قرارات من الأهل كانت سبب في تغير حياتك

Question

تحكمت الاهل و اوامرهم ساعات بيجي بالسلب علينا هل حد كان ليه تجربه ذي كدا

Chocolate_72187 🇪🇬 · Answer

اختيار شريك حياتى واجباري ع الزواج منه 
تصرف اهلي دفعت ثمنه عمري كله ومع ان انا انفصلت بس مازلت بربى اولادى ومسؤولة عنهم وياريت اهلي وبالاخص امي بيشعرو بالذنب او انهم السبب فى  تدمير حياتى لا بل بالعكس... 💔

Cherry_33009 🇰🇼 · Answer

طول عمري اهلي كانوا بيتحكموا بكل تفصيلة بحياتي، شو البس، مين اصاحب، وين اطلع، شو ادرس ووين، حتى اني تغربت اكتر من مرة بسبب انهم كانوا بلحظة يغيروا قرارهم و يحسوا انه ما بقى بدهم انه ادرس بهالبلد، لحد ما وقفت بوجههم قبل فترة، و حكيت اني تعبت من الغربة، و من حقي كمل حياتي و دراستي بالمكان اللي بدي ياه، و ما بحكيلكم عن الكارثة اللي صارت، طلعت عاقة والدين و عديمة مسؤولية و جاهلة و ما بعرف وين الله حاطني، بس ما استسلمت و كملت، و اخيراً قرروا يتركوني براحتي اختار، لأول مرة، مش ندمانة ابداً على اللي عملته، لهلأ في شوية تحكمات ما بنكر، بس اخف بكتير من زمان

Coffee_56986 🇪🇬 · Answer

هو مش قرار اوي على قد ما هو ..... 
بصراحه مش عارف دا يتسمى اي 
لكن من ساعة ما شوفت والدي ماشي مع واحده في الشارع و بيركبها العربيه كمان لا وبيزعقلي بعد ما روحت و يتخانق معايا و امي عشان تراضيه بعتت حد من اخواتي يجيب حلويات و حاجه ساقعه و قعدت تتلزق فيه و تطيب بخاطره و انا مرمي في الاوضه و مكنتش باكل لمدة تلات ايام حرفيا و محدش سال فيا مع العلم هي الي خليتني اطلع وراه اراقبه ! 
لغاية بقى مشاكلهم في البيت كل يوم و اني اصحى كل يوم الفجر على خناق و شتايم بأبشع الألفاظ ما بينهم 
دا اليوم الي كان بيعدي من غير زعيق و خناق والله العظيم كنا بنستغرب انا و اخواتي و نقول هو حد حاسدهم النهارده و لا اي 😂

كوميديا سودا صح 😂؟

ما علينا و الوضع استمر على كدا حوالي ست سنين و الوالد مش راضي يبطل و الوالده مش راضيه تطلق و طبعا دا غير أنها كانت بتفتش في تليفونه كل يوم و كان تقريبا تليفونه محطوط في تليفونها 
لكمان وصلنا لمددان الايد من الطرفين على بعض لتهديد بالقتل لبعض لان كل واحد فيهم بقى بيشوف العيال هتبقى في فريق مين الاب و لا الام يا ترى ؟

لغاية ما الحمدلله الذي بنعمته تتم الصالحات ربنا نفخ في صورتهم و اتطلقو

و مش عارف بصراحه اعبرلكم عن كمية السعاده الي كنت فيها لما اتفقوا على الطلاق 
اقسم بالله كنت عايز اعمل فرح 😂

و لكن للاسف كل الي فات دا كان حماده و الي بعده كان حماده تاني خااااالصص دخلنا في level التنين 😂

وصلنا بقى لان كل واحد بقى يكايد في التاني و الوالد مش عايز يديها حقوقها الي اتفقو عليها في الطلاق

لا و كمان الحمدلله الست الوالده بقت مريضه نفسيه قد الدنيا و طردتني كذا مره الحمدلله من البيت في عز الليل

ثم ننتقل إلى مرحلة ان انا ال safe zone بتاعت كل بني ادم فيهم و بقى الوالد يتصلي من بره ( نسيت اقول صحيح اني اتولدت و عشت بره طول حياتي و نزلت مصر على الجامعه و دي السنه الي اتطلقو فيها و انا عشت مع الوالده ) عشان يشتم فيها بأبشع الألفاظ و يحكيلي حاجات مينفعش واحد عاقل يحكيها لا و كمان عايش دور المظلوم الغلبان الي يعيني طليقته كانت فشخاه 
مش انه هو عمود البيت و ان هو الي هده بايده و عمل فينا كدا مثلا و ان هو الي كان بيجري ورا شهواته و دمر بيت كامل و اسره كامله عشان شهوته 
و طبعا الست الوالده هي كمان كانت شايفاني ال safe zone و تقعد تحكيلي بلاوي و تسب فيه كذلك لدرجة انها سمعتني تسجيلات ليه مليانه كلام و إيحاءات مش قادر اوصف عن شعوري ساعتها كان عامل ازاي

و نوصل بعدين لاني بدات اخرج عن صمتي و أناقش الوالد(( لما يبجي يتكلم)) عن الموضوع و ارد عليه و أقوله لا حصل كذا و كذا أو انت عملت كذا أو هي عملت كذا عشان انت عملت كذا لانت مش عايز تظيها حقوقها و بتعاند ليه معاها و عايزين نرتاح و نعيش في شوية سلام لانه بقى يشتمني شتايم يعني بسم الله ماشاء الله مش عايز اقولكم بتعبر قد اي عن حبه ليا و اكتر حاجه كان بيحب يشتم اااا سوري يدلعني بيها اني راجل جدا 
و يقفل السكه في وشي 
لانه بقى يقاطعني 
لان  الحمدلله وصلنا للنهائيات و اتبرى مني و من اخويا التاني و بيدعي ربنا انه ما يحوجه لينا ابدا طول ما هو عايش 
فالحمد لله على كل حال و اكيد من غير ما اقول انتو اتخيلتو الشخص الي اتعرض للحاجات الحلوه دي بقى عامل ازاي

بس الحمد لله ربنا كرمني بالرغم من كدا و سترني و حفظني لغاية دلوقتي مبشربش اي حاجه الحمدلله في الكليه جبت جيد جدا و بالمناسبه دي الكليه الي كنت بحلم بيها ولكن للاسف الحلو مبيكملش 
انا من شهر اتنين تقريبا مبصليش مع اني كنت محافظ على الفروض الخمسه في مواعيدها طول عمري و كنت حافظ ٢٤ جزء من القرآن و بعاني من موضوع الافلام دا بردو بقالو سنين معايا لكن زايد عن حده و داخل على الزنا

اسف جدا في اي كلمة كانت مش لطيفه و اسف بردو على موضوع التعبير دا😅 
و شكرا لكل الي كمل لغاية الآخر و دعالي دعوه حلوه ❤️

Coffee_52367 🇪🇬 · Answer

كنت من صغري دمج في مدرسه حكومي الدمج دا حد بيخش يحللي الامتحان مع إني ذكيه و مش محتاجه المهم أهلي عملو كده عشان يريحو نفسهم أو يريحوني بلاش يريحو نفسهم يعني المهم كنت في البيت طول عمري مبخرجش مبشوفش ناس و دا بسبب خوف أهلي عليا ف.... كنت يوم ما أخرج أخري أروح كارفور المهم جيت في تانيه اعدادي قالولي هندخلك في تالته أزهر و من غير دمج ليه؟ عشان قالو حرام علينا نضيعك و مش عارف ايه و تبقي قليله في التعليم مع اخواتك كده و بتاع ف اتحسمت و حسيت أخيرا هخرج من إلي انا فيه و قالولي نخليكي دمج قولتلهم لا قالولي هيبقى صعب قولتلهم هستحمل المهم دخلت و الموضوع كان صعب كنت يرجع من الامتحان معيطه و اعصابي و أروح مستشفيات كانت ليله و بدءو يخرجوني أكتر المهم حصلي زي صدمه كده من العالم إلي كنت محبوسه عنه ف رحت لي دكاترة عشان دا كان مقصر علي صحتي ف في دكتور قالي روحي لي دكتور نفساني ف المهم رحت ف طلع عندي قلق مفرط و حجات كتير كده و انا يسمع أصوات كده بدايقني و كنت بخبط دماغي في الحيط من كتر مع هيا مديقاني و سعات كنت بشوفهم ف بس و لحد الآن بروح حياتي حاليا متلغبطه و الاخصائي مش مهتم بس عادي يعني مش مهم 👍🏽 و بيقولو أن الحاله مستقره مع إني رجعت اتعب أكتر من الأول عقدت شهرين مش بروحله عشان كان عنده امتحانات و مسافر و حجات كده المهم يعني محدش عارف إلي انا فيه بتعب كل يوم بسبب كل حاجه و بقيت اسوء من الأول لأن الاول كان بيبان عليا حاليا لا انا مش بيبان و مبعرفش أبين و كتومه أكتر و أكتر و بتعب كل يوم بقى في حركات لا اراديه في جسمي مش بعرف اتحكم فيها و دماغي و حجات كتير أوي بس عادي مبقتش تفرق 👍🏽🥲

Ice Cream_69885 🇪🇬 · Answer

اهلي رافضين الجامعه الخاصة 
هما مقتدرين
لكنهم بيفضلوا اخويا عليا
بصراحه دا اخر امل ليا في التعليم
انا اشطر حد في اخواتي 
مش عارفه ازاي يقفوا قدام طريقي بالشكل ده
مش عارف ازاي إقناعهم دلوقتي

Avocado_73251 🇪🇬 · Answer

حرفيا صح اوي امي دايما مكانتش بتاخد براينا و دايما تزعق و كلمتها لازم تمشي و لو انا مظلومة و جيت اعاتبها تتعصب و تضرب عشان خالفت تفكيرها للاسف شخصيتي ضعيفة اوي من ناحية اني مش بعرف اتكلم بس بعرف اقول رايي عشان اخاف اتطنش مش بشارك في الكلام الجماعي بكون بتفرج عليهم بس

Banana_69853 🇪🇬 · Answer

هو ليه نسبه بقت كتير جدا مع أن شايف الموضوع بسيط جدا  و محدش يقولي عشان الأحوال اللي بتمر بيها البلد و الكلام دا و الحاجه بقت اسعارها نار 
لان عمر الظروف الماديه ما كانت سبب نهائي 
اغلبنا اتولد في اسره فقيره اوي و مع ذلك  و  نشأة في ظروف صعبه  و محصلش اي مشكله بل بالعكس كنا نلاقي البيوت مستقره و كويسه و حتا لو حصلت مشاكل بيحلوها ودي و بمنتهي السهوله و الستات كانت عاقله و تخلف بالخمسه و السته و ترضي بقليلها و الراجل كان بيبقي شغال كذا شغلانه و مبسوطين و البيت كان بيبقي اوضه و الله العظيم 
ايه اللي حصل 
الناس مالها اتشقلب حالها ليه كدا و دا يضرب مراته و يهينها و دي تفضح اسرار بيتها 😳😳
احنا بنعيش اسوء ايام مرت علي مدي مرور  العصور 
ربنا يسترها و نخرج منها علي خير اللهم احسن خاتمتنا

Strawberry_74738 🇪🇬 · Answer

يمكن الفكره بتاعت الابلكيشن ده عجبتني و شجعتني علشان مش معروف مين لسبب تاخير الدكتوره النفسيه البروح ليها و معادها و كم المهدئ و المنوم حياتي كلها تعتبر في غيبوبه مش عارفه ولا اتكلم مع حد ولا حد هيفهمني مجبره اضحك و اهزر
الموضوع بداء معايا من وانا في ابتدائي حاليا انا 29 سنه 
طفله يعني و مكنتش حلوه كمان والله الهو لحد دلوقتي مش عارفه فكره ان حد يتحرش بطفل ايه المغري فيها غير انه مريض حصلت كذا مره من ابن خالتي و كنت بخاف منه و حصلت من ابن عمت مامتي الغريبه بقي ان في الوقت ده هما واحد كان في 3 ثانوي و التاني في اخر سنه في الكليه 🥲
مشاكل ماما و بابا كانت كتير جدا ماما اغلب وقتها مع اخواتها و انا مع بابا بابا كان راجل كبير في السن يامه اضرب من خالي و اتشتم شتايم زباله زيه هو غلط اني اشمت في المرض بس مبسوطه ان جالو كانسر و انا في 3 ثانوي بابا تعب و اتوفي و ماما بدات تفتكر ان ليها بنت بس الكلمه كلمه خالي بقي الكان مبهدل بابا و طبعا ماما مخليه اخواتها و عيالهم كله بيتحكم فيا انا الواحيده الكله كان بيمسك فوني و ممنوع احط باسورد انا الكنت بضرب من خالي و اتشتم من خالتي و خالي عرفت واحد في اولي ثانوي و لما بابا مات خالي قال يايجي تاني يوم الاربعين يا خلاص من خوفي اني اقعد معاهم عرفته و جه فعلا و اتجوزت و قولت بما ان هو عارف تفصيل حياتي هيتقي ربنا فيا و في الحصلي مكنتش عايزه فلوس يمكن الحاجه الماما كانت بتعملها بتعوضني عدم موجودها بالفلوس هي فكره كده ان هي كانت بتحبني يعني و ان هي مش حرماني من حاجه متعرفش انها هي حرمتني منها اتمنيت اكون زي عيال اخواتها و تحبني زيهم والله لما اتجوزت كانت حياتي جحيم خلفت اتنين و كنت سكته علشان ولا ليا اخوات ولا مكان اروحه لفتره كده بعد جوازي ب5 سنين

Strawberry_74100 🇪🇬 · Answer

قرار ماما إني أدخل كلية معينة ودخلتها فعلاً، وحاليًا داخلة تالتة اهو بس مش حابة المكان ولا الكلية ولا أي حاجه، معرفتش أعمل صحاب فيها حاسة الناس فيها مش شبهي، بالإضافة إنها بعيدة عن المدينة اللي عايشة فيها ف بقعد في سكن في الدراسة وحقيقي نفسيتي بتكون بايظة آخر حاجه، حاولت كتير إني أتأقلم بس مش عارفه ولسه حاسة إني عايزة أسيب كل حاجه وأمشي...

Mushroom_74773 🇪🇬 · Answer

كلها كانت قرارات هدتني وكسرتني من اول قرار الجواز لقرار الطلاق لقرار الكلية اللي ادخلها وقرار الشغل اللي اشتغله حتى اللبس كانوا بيختاروهولي فلما الواحد بيتمرد بيبقى اكستريم اوي ساعات بياذى نفسه ياريت كل اثنين بيفكروا في الجواز يبقوا عارفين انه أولادهم مش حتة كنبة ولا كرسي يحطوها مكان ما هما عايزين لازم يساعدوهم يبقى عندهم شخصيتهم يكونوا سند وظهر ليهم مش هما اول ايد تكسر يشجعوهم يبقوا افضل اتمنى انه تفكير الناس يتغير قبل ما الدنيا تخرب خالص

Banana_74835 🇪🇬 · Answer

بصراحه تجارب سيئه كلها لما مكنتش عاوز اخطب و قعدوا يزنوا عليا و يضغطوا عليا بالكلام و الاقناع و وافقت و اتفشخت فشكلت بعد سنه و نص و نصبوا عليا ف حاجتي كلها خسرت مبلغ محترم . متغلطش غلطتي و قرر بنفسك

Marshmallow_75142 🇪🇬 · Answer

خلوني ادخل علمي علوم غصب عني وادرس حاجات مش حاباها، حاليا انا مجموعي كويس بس مش عارفة اختار أي كلية لأني اصلا مش حابة المجالات دي من الأول و حاسة ان دا مش مكاني ولا دا اللي انا عايزاه، بكره تحكمهم

Strawberry_75117 🇪🇬 · Answer

اهلي انا مقتنع ان ليهم الحق في توجيهي عادي ادام مش بيخالف تشريع ربنا وده مش تحكم ده اسمه طاعة التحكم هو اني اخليك تعمل حاجة بهدف اني استهلك حد او اضره والاهل نظرتهم للحياة بتكون ابعد واعمق بكتير من نظرتنا كناشئين 
مفيش امر بيصدر من الاهل بيكون هدفه الاستهلاك او القسوة المطلقة دول ناس عاشوا الحاجة قبلنا كتير وعارفين الصح من الغلط احنا الي جايين جداد عليهم لو ماقتنعوش بوجهة نظري فهم ليهم مطلق الحق والحرية في توجيهي حتي لو كنت انا الي صح انا اتخلقت من صلبهم وهم عملوا كل الي يقدروا عليه عشان يسيبوني في العالم ده كأثر كويس ليهم ودي المفروض تكون رسالة اي ابن انه يكون اثر كويس لأهله مش عكس ده
انا شخص مخلوق وللخالق الملكية ملكيته بحكمة في التصرف في املاكه وأمرني اني اطيع ابويا وأمي في اي حاجة ما عدا معصيته واولاد الصحابة كانوا بيتبعوا اباءهم في كل حاجة بالنقاش حتي او من غيره السمع والطاعة خلقت منهم ناس قادرة انها تحافظ عالورث لحد ما ظهرت كلمة "انت هتتحكم فيا ولا ايه انت مجرد اب"

Marshmallow_75406 🇪🇬 · Answer

شكلتي مختلفه شويه
انا بنت مرتبطه ب شخص منفصل و معاه ولد و بنحب بعض جدا 
اتقدملي الشخص ده .. بابا كان رافض فالاول بس اقنعته أنه شخص كويس و كده المهم والدي كان خايف ف قال إن عنده شروط 
أنه يكتبلي نص شقه و مؤخر و قايمه انا كنت شايفه أن طلبات بابا كتير جدا و مش منطقيه .. المهم الشخص ده قالي باباكي بيطفشني وكده حاولت اتكلم مع بابا كتير أنه يغير رأيه و فعلا غير رأيه و قال هيبقي مؤخر بس و قايمه المؤخر قال رقم كبير و اي حد هيتخض لما يسمعه 
ف هو قالي انا مش هكتب مؤخر اكتر من ٥٠ الف 
بس بابا شايف أن لازم ضمان عشان ابنه هيعيش معانا و بيقولي ف اي وقت ممكن يقولك اطلعي برا و كده ... 
محتاجه رأيكو انا بحبه جدا و مش قادره اسيبه

Ice Cream_75869 🇪🇬 · Answer

عاوز أتكلم مع اي حد بقالي فتره كبيره اوي اوي اوي اوي اوي اوي مكلتش حد
ونفسي يبقي عندي صحاب وشكرا ليكم

Hello how are you doing today hope you are doing well and feeling good
Mnmnmnmnmnmnmnmn

Sugar_76222 🇪🇬 · Answer

اهلا ازيكم انا جت عليا لحظه كنت خسرت كل حاجه في حياتي من اهلي وصحابي وامي كل حاجه بس انا فضلت سنتين بحاول ارجع كل ده والحمد لله كل حاجه رجعت زيي الاول بس انا عندي مشكله ان زمان مكنتش باخد بالي ان بابا مش مهتم بينا ولا بيصرف علينا ولا يعرف عندي حاجه اصلا والموضوع ده ماثر عليا اوي اوي انا بقيت حاسه بالنقص ومش عاوزه ادخل في علاقه علشان اللي كان السبب اني اخسر كل حاجه كان علاقه سامه ومش عارفه اعمل ايه طول الوقت حاسه بالنقص

Biscuit_76441 🇪🇬 · Answer

طول عمري بحلم بدراسه الطب البشري اهلي غيروا رغباتي وخلوني ادخل صيدله بدون علمي وحطوني قدام الامر الواقع انا دلوقتي داخله ٢ صيدله الم رهيب وهم بيتعاملوا عادي جدا الالم الإبر ان كليه الطب البشري جنب كليتي كل يوم ببص عليها والوجع يزيد

Chocolate_57541 🇪🇬 · Answer

انا تجربتى غير للاسف مكنش فى تدخل من الاهل ف اى حاجه بعملها ف حياتى كنت حر ف كل حاجه خروج مصاريف دراسه اى حاجه كنت بحتاج اعملها بعملها لكن للاسف اكتشفت انى اتحرمت من دا مكنش منحه زى ما كنت مفكر لاننا ساعات فعلا مبنبقاش عارفين حاجه ومحتاجين حد مر بتجارب يوجهنا ويقولنا اعملوا ايه حتى لو بالاجبار فضلت لحد ما خلصت جامعه وجيش ومحدش ضغط عليا وقالى انزل اشتغل العب رياضه سافر اعمل حاجه اغلب وقتى كنت بقضيه فالبيت منعزل حتى عن صحابى بشوفهم كل فين وفين ونتيجة دا حاله نفسيه زفت ولما بدأت افوق وانزل ادور على شغل واشوف حياتى لقيتنى فوتت حاجات كتير من عمرى كان لازم اعملها عشان اعرف اواجهه الناس واقبلهم زى ما هما انا حاليا اما بنزل مشوار واتعامل مع الناس بقيت بكرهم وبكره كل الناس واكتر وقت بحس فيه بالراحه النفسيه انى اقعد ف اوضتى او البيت 💔

Apple_73294 🇪🇬 · Answer

بسبب امي و انها كانت بتستقل بيا من و انا صغير دخلتني صنايع خمس سنين غصب عني و حاليا انا عندي 23 سنه و لسه ف تانيه جامعه و مع العلم مسقطش ولا سنه و الي قدي دلوقتي بيتخرجو و هي بتعايرني بكده و مش عارف اتعايش بسببها

Coffee_76922 🇪🇬 · Answer

اه بصراحه مثلا قرار انهم نقلوا المسكن وبسبب الموضوع ده شغلي تدمر ومستقبلي مفكروش فيا بس ولما انفصلوا محسوش انه الموضوع صعب جدا بالنسبالي انا عموما لسه منزل الابلكيشن ده ومش عارف اللي بكتبة ده حد هيشوفوا ولا لا بس اشطا يعني كده كده فهمت انه مفيش حد بيعرف هوية التاني وكده يلا باي

Corn_77329 🇪🇬 · Answer

كنت بعمر ٥ أو ٦ سنين
وطبعا لما ابويا حس اني مش هبقى احسن حاجة  وسط مجتمنا ودا بسبب اننا فقريه وكدا ، واختلاط باطفال ف سني مش كويسين ومع العمر ابويا محبنيش افضل كدا

قرر انو ياخدنا ويسافر ، وكان بها وبالفعل بعد عمر طويل
الحمد لله احنا ٣ وكل واحد فينا بقى دنيا تانيه ودا بفضل ربنا ثم ابويا ربنا يباركلنا فيه
انا واخواتي الاتنين كلنا طلعنا اللي نفسنا فيه واللي طيب خاطر ابويا وامي كمان وحقيقي هعيش عمري المكتوب ولو فضلت اعيش أضعاف انا عمري ما هقول ولا هحب خير وكلام يوفي حق ابويا علينا ربنا يباركلنا فيها

Apple_61722 🇪🇬 · Answer

هل لو اهلي كانوا بيضربوني و انا صغيرة و زعيق كتير  ده ممكن يكون سبب أني دلوقتي مش اجتماعية خالص و بتوتر في التعامل مع الناس بشكل بيخلي عقلي و لساني يعطلوا حرفيا ؟؟
انا معنديش غير اتنين صحاب طول عمري و لسه داخلة كلية السنادي و حاسة أن دي اخر فرصة ليا أعمل صحاب و خايفة افضل وحيدة بسبب قلة اجتماعيتي تعبت بجد

Chocolate_62357 🇪🇬 · Answer

مش عندي طاقة اكتب بس الحاجة الوحيدة اللي متأكدة منها بعد علاج الاكتئاب اللي انا كل مرة برجعله اني مش عايزة اكون موجودة معاهم 
شايفة نفسي احسن وهاكون احسن من غيرهم، زي كل مرة بكون احسن واهدى وارق بدون ضغط، وبكتشف في نفسي اني حلوة بكل المقاييس وهما مش موجودين.

Banana_77700 🇪🇬 · Answer

اعتراضهم على البنت اللي اختارتها اني اكمل حياتي معاها خلوني بقيت منطفي وكاره اي نوع من انواع الجواز التقليدي او حتى الغير تقليدي واللي محسسني بالذنب اوي ان انا لسا على علاقة بيها ولا عارف اخليها تبعد عني ولا عارف ابعد عنها

Banana_78158 🇪🇬 · Answer

حابب احكي حاجه من الحجات الي اثرت علي حياتي اول حاجه قرار  انفصال بابا عن ماما وده ماما اخدتو بعد ما بابا اتجوز عليها للمره التانيه ساعتها كان عندي حوالي 19 سنه وهي لاقت منو عدم اهتمام وكل ده بس هي اختارت تنفصل عموما مكانش ينفع يكملو حياتنا مكانتش حلوه بسبب وجودهم هما الاتنين مع بعض بقا عندنا عقد نفسيه وقرف بجد بسببهم لانو انا من اول ما اتولدت بصراحه وانا عايش في المشاكل دي ما علينا بس بعد كده من فتره صغيره ماما اختارت تتزوج علشان هي مش مرتاحه وعلشان محتاجه كده انا كنت رافض بصراحه اكيد مش بعد كلو عايزه تسيبينا يعني لوحدنا !! انا فاهم انها ليها احتياجاتها ومشاعرها بس هي برضو عندها اولاد ع الاقل علشان الي في تعليم اعدادي والبنت الي لسه كانت في ثانوي بس ماما عملت الي في دماغها حاليا هي تقريبا مش مرتاحه اوي ومعتقدش بابا مرتاح اوي ومعتقدش انهم هيرتاحو بعد ما بقا عندهم اولاد وبابا عايش في مكان لوحدو مع زوجته وماما عايشه مع زوجها وسايبين اولادهم يخبطو في الدنيا وبيجو ليهم زياره كل فتره انا كنت عايز أفضفض مع حد ميعرنيش ولاقيت الفرصه دي فا حبيت اتكلم وعندي كلام كتير بصراحه بس انا لاقيتني كده مش بحكي لحد حتي معنديش صحاب قريبه مني اوي حاليا حتي صحابي الي كانو قريبين ميعرفوش عني حاجه غير اسمي  وعنواني

Watermelon_66226 🇪🇬 · Answer

وانا صغير كنت عايز اخش سياحه وفنادق عشان بحب الطبخ بدل ثانوي عام ابويا قالي لو مجبتش مجموع ثانوي زي اخواتك امك طالق وجبت مجموع ثانوي ودخلت عام وطلقو بردو 😂💔 ودخلت خدمه اجتماعيه ودلوقتي شغال شيف في مطبخ وتلت ايام داخل سنه جيش توته توته خلصت الحدوته