هزار بدون حدود

Cherry_35286 🇪🇬

منذ 7 أشهر

شعور مرهق

عبّر عن شعورك بشكل مجهول

انا عندى صاحبه من زمان قربنا من بعض في فتره إعدادى لاننا جيران ف كنا بنروح و نيجى مع بعض بس مش اكتر و كان عندنا ناس صحابنا كانت هى طول الوقت بترتاح في الكلام معاهم لأنهم بيحبوا الضحك و الهزار وكدة و اى حاجة بيقلبوها ل ضحك و هزار حتى لو احكام في الدين إنما أنا أقل الاشياء بحب افكر فيهم بعقلى و وقت الجد جد و الهزار هزار ف هي اختلفت مع صحابنا دول لسبب ما أنا كنت حذرتها انها تعمله كذا مرة و هي عملته و اكتشفت بعدها إن هي غلط و اختلفت معاهم أنهم ليه يشجعوها على حاجة غلط و لانه ظهر كذا موقف باعوها فيه ف قربنا أنا وهي من بعض و بقينا صحاب قوى بس انا لسه حاطة حدودي بيني و بين اى حد المهم إن هي اغلب الوقت مش فاهمة وجهة نظرى و دايما خلافاتنا على كدة دخلنا الكلية و انا كونت صحاب من القسم بتاعى و هی کونت صحاب من القسم بتاعها و بحكم أن احنا ساكنين مع بعض في السكن الجامعي ف جت ليا مرة المدرج و اعترفت على صحبتی و خدت رقمها و بتتكلم معاها وبتقولها سيبك منها خليكى صحبتى أنا قدامى و إن أنا بزهق و مش بخرج کتیر و بتتريق عليا قدمها على حاجات تافههة و لما بتكلم معاها بتقولى أنها بتهزر و لما يقولها إن ده مش هزار بتقولى علشان أنا اللى مبهزرش و ده العادي حاولت كتير ابعد عنها من غير ما تبين لها و اسحب نفسی بشويش يلاقيها بتلزق لي و بنقولى متغيرة ليه وكدة وبتقولى أنها بتهزر و بعدين يحصل ليها مشكلة ف بتصعب عليا وبقول يمكن نيتها مش وحشة لحد ما قالت ليا أن القسم بتاعى وحش مع العلم اني كنت جايبة مجموع أعلى منها بكتير و هي كانت بتقولى أنها نفسها كانت تجيب مجموع أعلى علشان تدخل معايا القسم وكل كلامها أنها احلى و إن كذا شخص عاكسها و كذا شخص كلمها و كذا شخص اتقدم لها و بصراحة انا زهقت لأنها بتكبر المواضيع لدرجة أنها بتحسسنى انها محور الكون و انا وحشة مع انى جمالى متوسط عادی یعنی و هی كذالك و كنا ماشيين فى مرة ف كان هيحصل لنا حادثة و العربية كانت هتخبطنا وجرينا و انا كنت ناحية العربية ف بعد ما بعدنا شوية بقولها الحمد لله بجد الواحد اتخض و كان خايف يحصل حادثة و كدا راحت قابلة ليا انت عادى مش مشكلة كنتى موتى و خلصتينا لكن أنا فيه ناس عايزاني كأنى مثلا من الشارع أو مليش أهل أو حاجة وبتقول كدة بكل برود و بضحكة و لما اتضايقت قالت لى بكل برود كنت بهزر قلت لها أن ده مش هزار اصلا و لو هى بتحبنى مكنتش فكرت فى الجملة دى مش قالتها بس راحت قايلة أن انا مكبرة الموضوع و يقف ليها على الواحدة و كمان كان فيه واحدة صاحبتنا فى السكن لسه عارفينها بتقولها يلا
علشان نعمل اللى اتفقنا عليه راحت قابلة ليها انت بتقولى قدامها ليه ( اللى هى أنا ( ف بقولها فيه ايه يعني انا مش مش عايزة اعرف انتوا عايزين تعملوا ايه اصلاف راحت قابلة ليا أنا اصلا مكنتش هقولك و قالت لصاحبتنا اياكى تقولى ليها هنعمل ايه قولت لها متقوليش أنا اصلا مش مهتمة انى اعرف و متکلمتش و کل مبرراته انها بتهزر و انا مش بفهم في الهزار و مش بعرف اهزر مع أنه أنا بهزر عادي بس كل حاجة ليها حدود و لو ههزر هركز انى مضايقش اللى قدامى ولا أخرجه قدام حد ف ياريت حد يقول اتصرف معاها ازاى من غير ما اضايقها أو انسحب ازاى من صداقتنا من غير ما نجرح في بعض

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Strawberry_76847 🇪🇬

ليه دايما بحس إني قليلة ومش مستحقة؟

أنا مش عارفة ليه دايمًا حاسة إني قليلة... بحس إني مش زي غيري، بحس إني مش بستحق حاجة حلوة. يمكن عشان في حاجة قديمة عملتها ومحدش عرفها غيري، بس أنا عمري ما نسيتها. كل مرة أحاول أفرح أو أفتخر بنفسي، الصوت اللي جوايا بيقولي: انتي نسيتي؟ نسيتي عملتي إيه؟ بصراحة بقيت دايمًا حاسة إني أقل من البنات اللي في سني، وهما بيتكلموا عن نفسهم بثقة كأنهم عمرهم ما غلطوا. اللي بيستفزني أكتر إن في منهم بيقعدوا يقولوا: "أنا المفروض كنت أبقى أحسن من كده" أو "أنا أستاهل أحسن بكتير"، وأنا أقعد ساعتها ساكتة مش عارفة ده الصح ولا الغلط. نفسي بس أهرب من الإحساس ده… نفسي أسكت صوت الذنب اللي مش سايبني أعيش ...عرض المزيد

5 الدعم

37 نصيحة

Apple_74635 🇪🇬

تعبانه ومخنوقه ومش عارفة أتكلم مع حد

صباح الخير عليكم جميعا انا صاحية مرهقة و تعبانة و مخنوقة او مش هقول صاحية لان عندي ارق و يادوب نمت ساعة ولا اتنين كل دا طبعا من كتر التفكير و الخنقة و الهم الي انا فيه مش قادرة احكي لحد خالص عن الي جوايا وفي تصرفات كتير غلط بحاول ابطلها بس مش عارفة بحاول على قد م اقدر اساعد نفسي بس اوقات مبينفعش و بحس نفسي بفقد الامل و فجأة بلاقي نفسي بدور على حاجات انا عنري مكنت متخيلة اني فيوم هعملها حتى اهلي مش قادرة احكيلهم مفيش حد يسمع مني و حتى لو هيسمعوا مني الي حصلي مش هينفع احكيه لحد و حاسة اني شايلة هم كبير اوي و عاوزة اطلع كل دا من جوايا بس مش قادرة ...عرض المزيد

5 الدعم

33 نصيحة

Pineapple_77988 🇪🇬

متجوزة من 14 سنة وحاسة إني عايشة مع جد

متجوزة بقالي ١٤ سنة مش عن حب ولا صالونات .. هو أكبر مني ب٧ سنين للأسف من اول اسبوع جواز وانا حسيت إن فرق السن كبير عكس ايام الخطوبة كان محسسني إنه الواد التت الفت بعد الجواز حسيت اني متحوزة راجل كبير انا مش مجنونة في تصرفاتي بس بحب الخروج السفر المغامرات فرفوشة بحب انكش ف اللي قاعد معايا ف الرايحة والجاية هو عكسي تماماً هادي ولما ااعملاي حاجة يحسسني اني مجنونة الحقيقة بطلت اعمل حاجات كتير كنت بعملها لمحتله كذا مرة نفسي اعمل حاجة جديدة هو روتيني فوق الوصف بيتوتي درجة أولى .. مطلبتش حاجة فوق المقدرة خالص بس خلاص تأقلمت بس بقاله ٤ سنين كده بقيت حاسة حرفياً اني عايشة مع واحد عنده ٧٠ سنة شايل الهم عالطول ودائما مكشر زعيق ف الولاد ليل نهار عارفة أن الضغوطات والمسؤوليات ع عيني وراسي بس مش عالطول مش طول الوقت مش بشوفه بيضحك لو ضحك تبقى الضحكة قالبة بايموشن قرفان تعبت اوي غير حاجات كتير مستحملاها وبتغاضى عنها لكن الحاجة دي مأثرة نفسياً عليا وع ولادي مابقوش يحبوا قعدته بس لو غاب شوية يفضلوا يسألوا عليه .. عايزة اتكلم ف حاجات كتير ومش عارفة اقول ايه ولا ايه بس دي اكتر حاجة تعباني ...عرض المزيد

5 الدعم

32 نصيحة

التجربة أفضل عبر التطبيق

حمّل تطبيق توهيل على هاتفك لتجربة أسرع