شوية فضفضة مش اكتر يمكن الوضع خرج عن نطاق النصيحة خلاص او يمكن كل النصايح اللي جاتلي يا اما انا مش قادر اعملها او مش حابب او مكسل وصلت ٢٩ سنه و داخل فال٣٠ خلاص مش خاطب ولا متجوز ولا مرتبط كنت خاطب قبل كدة و فسخت و ملقتش حد مناسب من وقتها لدرجة اني اتقفلت كنت بدور على حد يكون مناسب و اكبر سبب هو الوحدة لاني بقيت عايش لوحدي بعد وفاة والدتي .. و كدة كدة والدي اتوفى وانا اصغر من كدة من ٢٠١٣ يعني بقاله ١٢ سنه .. بعمل ايه ف يومي بروح الشغل و ارجع البيت ممكن افتح الكمبيوتر شوية شوية جيمز على خفيف و خلاص ممكن اقضي بقيت اليوم استريمات مجرد صوت فالخلفية يعمل دوشة بدل الصمت الغريب اللي فالبيت .. مبعرفش اطبخ و مبحبش اطبخ اصلا معتمد فالاكل ساعات من برا و ساعات اكل متجهز واقف على التسخين .. الحمد لله الواحد بيعرف يغسل هودمه وينشر و يكوي 😅 لما برجع من الشغل طبعا بما انه بدري يعني ٥ او ٦ بقول خلاص هنزل اتمشى شوية عالبحر او الف بالاسكوتر شوية بس بحس اني مجرد ما بوصل واقعد فالبيت اللي هو لا عايز اعمل حاجة ولا عايز اكلم حد ولا عايز انزل .. الفترة اللي فاتت خلتني مفتقد امي اكتر من اي وقت .. مفتقد ان حد يهتم بيا و يتطمن عليا .. اكلت .. شربت .. صحتك كويسة .. هدومك مغسولة و مكوية .. اكله حلوة معمولة بحب مخصوص عشانك ترجع تلاقيها دافيه .. ترجع البيت تلاقي حد بيرحب بيك و بيتطمن عليك .. دفا غريب مش مفهوم .. كون اني راجع و عارف انها مستنياني دي حاجة تانيه ... المكالمه اللي هي هترجع امته عشان نتغدى سوا .. كل ده فجأة اختفى و المفروض اني اتأقلم و اتعايش عادي .. الموضوع مؤلم بس الواحد بيتألم ف صمت .. مش هقدر اروح لحد او اتكلم مع حد و اقوله .. طول عمري مصدر وش اني جامد و مفيش حاجة بتهزني بس انا اتهزيت و اتهزيت جامد اوي .. جربت امشي ف حوار الجواز لحد ما اتقفلت منه.. ياما شخص مش مناسب يا اما طلبات اهل مبالغ فيها مش فاهم ليه مع ان الحمد لله وضعي المادي احسن من شباب تاتيه ف سني كتير و مش هشكر ف نفسي و اقول اخلاقي و بتاع بس انا طالع من بيت فيه اصول وانا مش بلف و ادور دانا بدخل البيت من بابه .. و فنفس الوقت اللي مش هرضاه على اختي مش هرضاه علر بنات الناس بس الناس و الدنيا بقت غريبة و الناس طلباتهم اغرب ... ارجع و اقول ل نفسي يا تسعيناتي يا بائس يا منتهي الصلاحية 😂

4

8