انا في تالتة ثانوي وفيه ولد بيكراش عليا الموضوع بدايته سنة اولى انا وهو كنا في كذا درس سوا وكده ف اكيد بيجمعنا جروبات واتس ف سهل نوصل لارقام بعض لان المجموعة مش بتبقى كبيرة اوي ف كل رقم معروف بتاع مين وغير كده انا ادمن جروب الامجليزي وبحكم اني الادمن ف انا مسجلة ارقام كل زمايلي بنات وشباب عشان اضيفهم وهو اكيد منهم ف في مرة بعتلي بيسأل على معاد امتحان معاد حصة على بداية حجز السناتر وانا كنت برد عادي وبجاوبه بنية تقديم مساعدة لحد وده العادي بتاعي انا لو في ايدي اساعد حد مش بتأخر وغير كده اننا ك طلاب نسأل بعض اسهل من التواصل مع المدرسين لانهم بيردوا بعدها بأيام ده لو ردوا المهم كان الكلام قليل جدا مرة او اتنين في الشهر مثلا وكان متمحور حول الدراسة والدروس وكده بعدها بقى بدأ يتكلم ايام امتحانات اولى كأننا صحاب ويسألني عملتي ايه في الامتحان ومسألتيش عليا عملت ايه ده كله كان رسايل ورا بعض ف انا حطيتله حد وقلتله ان الكلام ما بينا بدون ضرورة حرام ومتبعتش تاني افتكرته تفهم الامر لانه قالي ماشي واعتذر وده كله كان في اولى جينا بقى في سنة تانيه والدي عمل عملية قلب مفتوح ف نزلت ستوري بطلب فيها الدعاء وهو بعتلي ودعاله وقالي ربنا يصبركوا واني مخافش عليه وكده يعني وانا شكرته المهم بعدها بدأ بقى يفتح كلام تاتي ف انا كنت بأخر الرد وبرد ردود مختصرة جدا عشان افهمه بطريقة مبطنه انه ميبعتش بس هو كان مستمر ف للمرة التانية قلتله ميبعتش تاني عشان حرام بردو وفكرته بكلامي اللي فات عشان يحس على دمه قالي بصراحة انا معجب بيكي قلتله ايوه يعني عايز ايه قالي اللي تقوليه انا هعمله قلتله متبعتش تاني قالي حاضر وبالفعل من يومها لغاية دلوقتي مبعتش بس اكتشفت بالصدفة من واحدة صاحبتي مقربة كانت على تواصل مع صاحبه (طبعا بعد ما اكتشفت انها بتكلمه عرفتها ان ده غلط ومينفعش وهي الحمدلله دلوقتي مش بتكلمه خالص) انه بيكلمه عليا وبيقوله انه عايز يجيبلي هدية في عيد ميلادي انا اكيد طبعا مش هقبل الهدية ومستحيل آخدها بس انا عايزه آخد رد فعل يوقفه عند حده وميفكرش يقرب تاني عشان بجد مش ناقصة ذنوب وانا مش معصومة من الخطأ وانا كلمته بالذوق مرتين وهو بردو مكمل انا عيد ميلادي لسه في اتنين بس انا شايله هم الموضوع من دلوقتي لاني مش عارفه ايه رد الفعل المناسب اللي ممكن آخده ف المفروض اعمل ايه؟ وارجو الاجابات تكون بأدب واسفه طولت عليكم

8

7