الفراغ.. إيه اللي ممكن يملا الفراغ؟ بقالي فترة طويلة مش مبسوط، مش قادر أحدد من امتى، بس دلوقت قادر أتخيل إني طول عمري كدا، أو زي ما ماما بتقولي إني من وأنا طفل لو نزلنا اشترينا لعبة كان نفسك فيها، مابتكملش يوم وتقول ياريتني كنت جبت اللعبة التانية علشان زهقت من دي الفترة اللي فاتت كانت فترة نجاحات وتحقيق أحلام طفولة عمري ما كنت هتخيل إني أوصلها، خصوصا على المستوى المادي، دايما لما كان بتحصل حاجة زي دي بكون مبسوط شوية فترتها وبعدين برجع تاني مابحسش ان فيه حاجة اتغيرت، المفاجئ أكتر إني وقت تحقيق النجاح الكبير الفترة اللي فاتت دي ماكنتش مبسوط أصلا، ولا حتى الانبساط اللحظي والمؤقت اللي بيكون عامل زي النشوة دا وبفكر إن سبب دا ممكن يكون فراغ ماتعالجش ومابيتملاش بالحاجة اللي هو عايزها فعلا، يمكن فراغ عاطفي؟ ممكن، بس الأكيد واللي كان حزين بالنسبة لي بزيادة الفترة اللي فاتت إني اكتشفت إني من كتر اللعب، العلاقات المؤقتة اللي مابيربطهاش التزامات لكن مابتاخدش منها غير الحلو والممتع - بيسموا دا fwb؟ - ماعدش عندي القدرة إني أعمل رابطة حقيقية مع حد، ناهيك إن النموذج اللي في دماغك مش موجود، ولو موجود اتاخد، ولو اتوجد بتكتشف إنك في فترة ماعندكش فيها رغبة إنك تحس فيها بالتزام ومسئولية ناحية حد، هل دا معناه إني عمري ما هكبر؟ الأسئلة عندي الفترة دي أكتر من الأجوبة، بس الأكيد برغم اني حققت الصورة اللي كنت راسمها لنفسي دلوقت في الطفولة، إلا اني اكتشفت إن دا مش كافي إنه يخليني مبسوط، بالعكس، الفراغ بيوسع، الغضب بيزيد، ومافيش سبيل لتفريغه، لأن الغضب بقى زايد عن اللي ممكن استخدمه في أنشطتي اليومية كمحفز، لأ، هو غضب ماينفعش يخرج غير على شكل نباح، نباح حقيقي، السخرية ماعدتش حتى مشبعة

0

3