بكره أمي ومخاصمتها 3 شهور وحاسس اني جبت أخرِي

Question

انا وصلت ل مرحله اني بقيت بكره والدتي والله حاليا مخاصمها بقالي تقريبا 3 شهور عايشين ف نفس البيت و مش بطيق اكلمه علطول ظنا فيا ظن وحش وانا معملتش حاجه غير كدا 100 مره تفتش التليفون و مش بتلاقي حاجه و بقول عادي دي امي ف فمره انا بكلم صحابي براحتي زي اي صحاب راحت واخده الموبايل و مسكت الشات من اولها ل اخرها لقتني كاتب شتيمه تروح تزعقلي و مش عارف اي و تعمل موال وانا كل ده ساكت فالخر قلتلها حاضر انا اسف قامت قايلالي انت بتهاودني و متكلمنيش تاني فاللحظه دي انا حسيت اني جبت اخري اقسم بالله و فكرت كذا مره فالانتحار لحد ما فالاخر قلت مش هكلمها تاني

Coffee_27700 🇪🇬 · Accepted Answer

والدتك طريقتها غلط هي بتعبر عن خوفها عليك بأسلوب غلط للأسف. بس إحنا مطالبين إننا نبرهم وفي نفس الوقت متسمحش أنهم يؤذوك.

Cookies_31568 🇪🇬 · Answer

هتقابل شخصيات كتير صعبه لازم تتعلم طريقه التعامل الصح مع كل شخصبه و هي وضعها ايه ف حياتك 
دي مهاره كبيره اوى ومهمه اوى اوى 
افضل جرب كذا طريقه تتعامل بيها معاها لحد ما تتعلم الصح لكن القطيعه غلط طبعا كفايه انها هروب و اكيد حرام و فكرة الانتحار انت كده بتهرب طيب ده لسه ف الشغل و ف كل مكان هتقابل شخصيات صعبه اوى اوى هتعمل ايه معاهم هتقولهم مش مكمل و مخاصمكو؟

Coffee_31604 🇪🇬 · Answer

نصيحه من اخ راضى امك وشوف اللى يراضيها واعمله حتا لو هتيجى على نفسك بس معلش وبراحه عرفها ان فى كذا وكذا بيزعلوك انها تتفادا كده والله مش هتحس بيها والكلام ده غير بعد الشر لما تروح منك هتندم يصحبى والندم وحش جدا

Potato_31422 🇾🇪 · Answer

حسيت من كلامك إن أمك مجروحة من شخص في حياتها عشان كذا تعكس الشك فيك، حاول تصاحبها وتبرها بين لها إنك تحبها وأنها رقم ١ بالنسبة لك صح الكلام صعب لكن حاول بالآخر هي أمك قد تكون تربت بطريقة ما تقدر توصل لك حبها لك بس أكيد تحبك وهذا باين من تصرفاتها. وبعدين ارجع وضح لها حدودك الشخصية مثلا ما ينفع تفتشي تلفوني إلخ

Cookies_31624 🇪🇬 · Answer

طب اعمل اي عشان اخليها تحبني و فنفس الوقت متظنش فيا غلط

Mango_31643 🇪🇬 · Answer

متضيعش الجنة ي صاحبى امك باحبك بجد وان كانت طريقتها فى تعبير المشكلة غلط بس صدقنى مفيش امك تكره ابنها الا اذا كانت والعياذ بالله مجنونة

Cookies_31624 🇪🇬 · Answer

طيب اعمل اي انا كل مره بتئذي و بصالحها المرادي حاسس اني مش قادر اقولها اسف بحس اني مرتاح كدا و كل ماجي اصالحها بحس في حاجه مانعاني

Potato_31422 🇾🇪 · Answer

إقرأ كتاب أبي الذي أكره وتابع البودكاست حق الكاتب على برنامج بودكاست فنجان في قناة ثمانية.

Marshmallow_31578 🇪🇬 · Answer

مفيش حل غير انك تصبر عليها وتحط في دماغك انه ياترى ايه الدافع من الشك الغريب ده، اكيد انها خايفة عليك وعايزاك تبقى كويس وماشي صح اينعم هي طريقتها غلط بس احنا بنبص للنية قبل الفعل
وراضي ربنا فيها ❤

Cookies_31624 🇪🇬 · Answer

كلامك جميل جدا بس انا هروح اكلمها مش هتتقبل كلامي خالص انا من وانا صغير ل حد دلوقتي معرفتش اتناقش معاها كل مره بطلع الغلطان حتى لو النقاش ف حاجه تافهه

Cookies_31568 🇪🇬 · Answer

مقولتش صالحها اتعامل معاها بالاسلوب و الطريقه المناسبه انت ادرى بيها مقولتش تتاسف انت كده بتقطم الحوار لكن ممكن متخليش في حوار اصلا من الاول 
م الاخر افضل حاول لحد ما تلاقي طريقه مناسبه للتعامل معاها

Orange_31379 🇪🇬 · Answer

فاهم شعورك وعارف ان هي مقيداك شوي بس والله من خوفها عليك اتمني أمي تهتم الاهتمام دا بيا وتعدل عليا لو بعمل حاجه غلط والله ناس كتيره تتمني ان بس تسمع كلمه من أمه بعد ما فقدها وانت مخصامها لأسباب غير منطقية صالح امك وقرب منها وحبها والله لن تعرف قيمتها وقيمة الي بتعمله علشانك غير بعد الشر ما تفتقدها

Potato_31422 🇾🇪 · Answer

عندنا مثل يقول الكلمة الطيبة تكسر العود اليابس
ممكن تمر طبيعي من جنبها تبوس راسها تحضنها تقول لها ربنا يحفظك يا أمي، ما أعرف كيف كانت بتكون الدنيا بدونك، قل لها تدعي لك جيب لها حاجة مخصصة لها هي، حاول تكسب قلبها