الجنس احتياج وانت مش متجوز.. مش لازم الإباحية!

Peanut_74196 🇪🇬

منذ يوم واحد

"الجنس احتياج وانت مش متجوز، مفيش حل غير الإباحية" الفكرة دي من أخطر الأفكار اللي ياما الشيطان جاب بيها الشباب لمنطقة الإباحية وخلاهم غرزوا في المستنقع ده لسنين ومش عارفين يخرجوا منه ... طبعا تأخير الزواج مشكلة اجتماعية كبيرة جدا، ودور المجتمعات إنها تسهله على الشباب لأنه المسار الطبيعي للحياة، وتصعيبه بيؤدي لمشاكل كتيرة جدا ... ولكني هنا بتكلم على المستوى الشخصي، انت المفروض كشاب ازاي تستعفف في ظل هذه الظروف الصعبة وما تبقاش صيدة سهلة للشيطان ... والفكرة بتاعت "الجنس احتياج وانت مش متجوز" بالرغم إنها تبان منطقية جدا، لكنك محتاج تدرك فيها نقطتين أساسيتين عشان تقدر تحمي نفسك من الإغواء اللي فيها ... أولا: إن كلمة "احتياج" كلمة مخادعة جدا لأننا لما بنقول عن أي حاجة إنها "احتياج"، فاحنا بنفترض تلقائيا إن الاحتياج ده لازم يتلبى، ومش بنفكر في الثمن اللي هندفعه في سبيل تحقيق هذا الاحتياج ... أما على أرض الواقع فمفيش احتياج هتلبيه إلا وهيكون على حساب احتياج آخر ... فالعبرة مش إنك "تشبع" احتياجاتك، وإنما العبرة بإنك تعمل "توازن" بين الاحتياجات ... فلو هتلبي احتياج الجنس من خلال الإباحية مثلا، فده هيكون على حساب احتياجات تانية، زي "استقرارك الإيماني"، "اتساقك مع نفسك ومبادئك"، "استقرارك النفسي"، "الحفاظ على عقلك من تشوهات الإباحية"، "الحفاظ على توازن الهرمونات في جسمك"، إلخ ... كل دي احتياجات انت بتضحي بيها في سبيل تلبية احتياج الجنس من خلال الإباحية ... فهل مستعد تضحي بالاحتياجات دي؟ فدي أول نقطة لازم تاخد بالك منها ... إن لو الجنس احتياج، فالطريقة اللي هتلبيها بيه هتكون على حساب احتياجات تانية، فلازم توازن احتياجاتك دي بحيث ما تضحيش باحتياجات أكبر في سبيل احتياجات أخرى ... ثانيا: إن هل الإباحية تنفع بديل مؤقت عقبال ما تتجوز؟ في الحقيقة إن لأ خالص! ... الزواج طبعا عامل مهم جدا في الوقاية من الإباحية ... ولكني ياما في شغلي قابلت ناس متزوجين وبيعانوا مع الإباحية نفس المعاناة اللي بيعانيها العزاب وأكتر ... وده ببساطة لأن الإباحية بتقدم "إشباع مَرَضي" للاحتياج الجنسي مش "إشباع طبيعي" ... لأنها بتقدم "تنوع لا نهائي للنساء"، "تنوع لا نهائي لأشكال الجماع"، "سهولة في الوصول للنشوة"، "اكتفاء ذاتي في المتعة بدون احتياج لشريك"، إلخ ... كل دي أشكال مَرَضية من الإشباع الجنسي ... فلو واحد متعلق نفسيا بالحاجات دي اللي في الإباحية، فحتى لو اتجوز مش هيقدر يسيب الإباحية، لأن الإباحية بتديله حاجات مش بياخدها من الزواج حتى لو متجوز أربعة! ... فدول نقطتين هيساعدوك جدا في إنك ترد كيد الشيطان لو حاول يغريك بالإباحية بحجة إنك مش متجوز ... إن الجنس احتياج ولكن تلبيته بالإباحية هيكون على حساب احتياجات أهم ... وإن الإباحية بتقدم إشباع مرضي للاحتياج الجنسي وهتسببلي معاناة حتى بعد الزواج ... وزي ما بقول دايما، إن مشكلة الإباحية مشكلة مركبة ومكونة من طبقات كتير، فاحنا بنفك الطبقات دي مع بعض واحدة واحدة بإذن الله، وربنا يكرم ... وبس كده، لو وصلت قوللنا أكتر حاجة لفتت نظرك في الكلام عشان نثري النقاش ...

هل كانت هذه المعلومات مفيدة؟

0

0