بصوا محتاجه أقولكوا حاجه بجد ويا تاخدوا بيها يا بعدين مترجعوش تندموا وتقولوا ياريتني زي منا عملت وف الآخر محدش هيشيل الهم غيركوا ومحدش هيتوجعلكوا حتى الأهل نفسهم لو اتوجعوا ليكوا وزعلوا علشانكوا عمرهم ما هيحسوا بنفس وجعكوا بالظبط! لازم أحكيلكوا قصتي علشان متقعوش ف نفس غلطي أنا كنت إنسانه عاديه جدًا ولطيفه ودمي خفيف وبحب الحياه بقه وجو المرح والفرح لحد امتحانات تالته ثانوي بدأ التوتر وبدأت آخد كل حاجه على أعصابي وكله بسبب المجتمع اللي مخلي تالته ثانوي العو بتاع الطلاب بعدها دخلت كليه وكليتي مليانه ضغوطات بدأت برده آخد كل حاجه على أعصابي مريت بتجارب بشعه وناس أبشع اتعرضت لمواقف بشعه لدرجة إني كنت بصرخ من كتر الوجع اللي ف قلبي فيها وكان جسمي كله بيرتعش،اتعرضت لأذى كتير أووي وخدت صدمات كتير ورا بعض بطلع من صدمه أدخل ف صدمه تانيه وده بسبب إني كنت طول حياتي معزوله عن الناس علاقاتي محدوده جدا من الدرس للبيت ومن البيت للدرس مكنتش أعرف الدنيا بره ولا كنت أعرف إن فيه ناس بشعه بالشكل ده خدت مليون صدمه ورا بعض الحزن أكل قلبي من جوه دخلت ف اكتئاب مرتين تعبت وكل ما أفوق من تعب أدخل لتعب تاني مكنتش بلحق أفوق من التعب اللي قبله أصلا لحد ما انتهى بيا الحال لكانسر وتمدد ف شرايين القلب ده غير الحاجات التانيه اللي لو فضلت أعد فيها مش هخلص وكل ده م الزعل! ده كله وأنا 21 سنه بس! قلبي اتأذى واتوجع بشكل مش عادي انتهى بيا الحال ل إن التعب النفسي يتحول لتعب جسدي و ف الآخر بقى عندي اضطراب تكيفي كل ده ف 21 سنه ! لسه المفروض أبدأ أعيش شبابي وكده وكل ده بسبب زعلي على ناس زباله عايشين حياتهم دلوقتي ولا ف بالهم كل ده بسبب إني باخد كل حاجه على أعصابي وأتوتر فادوني ب ايه الناس اللي أذوني ولا الامتحانات اللي ضغطتني ولا الكليه! قررت إني مش هتوتر ولا هحط ف بالي هذاكر اللي أقدر عليه ف كليتي وهدخل الماده وأنا مرتاحه والله نجحت يبقى الحمد لله لقدر الله منجحتش ف عملت اللي أقدر عليه ومش مضطره أتشقلب وأتعب ف نفسي وأوتر نفسي وأتعب أعصابي وخصوصًا الدكاتره موصييني إني لا أتعرض لضغط نفسي ولا لتوتر ولا لزعل علشان النفسيه أهم شيء ف حالتي أرجوكوا زعلكوا مش هيفيد بحاجه لما تتعبوا! الصحه هي أهم حاجه ولو خسرتوها ف خسرتوا كل حاجه أتمنى إنها تكون إشاره ليكوا بالله عليكوا مهما كان الموقف أو الأذى اللي اتعرضتوا ليه بالله تكملوا وتفرحوا نفسكوا أنا عمري ما كنت أتخيل إن الوجع والأذى النفسي والنفسيه اللي زي الزفت تتحول معايا لأمراض جسديه ولاضطراب تكيفي كمان ده غير المرتين اللي جالي فيهم اكتئاب أنا والله العظيم كان بييجي عليا أيام من كتر الوجع اللي ف قلبي كنت باخد منوم علشان مكنتش ببقى عايزه أكون صاحيه علشان مفكرش ومحسش بالوجع لدرجة إني كنت باخد المنوم وأنام وأصحى آخد منوم تاني علشان أكمل نوم! أنا مره نمت يومين ورا بعض لدرجة إن اللي كانوا معايا ف السكن صحوني فكروني ما! أرجوكوا صحتكوا النفسيه أهم من كل حاجه وأي حاجه أهم من ثانويه عامه وأهم من الكليه وأهم من المواقف والتجارب والناس الوحشه اهتموا بصحتكوا النفسيه وابعدوا عن أي حد مؤذي واوعوا تيجوا على نفسكوا علشان حد مهما كان وأيًا كان هو مين أرجوكوا متغلطوش غلطتي!

9

2