انا أول مرة اتكلم عن حاجة شخصية لانى مش بحب احكى اي حاجة تخصنى، بس انا فعلا محتاج اتكلم عشان انا معنديش حد ممكن اتكلم معاه، انا عندى ٢٦ سنة، اتولدت وعيشت ١٤ سنة من عمرى برة مصر وبعدها رجعنا استقرينا فمصر ومن بعدها حياتى اتقلبت ١٨٠ درجة، عانيت كتير بسبب انانية ابويا واضطريت انزل اشتغل وحرفيا اتبهدلت، معيشتش فترة طفولة سوية زى اي حد، امى كانت جنبي بس مكانش فى ف ايدها حاجة تقدمهالى، وجعها كان واصلنى لذلك مكنتش شكاى، واتعاملت وعيشت عادى، كنت بشتغل جنب الدراسة و فالاجازات، مكنتش بقي بخرج ولا بسافر مع صحابى ولا بروح ف حتة عشان كنت مهتم اجمع مصاريفى، ودخلت ثانوية عامة والحمد لله خلصت بمجموع كبير ودخلت درست business administration ، انا الحمد لله لا بدخن ولا بتاع بنات ولا بلبس اكسسوارات ولا بربي شعرى زى شباب اليومين دول، مليش فكل ده، واجتماعى جدا جدا، لما دخلت الجامعة كان فى واحدة معايا فنفس الكلية، شوفتها تايهة كدة ومش عارفة تستلم المتايريال وطلبت اساعدها وفهمت انه كانت عايشة فى الامارات وبتنزل ع اد الدراسة وفالاجازات بترجع لأهلها، المهم ساعدتها وبعدها قالتلى انها متعرفش اي حد هنا وطلبت لو احتاجت منى حاجة اساعدها، طبعا بقينا زمايل بنحضر كل المحاضرات والسكاشن سوا، هى مكانتش فعلا تعرف حد غيرى ، مع الوقت الزمالة دى بقت صداقة قوية جدا ، يومنا كله مع بعض، معمريش كنت اتخيل انى ممكن اتعلق بحد بعد كل اللى مريت بيه، كنت فكرت ان مشاعرى ماتت، هى كانت عارفة كل حاجة عنى وعن حياتى، ورغم كدة فضلت جنبى دعمتنى ومسابتنيش وانا كنت جنبها، حبيتها حب مش طبيعى بس انا ظروفى مكانتش افضل حاجة، وفنفس الوقت انا مش بتاع لعب، صارحتها وهى قبلت وحبت ده ، بس انا اشترطت اكلم اهلها ، وفعلا هي عرفتنى عليهم وكلمتهم ، مامتها حبتنى جدا وعرفت موضوعنا ، وقتها خدت عهد على نفسي اجتهد عشان اكسبها العمر كلة، اجتهدت جدا فى دراستى كنت بطلع بتقديرات ، نزلت اتدرب فى شركات كتير معروفة جدا فى مصر، لدرجة انى اتعينت فى شركة ادوية مشهورة جدا وانا فتالتة جامعة وبجانب كل ده كنت باخد كورسات اطور بيها امكانياتى، ومع الوقت بدأت أعزز امكانياتى اكتر بشهادات دوليةوهى كانت جنبى خطوة بخطوة لحد م اتخرجنا، وبعد التخرج بفترة لقيت تعاملها اتغير جدا معايا وبقت تغيب ومتكلمنيش وترد ع الاد اوى، لما سألتها قالت مفيش حاجة، ولما ضغطت عليها عرفت ان فى حد اتقدملها والحد ده من عيلة كبيرة وقبطان بحرى وعربي اخر موديل وفيلا فى التجمع وفى الامارات، وهى وافقت وحباه، وقالتلى ان ال٥ سنين اللى عاشتهم معايا استنزفوها ومبقتش حمل العيشة على الاد دى والنهاردة معايا بكرة مش معايا، هى اتولدت مرتاحة وعاوزة تعيش مرتاحة، وبعدها مشيت وعملت بلوك مرجعتش بعده تانى، من يومها وانا حاسس انى واخد ألم على وشي صعب اوى ، قعدت كذا شهر بعانى وبعدها لقيت ان محدش هينفعنى غير نفسي، اشتغلت على نفسي اكتر، وخدت ٣ شهادات دولية معتمدين ، واشتغلت الحمد لله فكذا مكان وبفضل الله كبرت واترقيت وظروفى اتحسنت جدا، حاليا انا بشتغل لحساب مجموعة شركات متعددة الجنسياتوشغلى كله مع اجانب، وبسافر كتير برة مصر والحمد لله بقي عندى شقة ملكى انا،بس بعد كل ده ببص حواليا لقيتنى لوحدى، معادش عندى اي صحاب، خسرت كل اصحابى، حاولت ارجع اكلمهم تانى ونتقابل بس كل واحد مشغول فحياته خلاص كبرنا ، انا لوحدى تماما معنديش حد ممكن اتكلم معاه خالص، وفوق كل ده مش عارف اتجاوز علاقتى اللى فاتت اللى مر عليها ٤ سنين ، مش قادر انسي طريقة فراقنا، انا الحمد لله عايش، بس من جوايا فاضي اسف على الاطالة بس كنت محتاج فعلا اتكلم

3

5