الفلاش باك الي بيجي فجأه

Question

احكي عن الفلاش باك الي بيجي لك فجأه ازاي الموقف كان صعب وقت مرورك بالمواقف وهل الفلاش باك دا لسا مستمر

Apple_52997 🇪🇬 · Answer

كان في حياتي صديقه كنت بحبها اوووي وقعدت في بيتهم تقريبا ١٣ سنة تخيلوا بقا ١٣ سنة حصل بيني وبينها مواقف قد اي ووكنت بحب ماماها واخواتها كانهم بيتي حرفياا وقعد سنين في بيتهم فجاه كدة حصل موقف بسيط اكتشفت فية كمية غل وحقد منهم مكنتش اتخيلها مش هقولكم ان محصلش حاجة مرة واتنين ومليون منهم عرفتني نيتهم بس انا من كتر ما كنت بحبهم اووووي بقيت زي المعمية ومهما يعملوا او يقولوا بقيت اقول لنفسي ميقصدوش وبقيت اكابر بس بجد حسبي الله ونعم الوكيل فيهم هما دماروا ماضيا فعلا وجابولي تروما من كل الا حوليا وبقيت بخاف اصاحب حد او اقرب

Watermelon_18890 🇪🇬 · Answer

يمكن مبحبش افتكر الموضوع ده بس للاسف مش عارفه اموڤ اون و كل حاجه بتيجي قدامي بتعمل فلاش باك ل من سنة و كام شهر...  يمكن تكون تافهه للبعض لان كلهم بيتكلموا عن صحاب او حبايب بس الفلاش باك بتاعي مختلف...

نرجع بالزمن ل من سنتين و انا ف تانيه اعدادي الترم تاني و بفكر ف اني مستحيل ادخل ثانوي عام عشان الظلم اللي بشوفه و بعقد النية اني خلاص مستحيل ادخلها ( ربنا يسامحني ع كمية الحلفانات اللي حلفتها اني مش هدخل ثانوي عامل💀)  و لقيت مدرسه اسمها stem مدرسة المتفوقين ف العلوم و التكنولوجيا و حسيت اني لقيت طوق نجاة حرفيًا بس طلع طوق نجاة سحبني للغريق..  المهم اني بدأت افهم شروطها و دنيتها و قولت ل صحبتي عليها و خلاص كنا بنتخيل بعض و احنا ف السكن سوا ( المدرسة داخلية)  و حاجه تحفه بس و انا ف الرحله دي علقت حاجات كتيره اوي ب ستيم و انا مش واخده بالي ..  اغاني هدوم مجات لايف ستايل معين حتى آيات قرآنية.. بقيت لما اسمع او اشوف حاجه من دول تلقائًيا اتخنق و اقعد ابكي و اشوف الدنيا سودا و افضل ع الحال ده فتره.... الحمد لله اتظلمت ف الترم الاول و مأخدتش الدرجه اللي كانت هتبقا السبب ف اني اقدر اقدم ع اختبارات القبول مع ان اجابتي كانت صح...  الترم التاني عشت اقذر فترات حياتي بجد...  فتره ضغط و تشتت ان خلاص كل الابواب اتقفلت..  مكنتش عامله خطه بديله عشان كانت كل الاشارات بتقول اني خلاص اتقبلت لا اتقبلت ايه ده انا خلاص ف المدرسة اهو... قعدت ادور ع كوم مدارس تاني لحد ما لقيت مدرسة ل التكنولوجيا و ال ai و اهلي مكانوش مقتنعين ولا صحبتي عشان المدرسة دبلوم و لو كملتي بعدها هتكملي جامعة خاصه..  الصراحه ولا انا كنت مقتنعه عشان ده مش شغفي..  انا عايزه ابقا دكتوره ف ليه ارمي نفسي الرميه دي..  هبقا مهندسه او مبرمجه حاجه تحفه بس مش شغفي( ادعولي ادخل علاج طبيعي🫵🏻✨)  المهم بعد كلام كتير من ناس كتير و كوم استشارات احدثكم من قلب اولى ثانوي عام ترم تاني و خلاص امتحاناتي كمان يومين ادعولي بردو...  رحله كانت صعبه لحد دلوقتي مش عارفه اموڤ اون و سابت فيا اثر سلبي جدًا و نظره كره ل ستيم و طلابها و اكتر حاجه بجد مخلياني كارهه نفسي اصلا اني فقدت نعمة الدعاء..  مبقتش بعرف ادعي..  كنت بدعي كتير اوي و بستنى اوقات الاستجابه و بين الصلاة و الاقامة و لو حد طالع عمره و كل الحاجات دي و اول ما مجبتش مجموعها مره واحده اكن لساني اتعقد... كنت بقعد حوالي ربع ساعه قبل الفطار ف رمضان ادعي..  دلوقتي مبقتش حتى عارفه ادعي ل اهلي او ليا..  مره واحده اول ما ابدأ ادعي الاقي دماغي فضيت..  ف بجد سلبياتها كانت اكتر من ايجابيتها مش ك مدرسة لان مهما تقولولي انها وحشه و فيها حاجات كتير وحشه ف انا معميه عن كل الحاجات دي بس انا قصدي ع الرحله و التجربه .

المهم متنسونيش من دعائكم و  طولت عليكم بس عادي احنا اهل صح؟ 🤌🏻✨

دمتم بخير🪷✨

Biscuit_20744 🇪🇬 · Answer

كان يوم طبيعي جدًا كنا راجعين من المدرسة في الباص و كنت بلعب مع صحابي لحد ما نوصل فجأة الباص عمل حاد.ثة و في ولد كان على الارض و الشارع كله د..م و العربية الد..م طلع عليها ساعتها الناس مسكوا في السواق مكانوش راضيين يسيبوه و احنا كلنا في الباص خايفين ، كان لسه في مسافة كبيرة لحد ما أوصل بيتنا ، فلما مامت ولد معانا في نفس الباص عرفت اللي حصل جت عشان تطمن على ابنها و تروحنا ساعتها كنت صغيرة أوي مكنتش فاكرة طريق البيت و كنت في صدمة مكنتش قادرة اتكلم كلمت ماما سألتها على طريق البيت لحد ما وصلنا الحمدلله ،ساعتها أهلي أصروا ينقلوني من المدرسة و يدخلوني مدرسة أقرب منها ،قبل اللي  حصل كنت طفلة بحب اللعب جدًا و يمكن كنت أكتر حد شقي في مدرستي القديمة بعد ما حضرت الموقف ده بقيت أكتر شخص هادئ في الحياة مبقيتش بعرف اتكلم تاني زي الاول ، بتلعثم كتير جدا وانا بتكلم رغم ان اللي حصل كان من 11 سنة يعني وانا عندي 6 سنين ، حاليا آه بدأت ارجع كويسة تاني من فترة بس كل لما أشوف د..م او أعدي الطريق مثلا إيدي بتترعش و بخاف كإني لسه حاضرة الموقف من ثواني

Hazelnut_52786 🇪🇬 · Answer

فاكرين اغنيه هشام عباس اللي اسمها زمان وانا صغير بحلم ابقي كبير أنا مواليد الثمانينات أقولكم بصراحه أنا بتمني ارجع صغير الواحد حاسس انو في حلم صغير نام وصحي بقي كبير نام طفل صحي واحد عندو فوق الأربعين
أنا كل يوم بتحسر علي اللي يفتكرو من سعاده كنت شايفها وانا مش دارى كنت ملك من غير فلوس
كنت بنزل الشارع العب طول اليوم ومافيش حاجه اسمها نادي كنت باكل عند جارى وانام عندو ومافيش حد يقولي امشي كنت وكنت وكنت وكنت وكنت بتمني ارجع واخد حاجه واحده من دول الذكريات دي صعبه قوى عليا بقيت باخد موبيلي واتفرج علي كل حاجه بتاعتنا من جيلنا أنا ببص لعيالي واقولهم كل حاجه عندكم ومش مبسوطين وانا مكنش عندي اي حاجه ومبسوط اكتر منكم هوه السر فين يا جدعان في الرضا ولا القناعه ولا احنا زمان كنا ايه بالظبط عايز افهم والله .

Coffee_53420 🇪🇬 · Answer

عارف الفلاش باك اللحظه الحلوه فشخخخخ اللي عشتها مع ناس ونت مكنتش عارف انها حلوه بس لما خسرت الناس دي اكتشفت ان احا دي كانت حلوه فشخ ودلوقتي لا في الناس دي و مش باقي غير اللحظه الحلوه دي الي حرفيا بتقتلك كل ما تفتكرها و ياريت ع الاقل كانت الناس تبقي هنا مكنتش هتبقي صعبه لدرجاتي

Apple_53469 🇪🇬 · Answer

ان قد ايه كنت طيب ومهما بعدو وجرحو بيوحشوني جدا مش عارف انساهم او ناسيهم بس بيوحشوني مش عارف ده صح ولاًغلط اذا كانت مشكلة او لا بس كنت محتاج حد يحافظ علي العشرة والايام وع الاقل الوقت الي راح ع الفاضي حتا لو ساعة❤️‍🩹

Sugar_54171 🇪🇬 · Answer

شوفت بالصدفة بوست ليه بيسأل عن حاجه يعملها في شقته، من وقتها وأنا مش قادره اخرج برا ذكرياتنا بفتكر كل حاجه اخترناها وازاي خططنا للبيت دا بكل حب، كل دا اخترناه! دلوقتي هو بيعمله عشان البنت اللي سابني عشانها 😆
الله يوجع قلبه أضعاف ما وجعني

Apple_54174 🇪🇬 · Answer

حرفيًا الواحد بيموت كل ما يفتكر حاجه، طلعت الذكريات الحلوة ليها نفس تأثير الذكريات الوحشه ويمكن اكتر بكتير كمان.. نفسي أنساه والله بس للأسف بقالي ٧ شهور في عذاب وألم محدش ممكن يتخيله تعبت وحاسه ان كل مادا قلبي بيوجعني اكتر ما بين الاحساس بالذنب اللي مش بيفارقني واني كنت بعمل حاجات وفاكرة اني كده كنت بحمي نفسي وان لما المعاملة معايا تبقى صعبة أنا كده مش هخلي حد يضحك عليا واني اقعد اختبر هو بيحبني ولا لا واخليه مهما كنت مزعلاه يصالحني هو ومحسسوش ان زعله فارق رغم انه كان فارق اوي ومكنتش اقدر اعيش من غيره بس كنت بظهر عكس اللي جوايا عشان ابان البت القوية وبتاع واني كده ناصحة ،وما بين اني حاسه اني عمري ما هعوضه تاني أبدا ولا في حد ممكن اشوفه زي ما كنت بشوف الانسان ده و مش عارفه ادي فرصة لحد حاسه اني قلبي مات خلاص  أنا فعلا حبيته اوي اوي ومكنتش اعرف ان حياتي من غيره هتبقى ضايعه وكلها حزن ووحدة بالشكل ده بس اكتشفت ده متاخر بعد كل حاجه حلوة ما راحت وبعد هو ما كرهني تقريبا حاسه اني هموت من كتر الوجع والألم اللي جوايا ، وصراع نفسي مع نفسي وذكرياتي الواحد فعلا تعبان إلى أقصى درجة…لو حد عينه  جات ع الكلام ده يدعيلي

Cherry_33009 🇰🇼 · Answer

كل ما بشوف واحد بيتطلع على وحدة بحب، يجيني فلاش باك للمرة الوحيدة اللي شفت فيها هالنظرات طالعة منه، و لبنت تانية، قضيت سنين من عمري بدور على هالنظرة منه، سنين من عمري بتمناها و بعمل شو ما بده عشانها، و لما طلعت اخيراً، طلعت لبنت تانية مش لألي، بنت اقل مني بكل شي، بنت بالمواصفات اللي كان دايماً ينتقدها و يحكي انه بيكرهها، بنت كانت بتعرف اني موجودة بحياته بس ما همها و عرفت خلال ايام تطلع هالنظرة منه، انا ما بحبه هلأ، ولا اتمنى ارجعله بالعكس صار كابوسي اكون مع حدا متله، شخص مسيطر، متحكم، ضعيف شخصية بيلاقي قوته باهانة الناس اللي بيحبوه، سام و مهمش، و حتى امه ما بتحبه، بس بيحز بخاطري المشاعر اللي استنفذتها عليه، و المشاعر ما كان لازم تطلعله بس طلعت، و بيحز بخاطري كل نغزة قلب مع كل ذكرى، نغزة بتثبتلي انه الجرح اللي جرحني ياه عميق و مؤذي.

Avocado_57878 🇪🇬 · Answer

الفلاش باكاللي بيجي انه ليه من الاول مقلتش لا لحاجات كتير ناس اخترتها عني ليه مقولتش انا مش عايزه ده ليه كنت ضعيفه لدرجه انهم اختاروا حياتي دلوقتي وانا مكنتش عايزه كل ده ليه في الوقت اللي قرروا فيه عني مقولتش لا عن اي حاجه مش عايزها

Kiwi_49822 🇪🇬 · Answer

لما كنت صغير عندى 10 سنين واتصعدت شباب فى تمارين لعبة قتاليه معينه من كتر ما مركز فيها وخدت كذا ميداليه وكذا حزام وبعدها تجيلى مشكله مرضية نادرة فى الركبه فا اقعد ست سنين باخد علاج من غير نفع وماقدرش اسجد فى الصلاة واصلى وانا قاعد اوقات كتير ونظرات الناس ال كلها تهكم انك ازاى صغير وتصلى وانت قاعد ده دلع فا اشترى كرسي بيتفتح ويتقفل كده عشان ماقعدش على كنب المصلين فا يجى شخص وياخد منى الكرسي ويصلى عليه وحسبى الله فيه بجد واضطر اصلى واسجد وركبتى كان فيها الم بشكل كبير ومعرفتش اصلى صح ومحدش حتى يقول كلمه يهون بيها عليا الحمدلله المرض بقى اهدى بكتير من الاول ورجعت اصلى تانى عادى بس وزنى زاد واللياقة قلت كتير ونفسي ارجع زى ما كنت ومش عارف