ليه الإنسان ممكن يدخل علاقة عارف إنها مستحيل تكمل وملهاش مستقبل؟ أو يروح يحب حد عارف انه عمره ما هينفع ياخد خطوة جد ناحيته؟ أو يدي وعود كدابة يضيع بيها سنين من عمر حد غلطته الوحيدة إنه وثق في حد بيحبه؟ أو ليه أنا كبنت اسيب كل الرجالة اللي ربنا خلقهم وامسك في رقبة واحد متجوز؟ ليه مش بفكر في النتيجة؟ ليه أكون أنانية عشان مجرد مشاعر مؤقتة؟ ليه مثلاً ادخل علاقة عارفة ١٠٠٪؜ إنه نهايتها فراق؟ وليه أدخل بين الفولة وقشرتها؟ ليه أمشي فطريق عارفة مليون في المية انه مفيش باب في آخروا؟ وليه أمشي لحد بلاد وهو ما مشيش حتى نص خطوة ناحيتي؟ وليه أوهم حد بمشاعر واقعد ألمح وبعدين لما ألاقي الأحسن منه اسيبه عايش في أوهامه وامشي؟ ليه مش بنتحمل مسؤولية اختياراتنا؟ ليه ابقى في موضع يقلل من احترامي لنفسي؟ الكثير من ليه وليه وليه بجد. البشر غريبة ومش مفهومة فعلاً ومش عارفين هم عايزين ايه، بيبقى الواحد عارف انه الطريق نهايته وجع قلب وبهدلة بس برضو بتقرروا تمشوا فيه، أنا بجد بكره البشر اللي بتمشي ورا مشاعرها منغير ما تحط ميزان الصح والغلط في الحسبة بالذات لو أنا عارفة انه ممكن في طرف تاني يتأذي بسبب مشاعري اللي عايزه تتمرقع. للأسف مش دايماً بتكون وسوسة شيطان، بس احنا بنحب نعلق اخطائنا في شماعة الشيطان أو أي أعذار واهية تانية. ياريت بجد نفكر في النتيجة قبل تنفيذ القرار، وياريت نحط نفسنا مكان المفعول به قبل ما نعمل أي فعل ممكن يأثر عليه. مصيرك تدوق من نفس الكاس عامةً سواء في الدنيا أو في الآخرة، بس انت اللي بتختار عايز تدوق ايه على حسب أفعالك لأنه كما تدين تدان.

7

2