١ شعور ان حد توفى وحشك أوحش شعور في الدنيا لأن أي فرصة للتواصل من تاني انتهت حسيت بدا قبل وفاته مع تلت سنين من وقت ما الألزهايمر خلاه زومبي متحرك وكل الإشارات اللي كنت أعرفه من خلالها انتهت ماكانش فيه فرصة لوداع مع شخص ماعدش فاكر في أيامه الأخيرة أنا مين لأنه نسي حتى نفسه دي من الحاجات اللي هتفضل عايشة معايا طول حياتي، جرح جديد من جروح الروح وقلب اتكسر مافيش حاجى هتصلحه، وشعور عام بعدم أهمية أي حاجة أو أي إنجاز لو المصير انك هتنسى كل دا ماعدش فيه حاجة لها معنى ٢ أسوء حاجة في كل دا إنك برضه مضطر تتعامل مع تبعات أحداث مش انت السبب فيها ونتايج قرارات ناس تانية، لكن في النهاية بتفضل مشكلتك وانت اللي مضطر تتعامل معاها، ANOTHER INNER SCAR ٣ حاجة تانية، أنا كنت دايما بستغرب الناس اللي بتبقى عندها حالات وفاة وتقعد معايا تتكلم إنها فاكرة مين اللي وقف جنبها ومين ماوقفش، وبقول إزاي بياخدوا بالهم مع حالة الحزن المسيطرة وآلام الفقد، بس خمن إيه اللي حصل؟ دلوقت أنا فاكر كل حد كان مهتم يبقى أول حد جنبي ويتصور معايا في أي إنجاز أو وقت فرح ويهتم ينزل الصور والتهنئات في كل حتة، والكام حد اللي استحملني في وقت الكآبة وكانوا مهتمين بيا وبيطمنوا عليا كل شوية، الـ cliche طلع حقيقي، اللي بيفضلوا حواليك قليلين

4

2