أهالي بيعاملونا كملكية خاصة! دي مش حكايتنا

Blueberry_61513 🇪🇬

منذ يومين

رسالة مهمه للكل ويمكن تفرغ غضبكم... ولو حد عنده اي كلمه يكتبها عادي بس اتمنى تفهموا منظوري للأمور لإني سبق وبصيت في اتجاهات كتيرة بس بسبب ان البوست كبير اوي هيبقى صعب اغطي كل الجوانب... هو ليه بقيت أشوف أهالي كتير بيعاملوا ابناؤهم على انهم ملكية خاصه؟ حضراتكم دي مش ملكية خاصة، دي روح ربنا نفخ فيها علشان نحافظ عليها مش علشان حضرتك تتحكم فيها وتقول تعمل ايه ومتعملش ايه! على عيني وعلى راسي ان كل أب وأم عايزين الأفضل لأولادهم، ودا مش موضوعي ومش اعتراضي... بس لما التحكم يزيد عن حدة لدرجة يختارولك تتجوز امتى ومين وفين ويختارولك تخصصك الدراسي او حتى تقرأ ايه ومتقرأش ايه ونتعلم ايه ومتتعلمش ايه، بل وتاخد الناس مرجع ليك والناس قالت ومقالتش والناس هتقول علينا ايه وميقولوش ايه...دي مش حكايتنا، ربنا مفرضش علينا تخصص معين او دراسة معينه ربنا والرسول حثونا على العلم مش الاجبار اني اتعلم وكمان حاجه انت مش حاببها! كدا لازم نعمل وقفه ونشوف دماغنا وعقليتنا مش كلامنا وكلام الناس! الكلام دا اتمنى اقوله لأهلي قبل ما أنشره بس حقيقي مبيسمعوش! او بيسمعوا بهدف الرد لا اكتر! ولما الأولاد ييجوا يحاولوا يطوروا من علاقتهم بيكم وميلاقوش نتايج بل وتلاقي أولاد هربوا من أهل زي الأجانب، كدا تبقى فيه مشكله، ومش المشكله كلها على الأولاد ومش المشكلة كلها على الأهل، بس حقيقي انا مشوفتش حاجه تستفزني اكتر من التحكم والسيطرة... معلشي لو دا كان خوف فهم كدا مش هيتعلموا حاجه! امتى تسيب ابنك يخرج الدرس او المدرسة لوحده، او حتى يشتغل علشان يعتمد على نفسه امتى هاا؟ وامتى تثقوا في بناتكم ومتحسسوهومش انهم بس مجرد أداة للبيت مش اكتر بعد الجواز! بجد مجرد ذكري للي سمعته وللي بعانيه ميخلينيش اخرج كل إلي عايزه اقوله! بجد دا قهر! تعرفوا ان معظم أخطاء الشباب بيبقى بسبب الأهل! مش علشان مجربوش بل لإنهم محسسينهم انه لو معملتش كذا او لو عملت كذا هبهدلك وهبهدل كرامتك! طب ليه يا حبايبي، الواحد شاف ايه علشان يعمل في عياله كدا؟ ولو عانى مينفعش حاجه تطلع للعيال! احنا ذنبنا ايه؟!! ولازم يحطوا في اعتبارهم اننا في عصر الفتن والتكنولوجيا...يعني متحطش ذنب على ابنك قبل ما تعرف هو بيمر في يومه ايه! دا خلى فيه فجوة محدش شايفها غير الابن! وبالنسبة للأمهات والأبهات إلي بيجيبوا تلفون لطفل عنده سنه علشان ميعيطش ويتلهى... معلشي، انت دلوقتي مدمن فون وشوف وقت الشاشه عندك وهتعرف او انتِ يا طنط يا إلي بتعملي كدا علشان شغل البيت وبرنامج طبخ الشربيني، حضرتك لو اهتمامك متركز على اطفالك ولو بيعيطوا بس بدون شاشات هتلاقيهم بيحسوا بيكم وبيهدوا لما بيكونوا معاكم... انا وتعاملت مع اطفال كتيرة وناس اكتر رغم انطوائيتي وشفت بلاوي بسبب حتة الحديده إلي في ايدك دي... بالله متلومش طفل على الادمان او الطريق الغلط او متابعة الترندات زي الخرفان وسوء أخلاقه بسبب وسائل التواصل وانت اصلا السبب الاساسي في دا! آسفه اني انفعلت بس والله الموضوع مستفز، وفكرة ان معظم جيلنا عنده اضطرابات وامراض نفسية بسببكم وبسبب البيئة وترجعوا تقولوا صغيرين على الإكتئاب و مش عارفه ايه، حبايبي الموضوع موجه لما تلاقوا ناس في نفس سنكم او اصغر بيقول نفسه او يرتكب جريمة قتل او تحرش... وكمان انتم مينفعش حتى تسيبوا دا كله يأثر فيكم لدرجة انكم تعملوا كدا... فيه امراض فيه تحكم فيها ومش معنى انك عندك اكتئاب تروح تتحرش او تموت حد علشان تطلع كبتك فيه!

هل كانت هذه المعلومات مفيدة؟

0

0