Popcorn_52020 🇪🇬
منذ 4 أيام
.
شعور مكتئب
قبل أي حاجة، قبل ما تحكم أو تفترض، أنا محتاج تطفّي صوت الأحكام شوية… وتحاول تفهمني بهدوء، وبصدر راحب، ومن غير ما ترمّي عليّا سيل من الاتهامات اللي بقيت حافظها عن ظهر قلب. المشكلة اللي هتكلم عنها دي خنقاني، بجد… خنقاني خنقة مش طبعية، وبتسببلي قلق وتوتر غريب حتى من قبل ما أعيشها فعليًا، كأنها شبح واقفلي على باب كل حاجة حلوة، وأنا مش عارف أعمله إيه ولا أهرب منه فين. أنا شاب لسه متخرج من سنة، يعني في عزّ بداية المفروض تكون فيها طاقة، شغف، حياة… بس أنا بالعكس، منطفي، ساكت، موجوع… مش لاقي نفسي، ومش عارف أتحمل نفسي. مافيش حد في حياتي، بس أنا مرعوب من اليوم اللي يكون فيه حد. مش مرعوب منها، مرعوب من نفسي… من حالتي، من برودي الظاهري، من خوفي من مسؤولية ممكن أكون مش قدّها وأنا بالشكل ده. كل حاجة بقت بتتعبني… صوت الناس، ضغط الأهل، صراعات الحياة، وفي وسط ده كله، الست اللي ممكن تدخل حياتي؟ محتاجة احتواء، ومشاعر، وودن تسمعها… وهي بطبيعتها؟ غريبة… معقدة… متقلبة… ساعات تبقى محتاجة حضن، وساعات تبعد فجأة… تحب التعبير، وتفهم في التفاصيل، وتتعب جدًا من الصمت… وأنا كلّي صمت. أنا مش ضد ده، بالعكس… أنا شايف ده شيء جميل، بس أنا خايف أكون مش قادر أقدمه، مش لأني مش عايز، بس لأني مش لاقي حتى اللي أقدمه لنفسي. وأكتر حاجة بتوجع؟ إني بتقال عليّا "بارد"، "مش بيحب"، "مش هينفع يحتوي حد"، "مشاعره ناشفة"، "ده بيهرب وقت الجد"، ومحدش سأل نفسه: هو يمكن بيهرب لأنه خايف يوقع حد جواه؟ يمكن هو مش قادر يحتوي نفسه أصلًا؟ أنا بحاول… بحاول أفهمني، أظبطني، ألملم حتت نفسي اللي اتبعثرت، لكن الضغط كبير، والصمت جوايا أعلى من أي صوت. أنا مش شخص سيئ، بس أنا شخص موجوع… شخص تايه بين اللي نفسه فيه، واللي قادر عليه. فلو قابلت حد شكله عادي بس عينه حزينة وساكته، اعرف إنه مش عايش بجد… هو بيحاول ينجو، زيي بالظبط. ---
7
0
