الزواج مش مشكلة فلوس.. ده اختبار رجولة ومبادئ!

Strawberry_62095 🇪🇬

منذ يوم واحد

معظم مشاكل الشباب حاليا (خاصة الرجال) من أفضل وأهم حلولها هي الزواج بشريك حياة صالح، ولما حد يُنصَح بالزواج بيكون أكبر عائق له هو: الفلوس والماديات وما يتعلق بهما - هقولك نصيحة من أخ بيحبك وحريص على مصلحتك، ومش كتير هيقولك الكلام ده: أكبر مشكلة هتواجهك في الزواج ليست الفلوس! لأن مشروع الزواج الله متدخل فيه بشكل مباشر، ومش محتاج أقولك يعني ايه (الله متدخل فيه) بالمعونة المباشرة! قال رسول الله ﷺ: ثلاثةٌ حقٌّ على اللَّهِ عونُهُم: المُجاهدُ في سبيلِ اللَّهِ، والمُكاتِبُ الَّذي يريدُ الأداءَ، والنَّاكحُ الَّذي يريدُ العفافَ. - أكبر مشكلة هتواجهك هي أنك تكون راجل وعندك موقف وشخصية ومبادئ ومتقبلش حد يحملك ما لا تستطيع وترضى بحجة أن كل الناس بتعمل كده ولازم أقبل! إياك تعمل كده في نفسك مهما حصل أنت بتعرِض نفسك (بظروفك الحقيقية) دون أي تجميل، وصدقني صراحتك ووضوحك دي رجولة وشخصية ودلالة على أنك رجل صادق مع نفسك ومع الناس ومتحمل لمسئولية فعلا، واللي مش هتقبل غيرها هيقبل كتير، ف متحجرش أفكارك ودماغك - الزواج إيجاب وقبول عادي ظروفك تكون مش مناسبة لبنت معينة، بس الأكيد أن غيرها هيتقبل، ف أنت دورك تبحث ومتملّش وتسعى وتستعين بالله، لكن متكونش قافل دماغك على واحدة معينة ليها شروط فوق طاقتك وتقبل شروطها وشروط أهلها وترجع تشكي من الظروف وتقول مش قادر وصعب وكتير! فيصيبك إحباط وتعزِف عن الزواج والحياة تسود في وشك لو سمحت خليك راجل وشخصية ولا تجعل أحد يجبرك على شيئ فوق طاقتك، واللي مش هتقبلك عادي من حقها، ومن حقك انت كمان تدور على واحدة قابلة ظروفك وسعيك الحالي والله يبني الدنيا مليانة بنات عاوزة تعيش وهتقبل، بس دوّر ومتقلقش، والعملية نسبة وتناسب، وكل واحدة حرة هي وأهلها، وطالما أنك بتشتغل وبتسعى ومحترم وبتتقي الله وعاوز العفة، فاللي ترفضك هي الخسرانة - وكلمة لكل بنت وأهلها أنكم تستلفوا عشان تجيبوا غسالة بالشيئ الفلاني وتلاجة ١٨ قدم ماركة معرفش ايه، وبوتجاز وسخان وغسالة طباق واير فراير ومطبخ وسجاد ونجف وادوات مطبخ كتير ومتعددة بأرقام خزعبلية وكبيرة أوي عليكم، والله العظيم ده كله ولا له أي لزمة، أنتم مش محتاجين إلا الأساسيات اللي كل بيت بيستخدمها، أساسيات وبس لكن محاولة تقليد الناس بشكل أعمى وتحميل نفسكم فوق الطاقة ده غلط وضغط كبير عليكم بلا سبب واضح، ومتتكسفوش من ظروفكم، وبرضو زي ما فيه ناس مش هتقبل، فيه ألف راجل هيقبل عادي، متحملوش نفسكم فوق الطاقة بسبب ضغط المجتمع وتأخروا زواج بناتكم ((فقط لأجل الفلوس)) وتتداينوا بمئات الآلاف للناس وتعيشوا في كرب مش فرح! عيشوا عيشتكم يا جماعة بدون خجل، لأن محدش بيختار رزقه ولا ظروفه، والحمد لله على كل حال، بلاش تحطوا ضغط على نفسكم وتصعبوا السهل وترجعوا تزعلوا أنه صعب! لأنه احنا اللي صعبناه على نفسنا وللمرة العشرتلاف: اللي مش هيقبل غيره هيقبل، بس احنا ندور ومنزهقش، اللي عاوزين يعيشوا كتير، والزواج (ماديا) فعلا من أسهل المشاريع، واسأل المتجوزين صح يقولولك! - اللي ننشغل بيه فعلا هو: التأهيل للزواج نفسيا وفكريا سواء بسماع محاضرات أو قراءة كتب عن ده أو اشتراك في دورات تعلم، هو ده اللي ينبغي العمل عليه والاجتهاد فيه، مش أي حاجة تانية، وده اللي بينجّح الزواج مش أي حاجة تانية، واسمع من أخوك تكسب

هل كانت هذه المعلومات مفيدة؟

0

0