مش عارفه أصلح علاقاتي ولا أغير من نفسي

Question

مش مسامحه نفسي ع كل حد حاول يقرب مني وانا بعصبيتي وغبائي كرهته فيا مبقاش ليا صحاب حتي الشخص الوحيد اللى فعلا حبني بعد عني بسبب طريقتي مش عارفه اغير من نفسي ولا عارفه أصلح علاقاتي مع الناس مش عارفه اعمل اي بجد

Guava_60575 🇪🇬 · Answer

مفيش حاجة فاتتك و كل حاجة يمكن تداركها و الاهم انك تتصالحي مع نفسك و تعرفي فين المشكلة و لو المشكلة عندك اشتغلي علي انك تصلحيها و كل حاجة بتتعوض بأذن الله . في حاجة دايما بتيجي ف بالي لما بمر بأوقات صعبة و هي انه مهما حصل فانا لسه عايش و لسه فيا الروح و طالما لسه عايش يبقي كل حاجة ممكن تتعوض و يجي احسن منها و اقدر اصلح اي حاجة غلط عملتها و لسه عندي فرصة احسن نفسي و حياتي و اغيرها

Avocado_62744 🇪🇬 · Answer

مبعرفش اتحكم ف اعصابي خالص وردودي دايما بتعصب الل  قدامي واوقات ببقي قاصده اعمل كدا واوقات تانيه بجد مبعرفش اتصرف ف برمي كلام يزعل ودايما متعصبه وف  الفتره دي بقي بيجيلك كوابيس جدة ودايما قلقانه وخايفه

Guava_60575 🇪🇬 · Answer

اعتقد ان ده بيحصل بسبب حاجات تانية ملهاش علاقة ب ال انتي بتكلميه او بتتعصبي عليه علشان كده بقولك لازم الاول تتصالحي مع نفسك و تبقي انت نفسك كويسة و تسلمي امرك لله و اعتقد ساعتها هتحسي انك اهدى كتييير و هتتعاملي مع الامور بشكل اهدى . صدقيني فكرة انك تسلمي امرك لله هتشيل عن قلبك هموم كتير اوي ان بالظبط كأنك وكلتي كل امورك ال ملهاش حل عندك لحد يكون وكيلك ف حلها . فهتحسي انه اتشال من علي قلبك هم كبير

Guava_60575 🇪🇬 · Answer

صحيح في حاجات معينة متتعوضش بالذات الاهل زي الاب و الام و الاخوات . لكن ربما بيعوض بحاجات تانية قادرة تخفف وجعنا و تونسنا و تراضي قلبنا بيها . صدقيني كل حاجة بتبدأ من عندك و لو انت مشتغلتيش علي انك تبقي كويسة و تريحي قلبك من الهموم ال عليه هيبقي صعب عليكي جدا تشوفي الدنيا بعين تانية و تدي فرصة لأي حد حتي انه يساعدك او يقف جنبك

Guava_60575 🇪🇬 · Answer

ربنا يراضي قلبك و يداويه و يعوضك خير عن كل حاجة فقدتيها او افتقدتيها . و متنسيش . طالما لسه عايشين يبقي مفيش حاجة فاتتنا و لسه في فرصة و امل ان كل حاجة تتحسن و نعيش حياة احسن او حتي اننا نعيش مراتحين البال و القلب

Guava_60575 🇪🇬 · Answer

مفيش حد سبقنا و لا حد حياته احسن مننا . كل واحد ربنا حاطه في تراك او دايرة معينة و رزقه و قدره مكتوب و مش كلنا بيجيلنا رزقنا في نفس الوقت و لا كلنا مكتوبلنا نفس القدر . كل واحد له تجربه و كل واحد له حياة و ظروف و مشاكل و صعوبات . كله هيهون بأذن الله طالما لسه عايشين و طالما فينا صحة قادرين نعوض اي شئ فاتنا

Guava_60575 🇪🇬 · Answer

و لو ظلمتي حد مش عيب انك تعتذري او تصلحي ال حصل و تجبري خاطر ال غلطتي في حقه و هو او هي ملهاش ذنب

Coffee_61658 🇪🇬 · Answer

سامحي نفسك ، كفاية عليكي انك لوحدك ، متحسسيش نفسك انك السبب

Cheese_62538 🇪🇬 · Answer

مشكلة نفسية شوية الأولةقلل ما تدوري على العلاقات مع الناس راجعي نفسك واعرفيها اكتر وبهدين سيبي علتقاتك تمشي طبيعي وإن شاء الله خير

Avocado_62744 🇪🇬 · Answer

طيب اي الحاجات اللى اعملها عشان اهدي اعصابي ومخدش كل حاجه بعصبيه كدة  وابقي متهوره ف رادود فعلي

Guava_60575 🇪🇬 · Answer

بصي انا مش متخصص بس يمكن هقولك تجربتي او من ال بشوفه مع ال حواليا . دوري علي سلامك النفسي اولا . قللي الزعل و سلمي امورك لربنا و اي حاجة بتتعب اعصابك او بتزعلك ابعدي عنها سواء كانت مواقف او اشخاص او حاجات بتعمليها . بدليها بحاجات بتبسطك او بتفرحك . غيري جو و دوري علي راحة بالك و الحاجة ال فعلا بتسعدك . متشغليش بالك بحد و لا بحال حد غيرك و لا كلام حد عليكي طالما مش بتعملي حاجة غلط .

Guava_60575 🇪🇬 · Answer

دوري علي ايه ال تاعبك من جواكي و ازاي تتخلصي منه . شيلي الهموم ال علي قلبك سواء بتفكري ف مستقبلك او في تصرفات الناس معاكي او انك وحيدة او اي حاجة بتدايقك . شيلي كل ده عن قلبك و وكلي ربنا مكانك . انا مش عارف ديانتك بالظبط بس لو مسلمة فحاولي اذكري ربنا و ادعيه انه يخرجك من البلاء و يراضي قلبك و صلي ركتين بالليل و ادعي بعدهم بكل حاجة تيجي ف بالك . فضفضي مع ربنا .

Guava_60575 🇪🇬 · Answer

الخلاصة انك تركزي مع نفسك اكتر . اعملي ال بيبسطك مش ال بتعمليه علشان تباني قدام الناس كويسة او سعيدة . خليكي حقيقية و صادقة مع نفسك و دوري علي الحاجة ال بتزعلك و بتدايقك و دوري علي ازاي تمنعيها او تخلصي منها .
و ممكن تدوري ورا الموضوع اكتر و تفهمي نفسك اكتر المهم انه الاكيد انك لازم تبدئي بنفسك و بعدها طريقة تعاملك مع الدنيا و الناس هتختلف لوحدها و الظروف و الحياة من حواليكي هتختلف برضو لوحدها .

Guava_60575 🇪🇬 · Answer

ان الله لا يغير ما بقوم حتي يغيروا ما بأنفسهم . 
ف المهم اننا نبدأ و لما ربنا يلاقينا بنحاول هيساعدنا اكيد

Pineapple_62632 🇪🇬 · Answer

اولا حبي نفسك ولازم تشوفي من جواكي انك حلوة ومميزه علشان اللي قدامك يحبك ومفيش حد كامل في كل شي اكيد عندهم عيوب واللي بيحب حد بيحبه باكدج واحد علي بعضه

Avocado_62744 🇪🇬 · Answer

حساه الموضوع خد اتجاه تاني ومش مشكلتي مع الاشخاص خالص بالعكس هما بيحبوني بس انا كدا بيجيلك وقت او لحظه بتقفل من الكلام ومن كل حاجه يعني مثلا ببقي فل وبنتكلم عادي فجأه بتقفل من اللى قدامي وبالعكس برضو انا من النوع الل ف حالي اوضتي وبس الفكره اني مبعرفش اتحكم ف اعصابي

Avocado_62744 🇪🇬 · Answer

ي جماعه حسه اني اتفهمت غلط مشكلتي مش الناس نفيها مشكلتي مع عصبيتي وازاى اهدي اعصابي لما اتقفل من حاجه مديقاني انا بالفعل بتخانق مع دبان وشي اعمل اي عشان اعرف ابقي متحكمه ف اعصابي

Guava_60575 🇪🇬 · Answer

مهو انت لازم تسألي نفسك ده بيحصل ليه و هل مع اشخاص معينة او مواقف معينة و لا ف كله و تدوري ورا الموضوع و لو الموضوع بشكل عام بيحصل يبقي اكيد الموضوع نفسي . بتبقي انت مش كويسة نفسيا و بتكابري او بتداري و بيجي يبان و يظهر عليكي ف المواقف ال زي كده . اعتقد ده ال بيحصل يعني و انا برضو مش متخصص احنا بس بندردش و بنحاول نشوف سبب علشان كده بقولك دوري و اعرفي السبب

Mango_59012 🇪🇬 · Answer

طب ليه كنتي بتعملي كده؟

Mango_61178 🇪🇬 · Answer

هييجي الشخص الي هيتحملك بكل تفاصيلك الي شايفاها وحشة وهيشوفهاوحلوة وهيخليكي تحبي نفسك اكتر بس ما تستعجليش

Lemon_62961 🇪🇬 · Answer

اظن محتاجة تعرفي ايه اسباب عصبيتك و تتصالحي معها عشان تختفي أو تعرفي تتعاملي لانه طول ما أنتِ مش عارفة ايه اللي مخليكِ متعصبة هتفضلي تتعصبي و تكوني صعبة في التعامل مع اللي حواليكِ .. محتاجة تحبي نفسك لانه صدقيني لو حبيتها و تقبلتيها بعيوبها و مميزاتها اللي حواليكِ حتى لو محبهوش على الأقل مش هيكون بعدهم عنك مؤذي اوي و اظن مش كل الناس اللي سابتك سبتك عشان عصبيتك لأ كمان عشان هما مش مناسبين حتى لو حبتيهم

Avocado_62744 🇪🇬 · Answer

المفروض اعمل اى طيبه عشان اعرف اتعامل مع عصبيتي دي وازاى احب نفسي وانا طوال الوقت حاسه اني شخصيه وحشه

Lemon_62961 🇪🇬 · Answer

اولا ترقب عصبيتك بمعنى بتظهر امتى يعني مواقف معينة من أشخاص أو طريقة كلام معينة أو مشاعر معينة وصلتلك من الأشخاص اللي بتتعصب عليهم أو وسيلة دفاع لان اللي قدامك قلل منك و لما تعرفي ايه مصدر العصبية هتبدأي تفهميه اكتر بمعنى و ليكن بسبب شعور بعدم التقدير من شخص هتسألي نفسك ليه حسيت بعدم التقدير هنا و

Lemon_62961 🇪🇬 · Answer

ممكن تبحثي عن الشعور دة و ممكن يكون جاي منين على اليوتيوب و لو الشعور دة ليه سبب مثلا انك حاسة انك متستاهليش  تبدأي تفكري في حاجات حلوة أنتِ شايفها في نفسك أو القريبين منك بيقولولك عليه أو حتى تسألي ناس بتحبك بجد و تبدأي تشتغلي على حاجات تحبي انها تكون فيكِ و هتحسسك انك تستاهلي

Lemon_62961 🇪🇬 · Answer

كنت لسه بسمع فيديو عن موضوع حب النفس كانت البنوتة بتقول مش انك تدلعي نفسك و تقوليلها بحبك لأ انك تلتزمي تجاهه بمعنى و ليكن أنتِ عايزة تتعلمي لغة أو تتعلمي مهارة هتلتزمي بيها عشان أنتِ شايفة انك تستحقي و اديت مثال أنه الأشخاص اللي بنحبهم لما بيحتاجوا منا حاجة بنعملها و بنلتزم بيها و هكذا نفسك عشان تحبيها محتاجة تلتزمي بفعل الحاجات اللي نحتاجها و هتساعدها