مشكلتي إني حاسه إني متدمره من كل الجوانب

Question

مشكلتي اني
حاسه اني متدمره من كل الجوانب! 
علاقتي بربنا اتدمرت و مش عارفه ارجعها 
اهلي كل يوم ببعد عنهم عن اليوم اللى قبله
مش بذاكر 
مش بعمل حاجه غير اني نايمه و ماسكه الموبيل 
بيجيني شعور سيء اخر كل يوم 
طيب انا لو مت؟ 
الامتحانات على الابواب وانا مش عارفه حاجه فى المنهج نفسي ارجع زي ما انا 
حتا ثقتي بنفسي تدمرت 
انا ايه لزمتي فى الحياة

Marshmallow_50156 🇪🇬 · Accepted Answer

بصي يا حبيبتي انا مريت بتجربة مشابهة وانا صغيرة
وعايزة اقولك اني حاليا و الحمد لله اتحسنت كتييير
وكل دا بدأ لما ربنا ألهمني ارجع له.. لقيتني فجأة في عز ضغطي واكتئابي ساجدة.. موقفتش اصلي لأن غالبا كنت نسيت بقول ايه في الصلاة من كتر ما كنت بعيدة عن ربنا للأسف.. بس لقيتني ساجدة فجأة وبعيط بحرقة.. بقول لربنا انا عايزة ارجع انا تايهة.. بشتكي لربنا العالم والناس واللي عملوه فيا وبشتكي له نفسي شخصيًا..(١)

Avocado_49351 🇪🇬 · Answer

انتي كليه اي

Marshmallow_50156 🇪🇬 · Answer

مش هقولك اني بين ليلة وضحاها لقيت حالي اتعدل وكل مشاكلي اتحلت ورجعت كويسة.. انا بس بعد السجدة دي حسيت اني زحت هم كبيييييير اوي من على صدري واكتافي بجد.. وبقيت بحاول اني ارجع اصلي على قد ما بقدر واقرأ قرآن شوية وشوية.. مستوايا في الدراسة كان ما زال بيقع بعد ما كنت شاطرة جداا بس مقدرتش ارجع بسهولة لأني كنت متدمرة نفسيا.. بس المهم هنا والأولوية هي حالتك النفسية وعلاقتك بربنا، أول ما دول يبتدوا..(٢)

Marshmallow_50156 🇪🇬 · Answer

يبتدوا يتحسنوا هتلاقي بقية جوانب حياتك تلقائيًا بتتحسن بالتدريج.. وركزي مع كلمة "بالتدريج" دي.
انا الحمد لله وضعي بقى أفضل لأني كنت مؤمنة من جوايا ان التدمير والخراب اللي حصلي عمره ما هيتغير بسهولة ف كنت سايباها كلها لله وبسعى بس اني ابقى كويسة، يعني عارفة مجرد النية بس؟ مجرد النية والله انك عايزة تتحسني ربنا شايفها وبيساعدك بسببها 💜
ف ركزي في الجزء دا بس في الوقت الحالي، وهو انك تبقي...(٣)

Marshmallow_50156 🇪🇬 · Answer

انك تبقي نفسيًا أحسن عن طريق اجتهادك في تحسين علاقتك مع ربنا.. ما تضغطيش على نفسك كتير ما تفكريش كتير وما تحاوليش تبقي خارقة وتعملي كل حاجة بطريقة صح وتعملي كل العبادات طول الوقت عشان ما ترهقيش نفسك وتستصعبي الأمر.. بالهداوة خالص وعاملي نفسك انها طفل صغير والله.. سيدنا محمد عليه الصلاة والسلام قال: "أحب الأعمال إلى الله أدوَمُها وإن قَلّ"، يعني المهم تكوني بتداومي على الشيء حتى لو بمعدل صغنن خالص..(٤)

Marshmallow_50156 🇪🇬 · Answer

واحدة واحدة هتلاقيكي ابتديتي تكوني أفضل شوية بإذن الله، وعايزة اقولك على حل سحري كدا اكتشفته وقتها وحبيته أوي أوي لأنه حسسني اني مش وحيدة كنت بعيدة عن اهلي ومش بكلم حد ف لما بقيت اعمل الحاجة دي بقيت احس إن انا مسنودة وانا مسموعة وانا مهمة.. ايه هي الحاجة دي؟
كنت في كل حاجة عبيطة عاوزاها بطلبها من ربنا!
بجد مهما كانت صغيرة وعادية وعبيطة، اطلبي من ربنا ومن جواكي واثقة انه هيستجيب! (٥)

Marshmallow_50156 🇪🇬 · Answer

ده ساعدني اوي اني احس اكتر بقرب ربنا بجد
بلاقي ربنا طول يومي بيساعدني وسامعني!
نازلة الدرس متأخر؟ يارب ابعت لي مواصلة من عندك يارب
جاية البيت مخنوقة ومش عايزة حد يكلمك؟ يارب ما يطلبوا مني حاجة يارب ما حد يناديلي لحد ما ارتاح شوية
بتبصي في الكتاب مش فاهمة حاجة؟ يارب ارزقني الفهم يارب ساعدني اذاكر يارب يارب..
خلي ربنا دايما جزء من كل شيء بتعمليه هتحسي انك متحاوطة بالأمان كدا وبقربه ليكي..(٦)

Marshmallow_50156 🇪🇬 · Answer

واحدة واحدة يا جميلة هتلاقي العبادات خفيفة على نفسك بل هتلاقيكي مُقبلة على الصلاة والقرآن والصيام وغيرهم من العبادات..
المهم ما تفكريش كتير وتشيلي هم جوانب حياتك الباقية زي ان ادائك في الدراسة يتحسن او انك ترجعي علاقتك بأهلك.. انوي بس انك تحسني علاقتك بربنا ووقت ما نفسيتك تبتدي تتحسن شوية هتلاقيكي تلقائي كده بقى عندك مساحة تعافري في جانب تاني زي الدراسة مثلا
"استعن بالله ولا تعجز" 💪🏻💜

Marshmallow_50156 🇪🇬 · Answer

وانا موجودة لو حبيتي تسألي في أي شيء أو احتجتي أي مساعدة أو حتى لمجرد إنك تطمنيني الوضع معاكي ايه هحب دا جدًا 💜 ربنا يسعد قلبك ويفرج همك وترجعي أحسن من الأول يا حبيبتي 🌸

Watermelon_32587 🇶🇦 · Answer

ردك جمييييل شكرااا على مشاركة تجربتك👏

Apple_49465 🇪🇬 · Answer

عندي كل كويس