سرطان

Tofu_19483 🇪🇬

منذ يومين

شعور محبط

عبّر عن شعورك بشكل مجهول

بيتهيأ لي إن مفيش أسوء من شعور إنك تتمنى يكون كل ده حلم بس طول شويه ومستني حد يصحيك من حلمك!.. إنك تتمنى إن كل اللي عايشه ميكونش حقيقي بجد!..مفيش أسوء من إن شبابك يضيع قدام عينيك ف التعب والمرض وأنت مش قادر تعمل حاجه وبتتفرج في صمت!.. إن يكون فايتك حاجات كتير أووي بسبب مرضك!..مفيش أسوء من شعور إن جسمك يهزمك!.. أوقات بهون على نفسي وأقول إن ربنا بيبتلي عباده اللي بيحبهم وأوقات كتير بزعل إني مش عارفه أعيش حاجات كتير أووي بسبب مرضي وإني يعتبر معظم الوقت بقضيه ف العيادات والمستشفيات والفحوصات والآشعات أكتر ما بقعد ف البيت بقعد ف أكتر الأماكن اللي من وأنا صغيره بكرهها وعندي تروما منها!بشوف الموت كل يوم قصادي يشوفه ف عيون الناس وبشوفه ف جسمهم!..بشوف الموت ف عيون قرايبهم بشوف الدمعه المحبوسه ف عيونهم وبشوف ابتسامات مزيفه علشان ميحسسوش مرضاهم بالزعل!!..بشوفه ف ابن خايف يتيتم،و ف أب خايف مراته تبقى أرمله من بعده ومتعرفش تصرف على عياله وتلبي احتياجاتهم النفسيه والماديه،بشوفه ف أم خايفه من قسوة الدنيا على عيالها وخايفه تسيبهم ميبقاش ليهم حضن دافي من بعدها!..يشوفه ف كلمة الدكاتره لأهل المرضى خلاص متخليهوش ييجي تاني مش باقيله غير أيام!..بشوف عيونهم والحزن ماليها!.. وبسمع أنينهم اللي بيقطع ف قلبي،وبصبر نفسي وأنا بشوف الموت قصادي كل يوم ألف مره ،حتى بشوفه ف نفسي!...يشوفه ف عيون أهلي اللي خايفين أسيبهم!!..يشوفه وبعمل نفسي مش شايفاه وبضحك وأهزر لكن أنا نفسي أقف ف مكان وأصرخ بأعلى صوت من كتر الوجع اللي جوايا!..الله يحرق الكانسر يارب الكانسر يموت،خسرنا خالتي بسببه وخسرنا ناس كتير بسببه وفرق حبايب كتير ويتم ناس كتير
بتمنى ف يوم من الأيام يبقى ليه علاج،علاج ميموتش علاج يعالج بجد مش يموت
وبرجع أصبر نفسي وأقول إنما هي أيامٌ ونمضي وربنا كاتب عنده من يوم ما اتولدت هموت امته وازاي 
عندي ٢١ سنه عيشت منهم ٢٠ سنه ف نعمة الصحه والعافيه ف الحمد لله على كل حال 
مش طالبه غير إنكوا تدعولي ربنا يهون عليا الوجع اللي ف قلبي ويصبرني ويشفيني ويشفي مرضى المسلمين يارب
ادعولي كتير!

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Banana_63964 🇪🇬

منذ أسبوع واحد

شعور مكسور القلب

موضوع:

اكتر ذكره مؤلمه حصلتلك وومقدرتش تتخطها؟

لما عرفت ان اخويا عنده كانسر (ممكن تدعوله بالشفاء)مش قادره انسي خوفي عليه و مش قادره انسي كل لحظه كانت بتعدي و هو في المستشفي و تعبه بعد خروجه من المستشفي و جرينا بيه علي المستشفيات و عينه لما وقفت و مكنش قادر يحركها ممكن اللي يقدر يتبرع لجمعيه مستشفي سرطان اطفال اسكندريه 3939

Peanut_63801 🇪🇬 ربنا يشفيه و يعافيه و هدعيله كتير ف قيام الليل ربنا يصبرك بإذن الله هيكون كويس ♥🤲🏽

عرض الكل 12 نصيحة

Tofu_19483 🇪🇬

منذ أسبوعين

شعور محبط

هلا يا جماعه..مش عارفه دي المره الكام اللي بصيحلكوا فيها.. بس جايه أقولكوا ادعولي علشان خايفه جدًا ،طبعًا كلكوا عارفين إني توفي مريضة الكانسر اللي قرفتكوا بصياحي السنه دي.. بقالي فتره فيه دم بيطلع من زوري .. روحت للدكتوره وطلبت مني آشعه مقطعيه بالصبغه علشان لو لقدر الله حصل انتشار للورم ف الرئه.. أن

Donut_60758 🇪🇬

منذ شهر واحد

شعور قلق

انا والدتي عندها سرطان ومنتشر وانا معنديش غيرها حرفيا ووالدي متوفي وانا حاسة ان انا بموت كل يوم ولا عندي صحاب ولا اي حد في الدنيا ولا أقارب وبعاني من رهاب اجتماعي واكتئاب ومش عارفة اعمل ايه فكرت كتير في الانتحار بس للاسف مش بيجيب جراءة الدنيا وحشة اوي معايا وانا صابرة والله العظيم صابرة بس طول الوقت

Tofu_19483 🇪🇬

منذ شهر واحد

شعور مرهق

عبّر عن شعورك بشكل مجهول

محتاجه أحكيلكوا حاجه،طبعًا عارفين كلكوا إني مريضة كانسر وبتعالج،بس أنا حاليًا بمتحن وواخده أوضه لوحدي بس مش ساكنه مع طلبه أنا ،والكليه بتاعتي بعيده خالص عن أهلي ف أنا لوحدي،الصراحه أهلي ادوني فلوس كتير وقالولي إني أجيب حاجات مفيده بس وماما قالتلي اوعديني متجيبيش أي حاجه فيها مواد حافظه ولا شيبسي ولا أي حاجه ممنوعه منها،هي قالتلي أوعدها علشان هي عارفه إني علطول لما بوعد مبخلفش بوعدي بس للأسف أنا خلفت بوعدي معاها وبشتري كل حاجه ممنوعه منها ومش بجيب أي حاجه تفيدني خالص يعني بقالي أسبوع عايشه ع الشيبسي والكراتيه والإندومي،النهارده تعبت ومعدتي تعبتني وقلبي حسيته هيطلع من مكانه بس أنا مش عارفه أعمل ايه معنديش صحاب خالص ف مثلا نشترك سوا ف أكل أو كده والسكن اللي أنا فيه كله أوض منفصله كل واحد مع نفسه ودول ناس أكبر مني بكتير،غير إني ممنوعه أعمل أكل وأقرب من حراره ده غير إني برده ممنوعه من الأكل الجاهز بتاع المطاعم،أنا مبقيتش عارفه آكل ايه ف بقيت عايشه ع الشيبسي والحاجات دي لكن أنا مش عارفه أعمل ايه ومفيش صحه خالص ولا حتى ينفع أعمل أكل علشان ممنوعه أقرب م الحرارة علشان العمليه اللي عملتها،غير إن برده ممنوعه أعمل أي مجهود
مبقيتش عارفه أعمل ايه والنهارده أنا تعبت ومعدتي تعبتني وقلبي ودلوقتي حاسه بتعب عام وزعلانه علشان خلفت بوعدي وأنا مبحبش أخلف بوعدي خالص بس مش عارفه أعمل ايه وأنا لوحدي محتاسه بجد ومعنديش صحاب خالص

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Coffee_59390 🇪🇬

منذ شهر واحد

شعور محبط

أنا اتردت اني احكي علشان كل اما افتكر الموضوع قلبي بيتقطع في حد قريب مني قوي مش بس صاحبي ده أكتر من أخ كنت فاكر إننا هنتخانق على البلايستيشن نضحك على نفس النكت القديمة نتكلم عن السفر والمستقبل كأن الدنيا لسه في جيبنا بس فجأة الدنيا قلبت واكتشفت إنه بيحارب حاجة مش سهلة بيواجه حاجة كبيرة طلع بيعاني من

Strawberry_29946 🇪🇬

منذ شهر واحد

شعور مرتبك

عبّر عن شعورك بشكل مجهول

يا جماعه من يوم نزلت سألت أعمل إيه مع صحبتي اللي تعبانه بالسرط ان..
المهم إني بعتلها عملت إيه في يومي و رنيت عليها كنسلت إنهارده رنيت كمان مردتش و بعتتلي بتقول مترنيش ثاني مش عايزة أكلم حد، 
بجد مش عارفة أعمل إيه، خصوصًا إني  مش بعرف أتعامل أوي مع الناس بحاول بجد على قد ما أقدر،
و مش بيبقى عندي كلام، و لما بتكلم بتقولي كفاية ف بفضل ساكته بس بتكلم في إذا فيه حاجه مينفعش أسكت ساعتها مش بتقول حاجة بترد عليا عادي، 
يبان عليا إني نص اجتماعية و فعلاً كدا، يعني ببقى أوقات  و أوقات مش ببقى مخططه هنا هنا كذا و هنت كذا بجد هي بتيجي لوحدها كدا سعات بتكلم و سعات أكتر مش بتكلم، بفضل إني أسمع، و لما مش بدي حلول بحس إني مليش لازمه و منفعش في أي حاجة، بس في أوقات ثانية مش بحس بكدا عارفة إنو فيه ناس كتير كدا بس بجد تعبت..، و أوقات بقعد أقارن نفسي بغيري بحاول أقلل دا بس مش عارفة..
عندي حجات متناقضة مع بعض،بحاول أكون أحين بس المشوار صعب..
ببقى مضايقة من نفسي أوي لما مش بقدر أعمل حاجة لحد..بالذات إذا أشخاص بحبهم..
بجد حاسة إني تايهه أوي مع نفسي..
كتبت كلام كتير و الكلام جاب بعضه، أتمنى تفهموا🌸،
و تقولولي أتصرف إزاي مع صحبتي و هي مش معرفه أهلها بالمرض لأن علاقتهم مش أحسن حاجة و هي ساكنه بعيد عني و مش عارفة عنوان بيتها بضبط.

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

Apple_58054 🇪🇬

منذ شهر واحد

شعور عاطفي

فيه بنت بتحبني وانا عرفت ده من كلامها وكذا مره تلمح لده بس انا مش حابب اكسر مشاعرها ومن فتره عرفت انها عندها كانسر وده زادني أكتر اني اخاف اكسر مشاعرها او احرجها .. بصراحه انا مش بحب ارتبط بأي بنت لأني مش حابب اظلم حد معايا لاني ما خدتش لسه قرار ..المهم انه اخر مره لمحت ليا فيها تاني عملت نفسي مش فا

Banana_57704 🇪🇬 ولا تقرب ولا تبعد ولا تواجهها بحاجة ولا توضحلها انك فهمت تجاهل الأمر بس بدون تجريح وحاول تظهر ادامها انك متبلد المشاعر وان النوع دة من المشاعر بتحسه ملزق ومقرف وانك مش متخيل نفسك اصلا بتحب واحدة وانك عملى بتاع شغل وبس اعتقد هى هتيأس من محاولاتها بالشكل دة

عرض الكل 8 نصيحة

Strawberry_29946 🇪🇬

منذ شهر واحد

شعور ضائع

ازاي بتتصرفوا لما تعرفوا إنو صديق ليكم جاله مرض السرطان، و بنتعامل و نخفف عنه ازاي؟ خصوصًا إنو هي الأيام ديه بتضايق بسرعة جدًا و حساسة أوي و شايفة مفيش حد جمبها، مع إني كذا مره أقول لها نكون سوا في أي مكان بتروحه بس بتقول إنها عايزة تكون لوحدها حتى أول جلسة ليها مش عايزة حد معاها، ف بجد مش فاهمة..

Carrot_57430 🇪🇬 ربنا يعفي عنها انا عن نفسي بتعامل معاه عادي جدا كان مافيش حاجه بس بدعمو نفسيا و لو حتي بالكلام هتعند و تقلك لا مش عايزه حد معايا و تكرشك و تشتم خليكي بارده و تنحه وهيجي اليوم اللي تقوم فيه بالسلامه باذن الله بس اوعي حد يطوعها و يسبها لوحدها هي عايزا تتاكد ان اللي هيقف جنبها هيقف جنبها عشان بيحبها و عايزها موجودا مش عشان صعبان عليه اللي هي فيه ربنا يتمم شفاها علي خير باذن الله

عرض الكل 11 نصيحة

Pear_54544 🇪🇬

منذ شهر واحد

شعور مستنزف

موضوع:

ايه اكتر حاجه وجعتك ؟

يوم ١٥ / ١ / ٢٠٢٠ اتحبست ظلم في قضيه كبيره وفضلت التحقيقات شغاله وانا محبوس وفي الاخر اخدت براءه وطلعت يوم ١٧ / ٢ / ٢٠٢١ وبعدها باقل من اسبوعين يوم ٢٨ / ٢ / ٢٠٢١ ابويا مات 😔💔 كان يا حبيبي عنده كانسر والمرض اكل جسمه واتشعب من الكبد للعضم وكان طول ما هو صاحي بيتوجع مات وحسه اختفى من الدنيا وضهري ا

Grape_55100 🇪🇬 لانقول الا ما يرضي الله طبعا انا لله وانا اليه راجعون اكسد المرحله دي صعبه عليك بس حاول اما تفتكروا افتكرو بالدعاء والاعمال الكويسه ومتنساش نفسك وده الاهم علي الاقلل عشان تفرحوا في نومته اوعي تسيب نفسك لليأس والاحباط صدقني هتبقي نهايتهم ياريتني كنت عملت ودي هتوجع اكتر

عرض الكل 5 نصيحة

Tofu_19483 🇪🇬

منذ شهر واحد

شعور مرهق

عبّر عن شعورك بشكل مجهول

الاقتباس ده بيمثلني حقيقي
مثل شخص يسقط من الطابق الخمسين ويعجب بزهور الشرفات التي يمر بها في دربه إلى الموت
أنا حياتي بقت صعبه ف كل حاجه أنا لسه بتعالج من المرض الحقير ده بس كل الرعب ف قلبي علشان نوع الخلايا اللي عندي من أشرس أنواع الخلايا السرطانية وأنا حياتي بقت كلها قلق وخوف وضغط لا مني عارفه هعيش ولا هموت ولا ايه دنيتي مع المرض الزفت ده ولا ايه النهايه يا ترى بجد مين فينا هيكسب التاني!
مبقيتش قادره أستحمل وتعبت ونفسيتي تعبت من كتر الضغوطات اللي بعيشها ف سن المفترض إني أكون بعيش شبابي فيه،مش عارفه أقول ايه لكن بما إننا ف أيام جميله ف أنا أكتر واحده فيكوا محتاجه الدعاء و ف أمس الحاجه لكل دعوه ومش هفكركوا ب إن الدعوه بظهر الغيب مستجابه بإذن الله 
متنسوش تدعولي أستحلفكم بالله تدعولي علشان أنا مش عارفه يعني إذا كنت هعيش ولا لا بس أتمنى لو ربنا كتبلي عمر يكون عمر مليء بالطاعه والقرب منه ولو مكتبليش عمر يتجاوز عن سيئاتي ويغفر لي ويرحمني ويدخلني الجنه
ادعولي كتير
وبفكركم إنكوا متنسوش إن طالما عندكوا نعمة الصحه فكأنما حيزت لكم الدنيا ومتنسوش إن كل ما دون الصحه والأهل دون ولا تزعلوا نفسكوا الزعل آخرته وحشه زي ما انتوا شايفين كده أنا الكانسر جالي م الزعل ف معلش هتستفادوا ايه لما لقدر الله صحتكوا تتبهدل ؟
ولا أي حاجه ف ف ستين داهيه أي حاجه ما دام صحتكوا وأهلكوا بخير ومتنسوش تحمدوا ربنا على كل النعم ومتبصوش للي ف إيد غيركوا مهما كان اللي ظاهرلكم علشان الظاهر حاجه والباطن حاجات تانيه خالص
لا تنسوا أختكوا توفي الصغيره من الدعاء♥️
جزاكم الله بالأضعاف المضاعفه من دعائكم لي وجبر قلوبكم بما تتمنون♥️

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.