من وانا طفلة عيشت عمري" مغمضة عيني" دا كانت اول جملة بدأت بيها احكي حكايتي هنا بس ع الاكونت القديم.. يمكن من اكبر اسباب اني عرفت أكمل في الحياة هو العالم الخيالي بتاعي، كنت طفلة مكنتش قاصدة اكون خيالية، بس فجأة لقيت نفسي بنام كتير وبحلم بعدها بقين بقول ليه مغمضش عيني واتخيل انا الحلم، دا كان ملخص حياتي النهاردة عندي 30 سنه منهم ايام كتير معرفش راحت فين، بس الأكيد انه مكانش عندي طريقة تانية احمي بيها قلبي، في الحلم انا اتحبيت اتحبيت اوي وبكل المعاني كنت مميزة وسعيدة ووسط ناس كتير، انا في المدرسة مكانش ليا اصحاب كتير كنت بقعد في ضهر المدرسة لابسه الهاند فري وبرسم لحد ماالبريك يخلص، كنت بستغل اي وقت للخيال كنت بهرب هناك اول م بغمض عيني بتتفتح قدامي بوابة كبيرة بدخل منها للعالم بتاعي، و ... وهو عرفته قبل مااعرف يعني ايه مشاعر و سميته اسم مش متكرر كتير ومعرفش ليه الاسم دا الي جه ع بالي..، بس انا ممتنة لوجودة حتي لو كان مجرد خيال، هو كان رفيقي الحقيقي كنت بحب اشتري نوتس كتير وشكلهم حلو وبكتبله فيهم وكنت مصدقة اني هقابله، وانه هيعرفني واني مكنتش بكلم نفسي لا هو كان حاسس بيا كنت مصدقة اوي كان قلبي مليان أمل، لحد ما كبرت وفهمت ان دي مشاعر بس لحد مش موجود واكيد هو شئ مش منطقي بس انا مصدقاه، كنت بحس بوجوده مع كل شوية هوا بيحركوا الشجر كنت بحس بوجودة وانا قاعدة قدام البحر وكأن هو البحر كان مالي حياتي وافكاري يمكن دا خلاني معرفش اتعامل مع الواقع من بدري بس دلوقتي بتمني ترجعلي الايام دي تاني، بطلت احلم وبطلت استنى وكبرت بس روحي لسه طفلة تايهه وسط الكبار مستنياه يجي يلاقيها ويمسك اديها ويرجعها البيت..

0

10