١ لحد امتى الناس اللي عندها استحقاقية هتفضل حوالينا؟ الناس اللي عايزة تضغطك في حاجات تخصهم وماتخصكش وعايز تساعدهم فيها بدون مقابل ومع ذلك بيزنوا وفاكرين انك شغال عندهم لمجرد انك متساهل وبتحاول تكون شخص كويس وتعملهم جميلة؟ دا هينتهي امتى؟ ٢ كل ما أفكر أكتر أتعصب أكتر، كل ما أقول مش مهم، تيجي الفكرة قبل ما انام وانا على السرير وتبوظ كل الاستنتاجات اللي هديت بيها نفسي، الفكرة إني عارف إني لو أطلقت لغضبي العنان وعملت رد فعل، هندم بعدها وأقول ماكانتش مستاهلة والغضب بيغذي الغضب، عمري ما بيشبع والنار هتفضل تاكلني من جوا لغاية مايبقاش فاضل مني حاجة ٣ من فترة واحدة صاحبتي قالتلي اني OCD ماحستش بحاجة وقتها لأن دا بيتقالي كتير، انت BPD، انت بايبولار، مش فارقة، الناس اتعودت انها لازم تمشي بتشخيص ودي من سمات العصر اللي عايشينه اللي استغربته انها ابتدت تقول اللي لاحظته في شخصيتي وليه هي توصلت للتشخيص دا باعتباره بيعبر عني ومن وقتها وأنا عمال أفكر يعني إيه حد يبقى عايش حياته وفجأة حد يقوله انت OCD؟ والمفروض أعمل إيه بالمعلومة دي اصلا ٤ أي بنت بتنزل انها عندها جفاف عاطفي أو عايزة تصاحب، بحس كل الولاد اللي في الكومنت كأنهم إنسان بدائي جيه موسم التزاوج وبيعرضوا نفسهم عليها وبيعملوا حركات إغراء، زي الحيوانات في الأفلام الوثائقية لما يجيبهملك وهم بيحاولوا يلفتوا انتباه أنثى الجربوع بإصدار روائح أو ينفشوا ريشهم ٥ أنا اكتشفت مؤخرا إني بحب النوم أوي، وكل اللي بفكر فيه إني عايز أعوض كل الأيام اللي ماكنتش بنام فيها كويس أو جسمي مابيحتاجش فيه نوم دي، إزاي أعوض كل رصيد النوم اللي فاتني

2

1