خايف جداً من الزواج الموضوع مرعب لو فكرت فيه بكل تفاصيله عندي رهبة شديدة من اختيار شريك الحياة وانا لوحدي انا عارف اني شايل مسؤلية نفسي وبس مهما حصل انا قادر اتصرف لكن اني فجأة اتقسم اتنين والاتنين دول بعد كدا يبقوا تلاته واربعة الموضوع مرعب لما بفكر فيه والاختيار الاختيار الاختيار مرهق ذهنياً اني خلاص بختار شخص يكون نصي التاني الموضوع محتاج توفيق ورضا من ربنا فعلاً. جايز يكون الخوف دا نابع من طفولتي ، أنا اتولدت لقيت والدي ووالدتي منفصلين ووالدتي دخلت في دوامة مع المرض بعد الحمل ومرات عمي تكفلت برضاعتي واتربيت مع عمتي فترة من طفولتي وعيشت انا ووالدي واخويا في بيت فاضي لوحدنا بدون ام لمدة اكتر من ٦ سنوات لحد ماوالدي قرر انه يتجوز علشان يكون معاه حد يساعده في تربيتنا وكبرنا وبدأت المشاكل تكبر معانا . جايز أكون هنا مش علشان فكرة اني بدور علي عروسة وعايز اتجوز علي طول والموضوع ينتهي . انا هنا بدور علي اللي هتكون أهلي وأمي وأختي وصديقتي وحبيبتي وزوجتي بدور علي اللي عندها فيض مشاعر تقدر تغرقني فيه بدور علي اللي فاهمه كويس يعني ايه طفل اتولدت محروم من امه واحتياجه الشديد للعاطفه والاهتمام انا حقيقي عندي شعور بالوحدة وأهلي من الطرفين بعيد عني طبعاً عيلة الام بسبب مشاكل الانفصال وعيلة الاب بسبب مشاكل الورث دا غير بعد الاخوات وسوء التفاهم بنا العمر بدأ يجري بيا وبدأت أكبر ورغم كل الخبرات اللي اكتسبتها وكل التجارب اللي مريت بيها ورغم النضج الكافي اللي وصلت ليه إلا إني مازلت اشعر بالاحتياج للحنان .

13

8