قصتي بالتفصيل أنا من محافظة الشرقية مواليد 2001 أنا طالب أزهري بدرس في الأزهر من أولى ابتدائي لحد دلوقتي وكنت بفضل الله شاطر ومتفوق جدا جدا في الدراسة لدرجة اني كنت بطلع الأول كل سنة وفي تالتة اعدادي سنة ٢٠١٦ كنت جايب بالظبط ٩٩٪ وطالع الأول على محافظة الشرقية وكنت من أوائل الجمهورية بعدها علطول زي ما أكون تعرضت للحسد وحسد من الدرجة الأولى دخلت أولى ثانوي ولسة في الترم الاول وانا طالع من الدرس ورايح درس تاني موتوسيكل جاي بسرعة رهيبة خبطني في دماغي خبطة جامدة جدا جالي في لحظتها نزيف داخلي في المخ عملت عملية مخ مفتوح وقعدت بعدها شهر كامل متواصل في المستشفى في غيبوبة بدون أي استفاقة أو أي حركة إلا بعد شهر بعد شهر فوقت من الغيبوبة بس وانا بعاني ضعف حاد جدا في الذاكرة والذكاء والتركيز خاصةً في الدراسة فمستوايا الدراسي تدهور بشكل كبير جداً لدرجة اني في تالتة ثانوي كنت جايب بالظبط ٥٤٪ وطالع الأخير على زملاتي كنت قبل الحادثة شاطر جدا في كل المواد الدراسية وأكتر مادتين كنت بحبهم وشاطر فيهم جدا هما الفيزيا والرياضيات فكان حلم حياتي اني أدخل هندسة وبالتحديد قسم مدني لاني كنت بحب القياسات والاثباتات وكان من السهل جدا اني أدخلها بس لما حصلت الحادثة مستوى ذكائي في كل المواد نِزِل خالص خاصةً في الفيزيا والرياضيات وسبحان الله زاد في مادة واحدة بس وهي الانجليزي من حيث الـ accent والـgrammer من عند ربنا كدة فدعيت ربنا ليل نهار وفي كل سجدة إني أدخل تربية إنجليزي والمعجزة ان تربية انتظام سنتها أخدت من حد أدنى ٥٠٪ بس دخلت تربية واتخصصت قسم إنجليزي شعبة عامة والمفروض أكون اتخرجت سنة ٢٠٢٢ بس لسة في تالتة السنادي للأسف اتأخرت تلات سنين ودي الرابعة بسبب ان استيعابي وتحصيلي في الدراسة بعد الحادثة بقى ضعيف جدا جدا يعني لسالي سنتين واتخرج وربنا يسهل ويبقو هما سنتين بس مش يبقو أكتر من كدة وكمان وانا في الغيبوبة وبسبب خطأ دكاترة أثر بشكل كبير جدا على أحبالي الصوتية الدكاترة ركبولي خراطيم تنفس صناعي داخلة من بوقي وواصلة لحد زوري من جوة والمفروض الصح ان الدكاترة كانو يركبولي الخراطيم من رقبتي يفتحوا فتحة في رقبتي ويركبوا الخراطيم بس كان في اعتقادهم ان أنا كلها أيام معدودة وأموت فلما سابو الخراطيم داخلة من بوقي وواصلة لحد زوري من جوة وطوال فترة الغيبوبة وهي في بوقي مش شالوها خالص زوري لَحَم ع الخراطيم فاتكونت لحمية ع الأحبال الصوتية فلما فوقت من الغيبوبة وشالو الخراطيم زوري بقى ضيق جدا بسبب اللحمية اللي اتكونت ع الأحبال الصوتية فبقيت مبقدرش أتكلم نهائيا كنت تقريبا شِبه أخرس وكان مجرى التنفس ضيق جدا فكنت بتنفس بصعوبة كبيرة فعملت 3 عمليات في الأحبال الصوتية 2 توسيع بالليزر بس مجابوش نتيجة كاملة فعملت عملية شق حنجري (استئصال أحبال صوتية) الدكتور قص الجزء اللي فيه ضيق ووصل الطرفين ببعض الحمدلله بقيت بقدر أتكلم وصوتي بقى مسموع بس لسة فيه سِنِّة ضعف فالدكتور كشف عليا بالمنظار الحنجري لقى الحبل الصوتي اليمين فيه ضعف من أثر العملية الأخيرة اللي هي الشق الحنجري فقالي هنعوز نعملك عملية حَقْن حبل صوتي فتشاور مع دكاترة زملاته ومساعدينه في قسم الأنف والأذن والحنجرة فتوصلوا ان هما لو عملولي عملية الحَقْن، مادة الحَقْن هتقفل مجرى التنفس ومش هعرف أتنفس واموت فقالو لأ النفس أهم من الكلام فعملت عشر جلسات تخاطب عن كيفية التنفس الصحيح ونُطق الحروف الهوائية والحروف الاهتزازية بس التحسُّن في صوتي كان ضئيل جدا فالدكتور قالي ان ده آخره معايا وان صوتي هيفضل على الحالة دي ومش هيتحسن أكتر من كدة آسف على الإطالة انتظروا تكملة ما أُعانيه نفسياً بسبب الحادثة لحد دلوقتي ومفيش أي دكتور عارف يفيدني كويس في حالتي النفسية وحتى اني دخلت مصحَّة نفسية قعدت فيها شهرين وبرضو مفيش أي تحسُّن في النفسية 🥹

2

2