عايز أسافر أوروبا أو أمريكا بس المؤهل وADHD معوقاني

Question

مشكلتي بإختصار: عايز أسافر وأعيش في دولة أوروبية أو ولاية أمريكية وده حلمي الأكبر ومش فارق معايا أي حاجه تانية بس أنا عندي مشكلة كبيرة وهي إن مؤهلي الدراسي مش عالي يعني أنا معايا معهد فني صناعي فوق المتوسط وحالياً شغال في مجال السلامة والصحة المهنية وخدت كورسات في المجال ده وبقالي فيه ييجي خمس سنين مثلاً بس أكتشفت إن المجال ده ممكن أشتغل فيه في دول الخليج بس لكنه مش مطلوب في الأماكن اللي عايز أعيش فيها ولا معايا صنعة ولا حرفة ولا أي حاجه تانية وعندي مشاكل في الإنتباه والتركيز والذاكرة العاملة لإن عندي ADHD فكل ديه عوائق قصاد تحقيق حلمي فهل هقدر أتخطى العوائق ديه وأحقق حلمي ولا هفضل محبوس هنا بدون إرادتي لحد ماأموت وأتقبل مصيري؟
وأتمنى محدش يقولي الحياة في مصر حلوة وكده أنا عارض مشكلتي علشان أشوف نصايح للسفر والتأقلم والعيشة هناك بشكل كويس وأضمن مستقبلي برا إلى حد ما...
وشكرا مقدما ً ♥️♥️♥️

Toast_68117 🇪🇬 · Answer

ادعي ربنا كتير 
ولحد ما يتحقق حلمك طور نفسك اكتر ف الإنجليزي لحد ما ربنا يستجاب ليك ان شاءالله لو خير ليك

Potato_70485 🇪🇬 · Answer

يعني الموضوع ممكن بمؤهلي والمشاكل اللي ذكرتها وكده؟ أصل لازم نسعى برضوا مش ندعي ربنا وهنصحى نلاقي نفسنا هناك أنا عايز حد يديني نصيحة ومش منطقي واحد إيده مقطوعة ويدعي ربنا يطلعله واحده مكانها أو واحد مش بيشتغل ويدعي فلوس تنزله من السما

Toast_68117 🇪🇬 · Answer

ثانية بس 
ومين دلوقتي الي بيشتغل بمؤهله ولا دراسته مش شايف الدنيا ماشية ازاي
ولا كمان لما تسافر برا محدش بيشتغل بشهادته خالص أنت ممكن تتعلم حاجه عكس شهادتك تماما وتبقي مصدر دخلك
زي البرمجه والحاجات دي

Potato_70485 🇪🇬 · Answer

طيب أنا الأنجلش بتاعي كويس جدا أعمل إيه؟؟

Toast_68117 🇪🇬 · Answer

أتعلم حاجه كمان تنفعك برا 
دلوقتي عل حد علمي حاجات التكنولوجيا والبرمجة والمونتاج دي شغاله حلو 
ودور كمان اي المهارات المطلوبه برا وأبدا طور نفسك فيها

Potato_70485 🇪🇬 · Answer

حاولت أتعلم برمجة للأسف وماعرفتش لإنها معقدة جداً وعايزة تركيز شديد وممكن حرف يبوظ سطر برمجي ويخلي البرنامج كله مايشتغلش فالموضوع مش مناسب أبدا معايا، إيه تاني غير دول ممكن ينفع معايا برة وأدور فين وإزاي عن المجالات المطلوبة برة ديه؟

Toast_68117 🇪🇬 · Answer

ممكن تقولي طورت نفسك ف الانجلش ازاي وعملت اي

Potato_70485 🇪🇬 · Answer

أنا من زمان كويس في الإنجلش وبحب الأنجلش كنت بدرس أنجلش صعب شوية إسمه مستوى رفيع في الأزهر غير كده بتفرج على افلام اجنبي ومسلسلات وبكلم ناس بالأنجلش من برا مصر وغيره وغيره فكل ده خلاني كويس فيه، لو هسافر هاخد كورس أربع شهور بالكتير أوي أقوي نطقي واللكنة فقط.