موضوع:

كلام عمرك ما توقعت ان هيجي يوم وتبوح بية ..!

عمري ما كنت اتخيل اني هاجي في يوم و اتكلم عن ازمه كانت بتحصللي من وقت ما كنت لسه صغيره مش فاهمه حاجه... و اعيط بالطريقة دي... في يوم بالليل كنت انا و اختي و امي بنتكلم عادي و بنضحك و كله تمام مش عارفه ازاي دخل كلامنا في موضوع وصلني اني اقول اني حاسه اني مش مقبوله وسط المجتمع اللي انا فيه... (ملحوظه بس.. مؤخرا من فتره مش بعيده ثورت علي اي حاجه تمنعني اعبر عن نفسي.. مؤخرا بدأت افهم نفسي صح.. و اني من حقي اتكلم و اعيط و اضحك.. مؤخرا ادركت انه مينفعش يبقي ليا نقاط ضعف.. علشان كداا و من اول ما ادركت الموضوع ده و انا معنديش اسرار اصلا... حرفيا معنديش اسرار.. و بالتالي مافيش اي نقاط ضعف) المهم... قولت وقتها اني حاسه اني مش مقبوله وسط المجتمع اللي عايشه فيه تلقائي عينيا دمعت لوحدها.. حسيت في كلام كان من وقت ابتدائي محشور جوايا و اخيرا بيتسرب اهوو...مسحت الدموع دي و كنت بحسبها اخر الموضوع...لحد ما سألوني.. معرفتش اتكلم... حرفيا معرفتش اتكلم... حسيت اني انفجرت.. مكنتش متخيله اني ممكن ابقي في الموقف ده بالشكل ده دموع جسمي بقا يرتعش باخد نفسي بالعافيه صوت غريب طلع من حنجرتي بشكل متتالي لوحده مع العياط.. صوت مسمعتوش الا وقت ما كنت لسه صغيره بخلع سناني و بعيط.. قولتلهم بحس اني مش مقبوله عشان...عشان...عشان...و فضلت اكرر عشان دي كتير من بين ارتعاش جسمي و شهقات بتطلع.. بالعافيه قدرت اوضحلهم انه شكلي... هو الازمه الناس اهلي الوسط اللي اتربيت فيه لحد ما كبرت تنمر شكل سناني.. طولي.. وزني لما الاقي من اهلي و انا صغيره كداا.. اهلي اللي هم درع حمايتي و الارض اللي بقف عليها.. يبقي الباقي هيعمل فيا ايه؟ سببلي حاجات كتير في شخصيتي بعضها اتخلصت منه و بعضها لسه موجود بس عمري م كنت اتخيل ان نقاش عادي و بضحك فيه... يتحول ل انفجار و جرح اتقفل من زمان من غير ما يتطهر... ادي ل كارثه اللي عاش حاجه زي كدااا هيفهمني... و اللي مجربش ف اتمني متجربش خالص احساس انك منبوذ من وسط اقرب الناس ليك احساس انهم شيفينك وحش اقل او متستاهلش..

0

0