بص بقى، أنا بجد مش فاهم إزاي في ناس بتتعامل بغباء كده، ومستنية الناس تبَرّها وتحطها فوق دماغها! يعني بجد؟! عملتوا إيه عشان تستحقوا ده؟ ربطتوهم؟! الناس كلها بتربّي، ومحدش قالكوا شكراً، لأن التربية مش مَنة، ده الطبيعي. أنتم ما عملتوش المستحيل، وفي ناس عملت أكتر منكم مليون مرة، ومتكلمتش، ولا استنت رد الجميل. ولو في ناس مش معاها فلوس، عادي! الفلوس بتتعوض. الفلوس بتيجي وتروح، وممكن البني آدم يجيبها بأي طريقة، حلال أو حرام، دي حاجة بينه وبين ربنا، وهو اللي هيحاسبه. لكن فيه حاجة أهم من الفلوس بمليون مرة: المعاملة. المعاملة هي اللي بتخلي الناس تحبك أو تكرهك، ترجعلك أو تلعن اليوم اللي عرفتك فيه. صدقني، ملعون أبو الفلوس لو فاكر إنك هتمسك عيالك بيها! لو متخيل إنك تقدر تتحكم فيهم وتربطهم بيك عن طريق الفلوس، تبقى غبي… أيوه، غبي! لأنك كده مش فاهم ولا حاسس. الشخص اللي بيدي بس فلوس، وهو فاكر إنه كده بيعمل اللي عليه، ده إنسان فاقد للوعي. الموضوع مش فلوس وبس… الموضوع مشاعر، احترام، وجود حقيقي. نصيحة مني: ما تعتبرش نفسك بنك فلوس… اعتبر نفسك بنك مشاعر. لأن ده الرصيد الوحيد اللي مش هيخلص بينك وبين ولادك أو اللي حواليك. افهم، كل حاجة في الدنيا ممكن تتعوض، بس الرصيد اللي بينك وبين الناس هو اللي لو خلص… مستحيل يرجع. وأنت اللي بتبني الرصيد ده، مش هم. فـ صلح علاقتك بيهم قبل ما ينتهي ، وقبل ما يخلص رصيدك عندهم. عشان ما يبقاش اسمك مرتبط بيهم بس في البطاقة، ويبقوا شايلينك غصب عنهم، مش حبًا فيك.

4

3