أنا شخص متعلم ومجتهد والحمد لله قدرت أوصل لمكانة ووظيفة محترمة بفضل الله وتوفيقه كان هدفي من البداية إني أركز على مستقبلي وأشتغل على نفسي وفعلاً ما كانش في حياتي بنات لأني كنت شايف إن أول الطريق هو النجاح، وبعدها أبدأ أفكر في بنت الحلال اللي تكمل معايا المشوار. الحمد لله معروف عني إن أسلوبي لطيف ودمي خفيف، وكذا بنت حاولت تفتح معايا كلام أو تلمّح بمشاعر، لكن دايماً كنت واضح ومحترم، وكل كلامي كان في إطار الشغل والعادي. في بنات صرّحولي إنهم بيحبوني، لكن كنت دايماً برفض الموضوع بأدب شديد، وفضلت ليهم صاحب وأخ محترم، وده يشهد عليه اللي حواليا أنا أصغر إخواتي ولسه شايف إن قدامي وقت قبل ما أفكر في الخطوبة والجواز... بس رغم كل ده، جوايا إحساس غريب... كأن حاجة فاتتني، كأنّي كنت محتاج أعيش قصة حب زي باقي الناس. يمكن لأن زمان كنت في علاقة، واتصدمت فيها صدمة كبيرة، ومن ساعتها قررت أنتقم من الوجع بالنجاح... وفعلاً نجحت، ووصلت، لكن برضه جوايا فراغ... محتاج حد يشاركني المشاعر، يحس بيا... محتاج حب حقيقي

0

0