مشكلة الأخ الكبير اللي عمره ما خد دعم من صغره.. اللي كان بيسكت لأنه خايف، واللي كل ما يحاول يبان يتشال منه ثقته بنفسه بالسخرية والتقليل. وفجأة العمر جري، لقى نفسه كبير ومطلوب منه يبقى الحكيم، والسند، والضهر، والمثالي في كل حاجة. طب منين يا جماعة؟ منين؟ عارف الناس اللي هتقول: "خلاص كبرت، دي مسؤوليتك، متعش في دور الضحية.." أحب أقولهم يركنوا على جنب، لأنكم أتفه من إني أرد عليكم. أنا بكلم الناس اللي هتفهم وتحس. أنا مش بصرف على البيت والحمد لله مستورة، بس طول الوقت حاسس إنهم مستنيني أكون شخص تاني مش أنا، عشان أقدر ألبّي اللي عايزينه. وأنا أصلاً محتاج حد يساعدني، مش بامثل ولا باوهم نفسي.. أنا فعلاً تايه. والدي مات وأنا في أولى ابتدائي، محدش وجهني من يومها. اتمرمطت فـ فترة معينه وكانت كافية تكسرني. والدتي اتجوزت تاني وعايش معاها انا واخويا وقتها كنا صغيرين وملناش غيرها وكان فيه مشكل كبيره مع اهل ابويا بعد مامات وطردونا م الشقه فا دا كان السبب اننا نعيش معاها ، لكن بدل ما المشاكل تقل، زادت. أي حاجة تحصل بتشتكيلي وتحط همها على كتافي. هي مش بتطلب فلوس، هي عايزة حنية.. بس منين أجيبها؟ أنا أصلاً ما شفتش منها ولا من غيرها حنية حقيقية غير قليل، ويمكن مصطنعة. يمكن بتعاطف معاها، بس بطريقتي، مش بالطريقة اللي هي عايزاها. وده مش بإيدي. فوق ده كله، أنا مكتئب بقالي خمس سنين، وبصراحة جزء كبير من اكتئابي بسببها. أنا اتطفيت بدري.. عندي 23 سنة وبحس إني عجزت ووصلت لـ 80. أيوة، أمي عملت اللي عليها وربتني زي ما اتربت، لكن ما عرفتنيش إزاي أبقى سوي. الكتمان والخوف من عقابها وأنا صغير خلوني معقد من جوه وكاره الناس والحياة. أنا مش سوبر مان، ولا خارق. أنا بني آدم بلحم ودم. مش عايز حد يقولي: "دي مشكلتك، لازم تحلها، أنقذ نفسك." أنا عارف ده كويس. لكن بدل ما تقطع فيا، قول كلمة طيبة يا أخي أنا مش روبوت، أنا إنسان محتاج يتفهم. لدرجة إني وصلت إني قررت مش هتجوز. متخيلين إن الموضوع معايا وصل للدرجة دي؟

2

3