يا جماعة الخير السلام عليكم انا شاب 32 سنه ومتزوج وعندي طفلة زوجتي بنت ناس طيبين ومتربيه وبنت حلال وأمينه. بعد ما انتهت متعت اول ٣ أو ٤ شهور وانا قلبي بعيد جدا عنها ومشاعري وحاسس بجفاف رهيب يكاد أن يقتلني وبقالي ٣ سنين في الجفاف دا لا بتعرف تونسني ولا تشاغلني ولا تفتح معايا مواضيع ولو انا حتي فتحت موضوع ما بتعرفش تجاريني أو ترد عليا ما بتعرفش تغازل أو تدلع أو تنكش أو تفكر معايا لو أمر مهم ولا بتعرف تواسيني لو غضبان أو تاخد بأيدي. دماغها صغيره وفاضيه وعقليتها وثقافتها اقل بكتير جدا جدا من مستوي اي حد عادي علي الرغم من كبر سنها ٢٩ سنه يعني ابسط الأمور خالص مش فاهماها سواء دينيا أو علميا أو اجتماعيا انا مش بتكلم في عيوبها ولا عيوبي علشان لو الواحد فتش في نفسه هيلاقي كتير فيا أو فيها أو أي بني ادم لكن انا بوصف اسباب الجفاف والتعب النفسي اللي بمر بيه دا نتيجة ايه. رغم اني ما شوفتش منها كذب ولا خيانه وعارف انها بنت اصول ومتربيه بس انا واصل لحاله صعبه اووي بسبب الفراغ اللي بحسه في يومي معاها انا معظم شغلي من البيت وقاعدين مع بعض معظم الوقت فحاسس من الصمت والوحده اللي هي معيشاني فيها اني بموت. والله العظيم بنتي الصغيره سنتين وبتشاغلني وبتغازلني عنها. علي المستوي الآخر هي مش مضغوطه في شغل البيت ولا احنا في بيت عيله ولا نفسيا مش كويسه احنا معظم اكلنا ديلفري اصلا وانا راجل ميسور الحال ربنا انعم عليا ف انا كارمها وهي نوامه جدا جدا يعني بتنام من ١٠ ل ١٢ أو ١٤ ساعه يومياً ومش بتشتغل حاولت كتير معاها بكل الطرق لدرجة اني هددتها بالزوجه التانيه بس مفيش اي نتيجه ولما ربنا هدالي الحال وبدأت أفكر بعقل شويا عرفت أن دا سقفها ودا آخرها ف مش هتقدر تديني اللي انا بطمح ليه أو عايزه علشان هي اصلا معندهاش حاجه تديهالي هي مش بتدلع عليا ومطيعه ومحترمه وانا بشكي من منطقه تانيه خالص غير أمور الطاعه والولاء وغيرها واترددت كتير اكتب المشكله هنا لان انا محتاج رد عملي وحقيقي من ناس فعلا عاشت التجربه أو حاساها؛ ناس كبيره عقلا وفهما ومستوعبه اللي انا فيه اعمل ايه ؟ وهل لو فكرة زوجه تانيه ممكن تريحني ولا دي مشكله في كل الحريم ولا إيه ؟ حاولت معاها تسمع محاضرات مثلا للشيخ ابي اسحاق الحويني رحمة الله عليه جايز تنضج وتستوعب يعني ايه تكون سكن حاولت افهمها واعلمها بالراحه ازاي تكون سند بمعني الكلمه مش طبيخ وغسيل ودا مفهومك عن الحياه عايزه تنزل المسجد ما بمعنهاش لدرجة قولتلها اعملي اكونت شات جي بي تي واسأليه وناقشيه جوزي محتاج واحد اتنين ازاي احقق دا كلمي والدتك أو اختك لان اختها الكبيره اللهم بارك عقل ودين بس للاسف عايشه في السعوديه حاولت اتعامل بكل بردو وهدوء وما اشغلهاش معايا في الحياه بس احيانا الضغط اللي عليا بيخليني هنفجر ولازم حد يشاركني المواضيع اتأزمت بينا مره من المرات وقولتلها انا بقيت بتمني الموت بسببك والله حتي دا ما جبش معاها نتيجه. انا بقيت مقتنع تماما أن انا كبير عليها وضاغط عليها كانك مثلا بتجيب موتور طياره تركبه علي هيكل غساله ف مفيش اي توافق ومش هيبقي في وبقيت يائس من التغيير انا عايز اعرف بس من اهل الحكمه والخبره في المكان دا هل انا فاهم غلط ولا الستات كلها كدا ولا لو تزوجت تاني مش هتلاقي اللي عايزه ولا اعمل ايه في كل اللي انا فيه دا

1

4