حبيبي مش لاقي شغل والمرتبات وحشة.. هفضل مستنية لحد امتا؟

Question

انا بحب واحد وهو كمان بيحبني بس هو مش لاقي شغل وكل مبيشتغل ف مكان مبيكملش ومش عاجبه اي سالاري وهو الصراحه السالاري عندنا وحش اوي يعني مرتبات من ٢٠٠٠ و ٣٠٠٠ وهو مستخسر يشتغل عشان هو بيصرف كتيرومواصلاته  ومبلغ زي دا مش هيفيده بحاجه والصراحه انا شايفه عنده حق بالذات الشغل بيبقي هلك و١٢ ساعه والراتب مش كفايا .
احنا علاقه مش رسميه وهو بيحاول يدور علي شغل بس مش عاجبه حاجه وانا اتخنقت مش عارفه هفضل مستنياه لحد امتا وهو مش بايده بردو وعازراه يشتغل ولما بتكلم معاه او بضغطه علي شغل بنتخانق جامد وبيقولي انه مش لاقي ومفيش مرتب وكدا.

Sugar_59393 🇪🇬 · Accepted Answer

ربنا يوفقكم يارب ويرزقه من حيث لا يحتسب يارب وادعي ربنا دايما ف قيام الليل وهو يدعي بردو وربنا يوفقكم💗

Biscuit_59744 🇪🇬 · Answer

لو بيحبك فعلا حاولي تقفي جمبه انتي اولا كام سنة و هو كام سنة و موهله ايه بيعرف يعمل ايه

Strawberry_25620 🇪🇬 · Answer

ما يقدم في اوبر ولا ديدي كل دول بيدوه العربيه يشتغل عليها يعني كل اللي هيحتاجه يعرف يسوق بس 🤷🏻‍♀️ويقدر يطلعلو الف جنيه مرتاح في اليوم قوليله يخرج برا ايطار التخصص والكلام اللي مبقاش يجيب فلوس اليومين دول😂

Grape_57212 🇪🇬 · Answer

احنا ٢١ سنه وهو معاه معهد تجاري وملهوش خبره وكدا

Grape_57212 🇪🇬 · Answer

دا بجد؟ + مرتبط بسن معين ولا لا هو اصلا مش معاه رخصه

Coconut_58539 🇪🇬 · Answer

دى علاقة نهايتها مسألة وقت ، متضيعيش سنين عمرك وشوفى مصلحتك ، والارتباط مش مرتب فقط ، لسه وراه سهارى متلتلة بالاضافة لانه فاشل ومش بتاع مسؤلية ، اتمناله التوفيق وانه يلاقى نفسه ، بس حتى هذا الاشعار شبابك انتى اللى بيضيع

Strawberry_25620 🇪🇬 · Answer

فوق ال ١٨ طبعا، لازم رخصه طبعا 
يتعلم وياخدها الموضوع بسيط حتى البنات بقو يسوقوا دلوقتي اي حد يقدر يسوق

Watermelon_56950 🇪🇬 · Answer

بصي هو اي سلاري في بلد غير القاهره بيبقا قليل ممكن يحاول يسافر القاهره او الجيزة ويشوف السلاري هيبقا كام

Hazelnut_52786 🇪🇬 · Answer

حاسس بيكي جدًا، انتي بين نارين: قلبك اللي بيحبه، وعقلك اللي مش شايف مستقبل واضح.
هو عنده حق فعلاً إن المرتبات سيئة، بس كمان مفيش حد بيبدأ كبير، كلنا بنعدي من تعب عشان نوصل.
حاولي تقفي معاه دعم، مش ضغط، بس برضو خدي بالك من وقتك وعقلك وقلبك… لأن الانتظار بدون خطوة حقيقية بيستنزفك

Hazelnut_52786 🇪🇬 · Answer

ربنا يوفقكم يا رب