اللي هكتبه دا مش محتاج نصيحة قد ماهو محتاج دعوة من القلب زي مابقالي كام شهر بصيح هنا وناس كتير نصحتني في حاجات وناس كتير دعتلي وناس كتير حاولت انصحهم على قد ماقدر وكل دا وماحدش فينا يعرف حد… النهاردة حصل مشكلة وقفت عندها حبة عشان حسيت انها الرسالة اللي ربنا بعتهالي عشان اتعلم ازاي اسيب كله حاجة لربنا. الرقم اللي بتواصل بيه حرفيا في كل حاجة تخص شغلي فجأة خرج من الواتساب والاكونت مش عارف ادخل عليه والخط حد اشتراه ومش عارف اتواصل معاه وتقريبا مقضي جزء كبير جدا من اليوم مش عارف احل الموضوع ومش هقدر اوصل لأغلب شغلي من غيره لأن كل حاجة كانت عليه.. هحاول مرة اخيرة بكرة يمكن ربنا يوفقني فيها واقدر اوصل لحل فادعيلي من فضلك.. المهم وقفت كدا مع نفسي لحظة وقولت هو ليه أقاوم كتير من غير ماستسلم كدا لربنا واسيبه يحللي كل حاجة يعني ليه ماتعلمش to let go وابقا عارف ان دايما ربنا كاتب الخير. يعني لازم اتعلم أ let go لصاحبي اللي نعرف بعض من ٢٠ سنة لكنه قرر مايعملش حساب للعشرة ويتصرف غلط. طب م انا عملت اللي عليا .. ليه افضل ماسك انا لواحدي. ليه ماتعلمش أ let go للبنت اللي حبيتها ٣ سنين لكن ربنا كتب ان كل واحد فينا يكون من نصيب شخص تاني طلاما انا عملت اللي اقدر عليه عشان نكون من نصيب بعض لكن ربنا اراد غير كدا ونعرف نسيب دا ورانا ونبدأ حياة جديدة مع حد ربنا هيبعتهولنا في الوقت المناسب بس مانستعجلش.. ليه ماتعلمش أتخلى عن عادات وحشة بعملها زي التدخين مثلا اللي وصلت فيه مؤخرا بسبب الضغوطات لمرحلة اني مش باخد بالي من اني بقالي ساعات بدخن باستمرار مش بوقف غير لما احس اني نفسي اتقطع ومش قادر اتنفس.. ساعتها باخد بالي اني رايح في اتجاه غلط. ليه ماقدرش أ let go لهموم الشغل واسيبها لتدابير ربنا ويمكن اصحى الصبح ألاقي ربنا حلها من عنده بحاجات عمرها ماكانت تيجي ع بالي لو قعدت ١٠٠ سنة أفكر وأحسب. ليه ماتعلمش الجزء المهم في التخلي.. في مقولة حلوة اوي بتقول (في التخلي تجلي) فسرها براحتك واوزنها ع اي حاجة زي ماتحب لكن هتوصل في النهاية لنقطة لازم تعرف بعدها امتا تسيب.. لو فضلنا ماسكين في احبال بتتسحب من ادينا بقوة مش هيحصل حاجة غير اننا هنتعور.. فنعرف امتا نسيب وهنرتاح. نعرف امتى نرمي ورا ضهرنا ونكمل في حياتنا وربنا يدبرهالنا بحكمته ونسيبها عليه.. ادعيلي ربنا يهديني ويهدي قلبي..

8

0