انا شخص اجتماعي جدا و الحمد لله اصحابي كانو كتير اوي و علاقتنا مع بعض اكتر من اصحاب و اخوات...لكن لما بطلت المخدرات بدل ما اموت مكنش قدامي اختيار غير اني ابعد عن كل اصحابي بلا استثناء او ارجع اضرب تاني و احاسب على الفاتورة كاملة و مين عارف اذا كان فيه فرص تاني او لا ...المهم في لحظة ادراك كدا اكتشفت اني ما شاء الله علاقاتي كلها ناس بتاخد مخدرات منهم الكويس و الوحش و اللي ساعدني و اللي ساعدته و كل ما تتخيله...لكن تيجي تقولي سيب كل ده ورا ضهرك و اكسب ناس جديدة لان رجوعك لمصدر حساسيتك تاني هيرجعك تضرب تاني....مكنش عندي اختيارات و كنت مستاء جدا لكن الحمد لله ربنا عوضني بناس مكنتش احلم اني اعرفهم ....احيانا لما بشوف اصحابي صدفة و بتجاهلهم بحس بحنين كدا و بتخيل نفسي وسطهم بس بفكر نفسي بالدوامة و اني مختلف و ان ضربي ممكن يموتني ف اي لحظة و فهمت ان حياتي اهم من اي اعتبارات تانية و ربنا مش هياخد منك حاجة الا و تاكد انه هيرجعلك احسن منها....حتى اخر فتره ف الضرب كنت بحب بنت جدا و بنيت احلامي كلها و احنا مع بعض و وعدتها اني ابطل مخدرات و مامتها مش بتحب السجاير قولتلها حاضر هحاول ابطلها بردو و لما نفذت وعدي بفضل من ربنا هي سابتني🫡لكن النهاردة مبسوط بده لانها بردو كانت من ضمن العوامل اللي ساعدتني اخد القرار و كمان عرفت عنها اخبار الفتره دي بحمد ربنا اننا مش بعض دلوقتي و رجعت كلمتني تاني و انا هربت بشياكه...ليا ٣ اخوات علاقتي بيهم مكانتش احسن حاجة لكن لما غرقت هما اللي ساعدوني اطلع و علاقتنا النهاردة مترابطة جدا جدا جدا و طبعا ابويا و امي اللي مسابونيش لحظة مساعدونيش فيها حزين اني فقدت والدي و انا ٨ شهور تبطيل اه ملحقش يفرح بيا لكنه الحمد لله اتطمن اني كويس و انا مازلت مش مقتنع انه مبقاش موجود لكن بدعيله كل يوم و بطمنه ابنك مكمل يا بابا و هيعمل اللي يقدر عليه عشان يفضل كويس مش كنت كل يوم بتصبحني بكلمة (ربنا يكرمك يا ابني و يوفقك) انا يا بابا ربنا كرمني و بطلني و كمان شغلني متقلقش دعائك ليا وصل بفضل الله ثم فضلكم عليا وليس مجهود مني انا هعمل اي حاجة اقدر عليها في مقابل اني اساعد اي حد مر بظروفي...طولت عليكم اعذروني بس جوايا طاقة متفجرة كتيرة 🙏😅....اللي عايز اقولو ان الامل ديما موجود و التغيير مش شئ مستحيل و انك تفهم نفسك متاخر مش مشكلة المهم انك فهمت و انت تبطل تصب احكام على نفسك قبل الناس ده هيحصل مع الوقت و وعيك هيكبر يوم بعد يوم...و انك تتعلم تقول لدماغك لا ده يمكن من اصعب الحجات اللي اتعلمتها في حياتي لاني ديما كنت فاكر دماغي دي الجوهرة الثمينة لكن اكتشفت انها دماغ تعبانة كانت محتاجة اعادة ترميم و مش بتجبلي غير اصوات كلها سلبية فكنت محتاج اسمع كلام من ناس برايا توجهني صح و تكون مرت بنفس ازمتي و يسلفوني ثقتي في نفسي لحد ما صدقت في نفسي و وثقت فيا و وقفت تاني على رجلي عملو معايا كل ده بدون مقابل مجرد بس عاوزين يشوفو احمد كويس....يلاهوي بجد يا جماعة مش عاوزين مني حاجة ازاي طيب😅...مش هقدر اوصف معنى الامتنان لربنا و لاهلي و للناس اللي دخلت حياتي مؤخرا كانت سبب في تغيير حياتي للابد جزاكم الله خيرا عني و مش ناسي ابدا فضلكم عليا بجد ممتن ❤️

11

2