إزاي بتمنعوا نفسكوا تشوفوا نفسكم بعين الناس التانية؟

Question

يعني لما بتشوف  رأي حد فيك او نظرته ليك ازاي لو مختلفة عنكوا تبطلوا تفكروا فيها او تكون دي حاجه شغلاك ان ازاي هو شايفني كده ؟

Chocolate_27808 🇪🇬 · Answer

نفسي ابطلها بجد يعني دايما بتاثر بنظره الناس ليا ودايما موجوعه بسبب النظره دي حتي لو انا عارفه اني مش زي النظره دي بحاول التجاهل بس من جوايا لا بتوجع جدا بجد والله  نفسي حد يقولي اعمل ايه مع نفسي وازاي اتعامل

Cherry_39881 🇪🇬 · Answer

مش عارفة انت ولد ولا بنت ف هحاول أعمم

من الآخر كده حط في دماغك إن مش مهم الناس ، هما مش هيعيشولي حياتي نيابة عني يعني 
المهم انا شايف نفسي إزاي طبعا وبدون تردد انا أجمل وأحلى حد في عين نفسي ( مش هقولك مهما كان عندك عيوب ف انت أحلى حد ؛ لأن مفيش حاجة في الموضوع ده اسمها عيوب) أنا بسميها استثناءات، أنا مختلف ، أنا مميز.
ليه مش اسمها عيوب؟ علشان ربنا سبحانه وتعالى قال :- "لَقَدْ خَلَقْنَا الْإِنسَانَ فِي أَحْسَنِ تَقْوِيمٍ"(سورة التين: الآية 4)
يعني انت ربنا خلقك شكلك كده لأنك جميل كده.، وانا ربنا خلقني كده لأني جميلة كده، وهكذا كل الناس. والحمد لله 
المهم إنك بتحب نفسك أما بقا إذا مش بتحبها ف دي قصة تانية والمشكلة هنا جواك مش قي الناس 
كلام الناس ولا بيقدم ولا يأخر ولا بينفع ولا بيضر وهما كده كده مش هيوقفوا كلام مهما عملت 
ف ارمي كلام الناس ورا ظهرك 
وعلى فكرة معنى انهم بيتكلموا يعني ات متشاف انت مميز وسط كل دول 
صدقني الحياة أبسط وأتفه وأسهل وأسرع من اننا نتأثر بكلام الناس
بشر زيهم زينا مخلوقين من تراب وهنرجع نتدفن فيه كلنا 
ف مش مهم الناس شايفينك إزاي، المهم رب الناس شايفك إزاي ، وبتعمل إيه في دنيتك علشان يخليك بعد مماتك ويوم القيامة أجمل وأفضل منهم.

French Fries_14743 🇪🇬 · Answer

أكتر كلمة مش واقعية هى اننا "نمنع" عن نفسنا شيئ..
حياتنا مش بالسهولة اللى تخلينا متحكمين فى كل حاجة بتحصل للدرجادى
المهم
نرجع للسؤال، الموضوع كله نقدر نختصره فى كلمة واحدة..
ثقة

اولًا مش اى عيون ناس نشوف نفسنا منها
إنما ناس زى الأهل او الدايرة المُقربة اوى، اكيد رأى الناس دى يهمنا

على الجانب الآخر، فى العصر ده اللى أنتشر فيه السهولة
السهولة فى كل شيئ..…سهولة فى التواصل، سهولة فالعلاقات، سهولة فى الجواز والطلاق، سهولة فى الشر والخير
ولإن أغلب تصرفاتنا وهزارنا وحياتنا بقت متشافة on public من خلال حتة حديدة صغيرة بنعرف بيها اللى منقدرش نعرفه فالواقع

فبالتالى إطلاق الأحكام المُطلقة أصبح شيئ روتينى بنقوم بيه يوميًا من غير ماناخد بالنا.. على كل بوست كل صورة على كل فيديو
والمشكلة الأكبر إن الموضوع مش بيقف عند هنا
بينعكس كمان فى تعاملاتنا الواقعية، وبمجرد بس دبانة تعدى قدامك مش بتقدر تمسك لسانك وتلاقى نفسك حكمت عليها بشكل لا إرادى
وهنا….. يجى دور العقل اللاواعى فى إنه يصنف حُكم الناس على إنه حقيقة مُسلّم بيها
فى حين إن العقل الواعى لو أشتغل كام ثانية بس..
 هيفهم إن الناس دى متستحقش تاخد جزء من تفكيرنا

لكن، غصب عننا بيحصل العكس
وممكن بسبب Comment على صورة ليك تدخل فى حالة من الشك والإحباط وجلد ذات مع شلل فالتفكير
ده ليه! لإن الناس بقت تستهون اوى بالكلمة
ومبقاش عندها اى مانع او شيئ بتخاف منه قبل ماتكتب او تنطق
ميعرفوش ميزان الكلمة الواحدة بس ممكن تعمل اية فى البنى ادم من جوا

ودى رسالة لكل الناس اللى بتقرأ… اتمنى تاخدوا بالكوا كويس من صوابعكوا ولسانكوا قبل مايكون عندك سرعة فالرد بسببها يكون لسانك شاهد عليك يوم القيامة على الأذى اللى سببته للناس
أسف جدًا عالإطالة، وواضح انى سرحت فالكلام 😅

كل سنة وإنتوا طيبين ورمضان كريم عليكوا ❤️🌙