاجه ودائمًا شايفه احتياجاتي تافهه وملهاش لازمه،من وأنا صغيره ودائمًا بتتعامل معايا كأني بنت البطه السوده لدرجة إني وأنا طفله فكرت إني مش بنتهم بجد وإنهم لقوني على باب جامع زي ما بيقولوا،يعني مثلا من وأنا صغيره كانت تقول لأختي اللي أكبر مني أنتِ جميله ومتقوليش وده كله قصادي مش من ورا ضهري يعني،ومره قالت إن واحده صاحبتها قالتلها إن أختي اللي أكبر مني أجمل مني وقدامي برده!..مع إني فيه ناس كتير بتقولي إني جميله وكنت لما حد بيقولي كلمه حلوه ببقى فرحانه وبروح أقولها ماما صحابي قالولي إني حلوه النهارده أو فيه طنط شافتني وقالتلي إني جميله كانت تقولي بيضحكوا عليكِ متصدقيش نفسك ولا تتغري ف نفسك كنت بقولها بتقولي كده ليه كانت بتقول علشان متتغريش ف نفسك!ف حين إنها كانت دائمًا تقول لأختي اللي أكبر إنها جميله وحلوه وبيضاء وده كله علشان أنا مش بيضاء ومش سوداء ولا حتى قمحاويه يعني معرفش لون بشرتي ايه لكن مش بيضاء عمومًا ف كانت كل شويه تقعد تقولي أنا عايزه أعمل ايه حاجه علشان تبقي بيضاء شوفي أختك بيضاء ازاي!.. وأشياء كتير من هذا القبيل وكانت بتقلل مني قدام الناس زي إني كنت رفيعه جدًا كانت قدام الناس تتعمد تقلل مني وتتكلم عن إني رفيعه خالص وكان ف وشي حبوب كتير كانت تيجي برده قدام الناس تقولي ايه القرف ده ومش بتأكلي ومش عارفه ايه وتقلل مني لدرجة إني جالي اكتئاب وأنا كنت لسه صغيره ف إعدادي واتعرضت لتنمر كتير بسبب إني حتى مش واثقه ف نفسي ومش حاباها..ولحد الآن رغم إن الكل بيقولولي إني جميله مش بصدق وبيستغربوا ازاي مش مصدقه إني جميله وبقولهم والله ما شايفه نفسي جميله وبيتصدموا !..وصلت لمرحلة إني مش واثقه ف نفسي بربع جنيه..نيجي بقه ل إنها جابت دهب لأختي الصغيره وأختي الكبيره وأنا لا!..صدقوني أنا مش باصه للدهب أنا مش بحبه أصلا بجد لكن أنا فارق معايا فكرة إني على الهامش!!..لما كبرنا بقه أختي الكبيره عندها صحاب وبتخرج معاهم وبيتفسحوا وأنا ممنوعه علشان لو خرجت هتخطف وأنا بنت ومينفعش !.. أختي الكبيره تشتري اللي عاوزاه وأنا لا علشان ده تبذير وتفاهه!.ده غير بقه وأنا صغيره كان أخويا بيضربني طول الوقت وعادي كانت بتقولي ده أخوكي !..ولما كنت بزعقله كانت بتبهدلني لدرجة إني للأسف دلوقتي بكره أخويا ومش طايقاه لأنه مره ضربني وأغمى عليا وكنت بنزف دم وأنا صغيره ومقالتلوش أي حاجه ولا زعقتله حتى وكان دائمًا كده وبتستغرب دلوقتي أنا مش طايقاه ليه !..كنت محتاجه علاج لشعري علشان باظ ووقع م الكيماوي مجابتهوليش ف حين إنها ادت فلوس لأخويا اللي ما شاء الله بيشتغل وبيقبض علشان يشتري لنفسه شوز وكروكس!..لما كنت ف فترة الكيماوي أنا بتعالج ف محافظه واحنا عايشين ف محافظه تانيه أصلا بس أخويا وأختي بيشتغلوا ف المحافظه اللي بتعالج فيها ف كنت قاعده أتعالج معاهم ماما مجاتليش خالص من أول ما اكتشفت إني عندي كانسر طول الفتره دي مجاتليش غير قبل العمليه بيوم وقعدت معايا يومين بعد العمليه وسافرت،ف حين إن مره أختي الكبيره كان عندها دور برد ومهبطه والله العظيم سافرتلها مخصوص أقسم بالله!!وأنا اللي عندي كانسر وطول فترة الكيماوي والفحوصات والقرف مشوفتهاش غير قبل العمليه بيوم..وبتعيط من قسوتي معاهم كلهم!! وبتعيط من عصبيتي غصب عني!! أنا بقيت أجبر نفسي أتعامل معاهم بحنيه علشان رضا الوالدين وعلشان مبقاش عاقه بس أتمنى لو فيه أهالي هنا وبيشوفوا كلامي بلاش تتعاملوا كده مع عيالكوا لأنكوا هتكونوا سبب ف إنهم ميبقوش طابقين بعض بعدين ومش كره ومش حقد لكن فعلا انتوا بتزرعوا ده جواهم وف النهايه أي حد هيرد على كلامي يرد باحترام لأنها أمي ف الأول وف الآخر ومش هسمح لحد يقول أي حاجه تقلل منها

6

7