أنا ارمل ٤٩ سنة من ٦ سنوات زوجتي توفيت بعد رحلة ابتلاء مع السرطان لمدة ٥ سنوات بعدها انتقلت الي جوار الله وتركت لي بنتين للاسف مع رحيل زوجتي رحلت معاها اي معاني لاي حاجة لاننا تزوجنا عن حب وزيي ما بيقولوا كانت بنت موت ادب واخلاق وتعليم ورقي أنا الحمد لله مؤمن بقضاء الله وقدره بس أنا بشر المهم ماطولش عليكم فقدت طعم الدنيا وفكرة ان اتجوز تاني او يكون عندي اسرة اختفت تماما من تفكيري أنا كنت عايش بره والبنتين نزلوا مع جدتهم وخالتهم وطبعا ماحدش بيشيل هم حد ومن خالتهم لعمهم نفس الشىء كله عايز فلوس بس والاخر هم اللي بيصرفوا عليهم وجدت ان الأمور مش حتستقيم نزلت نهائي وخدت بناتي بحضني وبدأت حياتي من الاول كأي شاب متخرج دورت علي شغل والحمد لله فين المشكلة بصراحة المشكلة في آخر اجازة قبل النزول نهائي كنت بوصل حاجة لواحد صاحبي بمحافظة تانية واتعرفت ببنت قريبته كانت لسه مفشكلة الخطوبة واتكلمت معاها عادي كنصيحة ان الارتباط شىء مهم وحكيت لها وضعي واد ايه الوحدة صعب ومش معني تجربة فشلت نهاية العالم لقيتها بتتواصل معايا وبعد اقل من شهور عرفتني انها بتحبني وطبعا قبل ما حد يقول واحدة صغيرة تدلعك أنا فضلت اقنعها شهور ان الفرق كبير ١٩ سنة وابوها واخواتها مش حيوافقوا المهم من كتر صدقها حبيتها وانا اتاكدت من نفسي طلبت منها تبلغ ابوها واخواتها وتحكي كل حاجة عني بكل صراحة وطلبت اتقدم ابوها قلها الموضوع مش سهل حتتحملي مسئولية بنتين وعموما اما يرجع لو كويس نشوف واخواتها متعلمين ومراكز مرموقة وكلهم رفضوا بس امرها بايد ابوها وكنا بنتواصل بالتليفون بعلم اهلها فجاة وانا مسافرة ابوها توفي وانتقلت مسئوليتها لاخوها الكبير اللي رفض الموضوع رفض قطعي بعد ما فتح تليفونها وشاف الرسايل اللي كلها مافيهاش حاجة غلط وحتي رفض يقابلني اما رجعت وطلبت اتقدم وده اللي كنت متوقعه وقلته لها ان بعد ابوها ارتباطنا صعب المهم سحب منها الفون وبقت تعدي شهور لحد اما تعرف تبعت رسالة واستمر الحال علي كده وهي كانت عايزه تتجوزني وتحطهم امام الامر الواقع وانا رفضت عشان مش طبعي ولا تربيتي ولكن كنت خايف تسيب بيتهم وتيجى عندي ووقتها ما كنتش حقدر اسيبها في الشارع وكنت بتحجج باني لسه بدور علي شغل لحد آخر مرة من سنة تقريبا سألتني قلت لها لقيت شغل والحمد لله وسالتها علي رقمي قالت عندها في اچيندة خارجية وما جابت سيرة انها تيجى ونتجوز ومن سنه ولا حس ولا خبر وانا في حيرة البنات محتاجين ام وانا محتاج ست في حياتي المشكلة انها عملت حاجة كنت افتكرت انها ماتت وانتهت قدرت ترجعلي اهتمامي بالحياة وان ممكن اكون اسرة تاني واكمل دلوقتي أنا في حيرة مش عارف ارتبط خايف تنفذ وعدها وتيجى ووقتها مش حتخلي عنها وكمان حياتي أنا والبنات مش مستقرة كلها هرجلة وعشوائية عشان مافيش ست في البيت ونفس الوقت مش قادر أفكر في حد تاني لني بجد حبيتها ماعرفش هي حبتني ليه مفتقدة الاب غالبا لا لان وقت ما عرفتني ابوها كانت عايش يمكن عجبتها شخصيتي ووقفتي مع زوجتي الله يرحمها بمرضها في الوقت اللي خطيبها خانها مع صاحبتها خيانة فعلية مش فاهم ونسيت أقولكم في ساعة خوف عليها مسحت كل حاجة تخصها من تليفون خفت يحصلي حاجة وتليفوني يقع في ايد حد اعملها مشاكل وعشان كده مش عارف اوصل لها بس حتي وانا عندي تليفونها هي اللي كانت بتتصل لاني كنت بتجنب اسبب لها مشكله مع اخوها المشكلة في اسئلة بتدور في عقلي كل ثانية معقول واحدة بتحب واحد بالشكل ده مافيش رسالة او اتصال تطمن عليها من سنة سوال تاني معقول واحدة عندها ٣٠ سنة مش معاها تليفون من وقت ما اخوها خد تليفونها وكسره سوال تالت اما بتحب تكلم حد من صاحبتها او حد يكلمها منهم او من أقاربها ازاي سوال اخير لو هي غيرت رايها ليه ما اتصلتش او رسالة تقولي شوف حالك مافيش نصيب محتار مش عارف أنساها ولا قادر اتخيل حد تاني اكمل معاه حياتي وخايف اضغط علي نفسي عشان بناتي حياتهم متبرجلة وارتبط تظهر هي وطبعا أنا ملزم بوعدي ليها حقيقة مش عارف اعمل ايه دعيت ربنا ينعم عليا باليقين وفصل الخطاب في الموضوع ده عشان ارتاح بس الوضع كما هو تنصحوني بايه وبعتذر عن الاطالة

2

8