انت محتاج تعيط في الزمن ده.. خصوصًا لو راجل

Apple_59662 🇪🇬

منذ شهر واحد

عارف انت كإنسان محتاج إيه في الزمن ده؟؟ خصوصا لو راجل..؟؟ في انترفيو في أحد المستشفيات في بلاد برا.. كان بيسألو الممرضات المتقدمين للشغلانة سؤال يبدو إنه تافهه أوي.. وهو.. آخر مرة عيطتي إمته.. ؟ عشان يقدروا يشوفوا الانسان ده درجة تصالحه مع نفسه وطيبته مع اللي حواليه ايه.. في روايات قديمة ان ملوك الصين القديمة كانوا بيشوفوا مين اكتر الحكام بكاء ويعينوهم على خزائن الدولة بتاعة الفقرا.. ليه هسألك السؤال ده بقي.. لأن حسب اعتقادك الديني ان النبي المرسل ليك نفسه بلت لحيته من البكاء يعني بيعيط أهو.. ماحدش قاله عيب يا رسول الستات بس اللي بتعيط.. ده غير انك مؤمن ان عينان لا تدخلان النار منهم عين بكت من خشية.. بكت أهي.. يعني فيه عياط في الموضوع.. انت كراجل في المجتمع ما ينفعش تعيط.. مع ان عندك نفس الغدد الدمعية اللي عند الستات.. بيقولوا ان البكاء هو ما يضيف للستات بريق العيون اللي بيشوفها الرجالة ويبقوا منبهرين بيها دي.. الست كانت وما زالت أنصح من الراجل.. زعلانه او مكتئبة تعيط.. انما انت كراجل بتمسك نفسك.. فبتموت بدري.. وهما اول ما تموت يعيطوا عليك.. العياط بالنسبالهم هو التكبيرة بتاعه ماريو.. او قلب اضافي في اللعبة.. الشئ الوحيد اللي بيقدر يعبر عنه الطفل وهو رضيع هو البكاء قبل الضحك وقبل الكلام.. البكاء هي اللغة الأولي في التعبير عند الإنسان.. وهي السلاح اللي ما بيقدرش يقف أي حد في وشه حتى الجبابرة.. عشان كدا مش بنحب حد يعيط.. نرجع للسؤال اللي في اول البوست عارف انت محتاج إيه في الزمن ده..؟؟ انت محتاج تعيط.. محتاج إيه.. محتاج تعيط..

هل كانت هذه المعلومات مفيدة؟

0

0