دايما بقع في غلطة الحاجات اللي لما أتعود على وجودها في حياتي وتختفي مرة واحدة بتسيب فراغ مخيف جوايا.. كل أما أحاول أشغل الفراغ دا بأي حاجة بفشل.. بجرب كل حاجة وبشغل نفسي بكل حاجة.. طب الحاجات دي جماد بعرف أعالج الموضوع.. لكن لو بشر؟؟ لو اللي اتعودت عليه في حياتي دا إنسان كل يوم نتكلم ونحكي ونرغي ونتخانق ونتصالح ونفرح ونزعل ونحلم سوا طول الوقت.. بنملا مكانه بإيه؟ إنسان زيه؟ أشخاص جداد؟ أصحاب أكتر؟ المفروض أعوض الفراغ دا بإيه؟ دي حاجة بتأثر جدًا على نفسيتي مهما كنت قوي وقادر أقف على رجلي وأنصح غيري بحاجات أنا مش قادر أعمل بيها برغم ان مافيش مفر منها لكني بيني وبين نفسي عارف إني واقع تحت القاع بشوية.. إنتاجيتي في الشغل أقل بكتير.. تطوري في حياتي بقا منعدم.. ثقتي في الناس بقت صفر.. كل مرة بقع في الفخ دا.. بقت حاجة تزهق وتقرف والله.. بعاتب نفسي ع الثقة اللي بديها لحد ويخونها برغم إنها مش غلطتي بل هيا غلطته إنه خان أو غدر.. بلوم نفسي ع الفرص اللي بديها للناس وهما بيضيعوها ويستهتروا بيها كأن في غيرها مليون فرصة.. قليلين أوي الناس اللي بتراعي مشاعر بعض وعارفين إن الثقة ممكن تختفي في غمضة عين وتتبدل بكسرة وإنعدام أمان.. قليلين الناس اللي بتشوف بقلوبها قبل عنيها.. يابخت اللي بيلاقي دا في اللي بيحبه.. اللي بيلاقي الإنسان اللي معاه يقدره ويقدر حبه ومايستهونش بمشاعره ولا يستهتر بعمره.. عندي أمل في ربنا كبير إن يبعتلي الشخص دا يعوضني عن كل حاجة فاتت وينسيني كل حاجة عشتها.. عايز أفضل أرغي كتير والله لكن مش لاقي طاقة عندي.. مستنفذ بشكل مش طبيعي.. ممكن تدعيلي..

7

15