حب الذات

Strawberry_57255 🇪🇬

منذ 3 أيام

شعور آسف

موضوع:

لو رجع بيك الزمن هتحب نفس الشخص تاني؟

لو رجع بيا الزمن كنت هحب نفسى كنت مش هعدى تفكيرى و مقارنتى لنفسى بالناس اللى حواليا و انى ديما شايفة نفسى اقل من اى حد كنت ههتم لنفسى اكتر و هحبها اكتر لان شوية المشاعر و المقارنات اللى انا كنت فاكرة ان ملهاش لازمة خليتنى فى الوقت الحالى مش شايفة نفسى اصلا و بكرهها

Popcorn_28628 🇪🇬

منذ 3 أسابيع

شعور وحيد

الحمدلله أن الواحد أدرك بدري بدري أنه مش بتاع علاقات و ينفع فيها انا لما بقرب من حد بعك الدنيا بيشوفني مدلوق عليه و اني مش هقدر اعيش من غيره منا مبحبش اعمل تقدير لحد انا مش فارقله اصلا بعتذر كتير و بخاف علي زعله بشكر كتير حتي علي الكلام بس و بفضل افكر في اللي قولته و ممكن امسحه أو اغيره خلاص يا معلم

Coffee_26801 🇪🇬

منذ 3 أشهر

شعور مكسور القلب

أنا مش زعلانه أنا الفترة دي خلتني بقيت واقعية مبقاش فارق معايا أي حاجة ومش معنى كده إني بارده ومبحسش، بس كل موقف اتعرضت فيه لخذلان أو قلة تقدير أو عدم إهتمام كان بياخد من طاقتي لحد ما خلصت ومبقتش منتظره حاجة من أي حد، اللي عايز يعمل حاجة يعملها مش فارقة يعني مع الوقت هتفهم إن مش ضروري أو من الحاج

Lemon_52016 🇦🇪

منذ 4 أشهر

شعور لا مبالٍ

انا مش مغروره بس عارفه قيمتي كويس بحبني بزياده بفتخر بنفسي وبشوفني اجمل من اي حد مش محتاجه حد يقولي اني مميزه لاني عارفه ده من زمان ثقتي مش غرور دي نتيجه تعب ومجهود وحب ذاتي استحقه واللي مش عاجبه الباب يفوت جمل 💞😎

Banana_51073 🇦🇪

منذ 4 أشهر

شعور خجول

مخبيش عليكم يا جماعة أنا بحب دماغي أوي ، وبحب إني عايش فـ الطراوة كدا معرفش مين بيتكلم فـ إيه ولا مين بيكرهني ولا مين قصده يضايقني أنت بتحبني ؟ حبيبي والله خد حب كبير مش بتحبني ؟ خد حب كبير بردو و بكرة تحبني عشان أنا مأذتكش المفروض الانسان يصحى يدور ع الروقان و يكلم ناس رايقة بيحبها و بتحبه

Potato_38267 🇪🇬

منذ 5 أشهر

شعور لا مبالٍ

موضوع:

النرجسية

اعتقد في رأيي ان مفيش حد محتاج علامات علشان يتعرف علي النرجسي. كل البشر بدون استثناء نرجسيين. في منهم اللي وصلت نرجسيتهم للتطرف وفي منهم اللي عايز يظهرها لكن مبيعرفش وفي منه اللي بيخفيها وبيظهر التواضع الزائد عمدا لتحقيق نرجسيته.مفيش حد مبيحبش الاهتمام ومينفعش نكره الناس علي عيب كلنا بنعاني منه وبن

Hazelnut_49756 🇪🇬

منذ 5 أشهر

شعور منزعج

موضوع:

رساله عايز تقولها لحد بس م عارف.

عاوز اقول لواحدة كانت صحبتي في يوم من الايام انها بنيآدمة بياعة وانانية وكدابة في في مشاعرها لانها لو كانت بتحبني فعلا مكناش بعدنا من موقف لا يحتسب انه موقف اصلا وعاوزة اقول لواحدة صاحبتي تانية انها تبطل تقولي ان الناس عارفاني عشان انا ماشية معايا لان الانسان قرف بجد من حب الذات دا بقا بيطفح علي ال

Mango_11422 🇪🇬

منذ 5 أشهر

شعور خجول

حابة اكتب النهارده عن السنه اللي فاتت زي اليوم دا انا كانت عندي مشاعر سلبية كتير و شايفة المستقبل أسود كنت في علاقات مع ناس مش كويسين انا فخورة بنفسي و بأني اتخطيت كمية حاجات صعبة ونا كنت في نفسية وحشة بس أنا دلوقتي نفسيتي بقت أحسن حياتي مبقتش وردي بس راضية عن نفسي الحمدلله وراضية باللي ربنا كتبهول

Cherry_39881 🇪🇬

منذ 5 أشهر

شعور مليء بالحياة

موضوع:

إزاي بتمنعوا نفسكوا تشوفوا نفسكم بعين الناس التانية؟

مش عارفة انت ولد ولا بنت ف هحاول أعمم من الآخر كده حط في دماغك إن مش مهم الناس ، هما مش هيعيشولي حياتي نيابة عني يعني المهم انا شايف نفسي إزاي طبعا وبدون تردد انا أجمل وأحلى حد في عين نفسي ( مش هقولك مهما كان عندك عيوب ف انت أحلى حد ؛ لأن مفيش حاجة في الموضوع ده اسمها عيوب) أنا بسميها استثناءات،

Banana_51445 🇪🇬

منذ 5 أشهر

شعور ضائع

انا واثق في نفسي وكدا وكل يوم بفكر نفسي اني انسان طيب واستاهل كل الحب الي في الدنيا بس اوقات بلاقي ناس بيقولولي انت كذا مع اني عارف اني مش كذا فبتجاهلهم.. دلوقت هل لازم اقولهم يوقفو كلامهم مع العلم انهم ممكن ميوقفوش كلامهم ولا اكبر دماغي وخلاص؟ وانها حاجه مش مستاهله طالما انا عارف انا مين وعارف انا

Pumpkin_51444 🇪🇬 مخك اكبر منهم فمتردش عليهم كل دامش هيأثر على حد غيرك

عرض الكل 3 نصيحة

Coffee_21153 🇪🇬

منذ 5 أشهر

شعور لا مبالٍ

بعيد نشر حاجات كنت منزلها قبل كدا لعل حد يستفيد ومتنسوش جدودي الله يرحمهم من دعائكم جالي فلاش باك شريط حياتي كلها عدى قدامه اكتشفت ان انا عشت حياه لو حد تاني عاشها كان جاله توحد واكتئاب وكل الامراض النفسيه عشان كدا قررت احكي لعل وعسى حد يستفيد انا تقريبا عديت بكل المشاكل اللي اي انسان ممكن بمر بيها

عبّر عن شعورك بشكل مجهول

بعيد نشر حاجات كنت منزلها قبل كدا لعل حد يستفيد
ومتنسوش جدودي الله يرحمهم من دعائكم

جالي فلاش باك شريط حياتي كلها عدى قدامه اكتشفت ان انا عشت حياه لو حد تاني عاشها كان جاله توحد واكتئاب وكل الامراض النفسيه عشان كدا قررت احكي لعل وعسى حد يستفيد انا تقريبا عديت بكل المشاكل اللي اي انسان ممكن بمر بيها مش تعظيم ف نفسي ولا بقول ان انا مظلوم ولا كل الكلام دا 
اولا التنمر انا ممكن اكون اكتر انسان تشوفه ف حياتك اتعرض للتنمر سواء على شكل جسمي طولي شكل سناني ومع ان لون بشرتي ابيض الا اني كنت بتعرض للتنمر عليها برضو والتقيله كمان ع اسمي كل دا وانا طفل عنده ست سنين من اول ما دخلت مدرسه وانا بتعرض للتنمر 
نبدا اول حاجه بجسمي انا كنت نحيف وقصير جدا يعني كان الواحد اللي ف سني قدي مرتين طول وعرض وهاتك بقا تنمر من الاطفال اللي ف سني ايدا انت اوزعه عود قصب خله سنان وكل الكلام دا وانا كنت بقابل كل دا بوجه مبتسم عادي جدا ولا كأن في حد بيتكلم مع ان انا طفل المفروض اروح اعيط لامي واشتكيلها بس سبحان الله كنت عادي جدا وواخد الموضوع ببساطه وبالعكس انا كنت بحاول اتخن مش عشان التنمر ولا عشان ارضي حد كان عشان نفسي انا مكانش عاجبني شكل جسمي بس لنفسي اي حد ملوش دعوه بشكلي وزود عليها ان انا مولود باسنان معووجه او منحنيه لجوه كل سناني معووجه وفي فرق بين اسناني اللي قدام وتنمر عليها بردو بس دي انا كنت بقول هعمل تقويم لما اكبر عادي 
لون بشرتي ابيض عادي جدا وكان شعري دهبي كمان بس بسبب جهل الاطفال اللي معايا ومن غبائهم كانوا بيتنمروا عليا مع ان اي حد هيقول دي حاجه جميله الا ان دول تنمروا بمعنى كان لما حد يشوفني يقولي انت عامل زي البنات وانت بنت اجنبيه وعامل زي الاجانب وانا كنت بقابل الموضوع ببساطه وبالعكس كنت بقول دا هما متغاظين المشكله اللي بيتنمر دا كان شعره اكرت وسنانه صفرا وبشرته سوده ( طبعا مع احترامي لاي شخص بشرته سوده او غامقه دي مش حاجه تعيب فيك بالعكس انت ممكن تكون اجمل مني عادي ) انا بتكلم ف مبدا ان انت اصلا مختلف عني يعني ممكن اتنمر عليك عادي بس عشان انا محترم وعارف ان انت زيك زيي عند ربنا وخيركم عند الله اتقاكم مش ابيضكم بشره مكنتش بعلق ع شكل اي انسان 
كانوا بيتنمروا ع طولي حتى بعد ماكبرت بقوا يقولوها بصيغه هزار  يعني مثلا وانا كبير بنت عمي كانت مخطوبه جديد ف بتقول خطيبها بهزار كدا تدي دا كام سنه قالها رابعه او خامسه ابتدائي وانا ساعتها كنت داخل ثانوي شايف الفرق الكبير ف السن اللي هو شايفه لو اي حد اتقاله الكلمه دي هيشيل جواه ويكره حياته انما انا خدتها عادي جدا 
نرجع تاني لما كنت طفل انا دخلت تلت مدارس وانا ف ابتدائي مش بسبب التنمر القصه ان انا مولود ف 12/2007 تقديم المدرسه بيقبل من شهر 10 يعني كدا انا المفروض اقدم ان انا 2008 واضيع العشر شهور دول او بمعني اصح اضيع السنه كلها ابويا طلع عينه معايا انه يدخلني السنه دي وقعد يلف لحد ما توصل لحل وهو انه يقدملي ف مدرسه ف بلد تانيه بعيد ويقدم طلب ان انا ادخل المدرسه القريبه مستمع( مستمع يعني مليش بسكوت ولا كتب ولا ليا اي علاقه بالمدرسه بحضر الحصص فقط ) الكلام دا كان ف اولى ابتدائي اول يوم مدرسه عدى عادي تاني يوم بدا تسليم البسكوت للاطفال وانا طبعا قاعد ف الفصل جه العامل اللي بيسلم البسكوت اداني كيس زي باقي الاطفال وانا ساعتها معرفش ان انا مليش بسكوت طفل فرحان وتيجي المدرسه وتروح واخداه من ايدي وتقوله لا دا مستمع ملوش بسكوت زعلت اوي ساعتها طفل صغير فرحان بالبسكوت روحت البيت وتقريبا دي كانت المره الوحيده اللي اشتكيت فيها لامي روحت اترميت ف حضن امي وقعدت اعيط بحرقه طفل صغير وحكيتلها الموقف قالتلي متزعلش المدرسه التانيه هتبعتلك البسكوت بتاعك طبعا مفيش بسكوت ولا حاجه بس انا فرحت المهم جيت تاني يوم روحت خالتي قابلتني وقالتلي خد البسكوت بتاعك اهو من المدرسه التانيه ( خالتي ساكنه معانا ف نفس البلد وجنبها مدرسه ازهر وانا كنت مقدم عام بقت تشتريلي كيس البسكوت من الاطفال اللي ف المدرسه الازهر وتقولي خد بعتينلك دا) وانا كنت بفرح اوي ساعتها ربنا يجازيها خير زي مكانت بتجبر بخاطري كل اللي كان مضايقني ساعتها ان انا عمي مدرس ف نفس المدرسه وابنه قدي وقاعد جنبي كان ييجي يديه بسكوت زياده للبيت وانا ولا كأني قاعد جنبه 
المهم انا كنت مقدم ف المدرسه البعيده دي وبروح هناك ساعت امتحانات الفاينل بس المدرسه دي كانت ازهر يعني دينيه بيدرسوا قرءان وكدا  وانا كنت بحضر ف مدرسه عام يعني مش حافظ قرءان جت امي ربنا يخليها حفظتني قبل الامتحان وعدت الحمد لله كل دا وانا ف اولى ابتدائي

ندخل بقا ع تانيه ابتدائي المدرسه الازهر اللي جنب خالتي فتحت تقديم صغار السن يعني بيقبلوا صغار السن عادي ابويا قدملي هناك طبعا وانا كنت داخل المدرسه مش عارف حد ولا كان عندي صحاب  خالص كنت متوحد وانطوائي وكنت صاحب نفسي كنا لما تطلع بريك كنا ننزل حوش كدا واللي يلعب مع صحابه واللي ياكل معاهم وكان مسموح لينا نخرج برا المدرسه عادي بس نرجع تاني اول ما البريك يخلص بحكم ان انا مليش صحاب هقد جوا ليه المهم المدرسه كانت ملحقه بمسجد كبير كانوا الاتنين لازقين ف بعض وانا كنت اطلع الف لفه حوالينهم والبريك يخلص وادخل تاني وجه اليوم اللي صاحبت فيه اول صاحب ليا انا كنت اول مره اقف ف الحوش ف البريك وما اطلعش برا وجم شويه ولاد اكبر مني ب حاولي تلت او اربع سنين بيتريقوا عليا وانا طنشتهم وجه واحد يضايقني وضربني بالقلم كان ساعتها الولد اللي بقا صاحبي دا واللي اسمه خالد مكانش واقف معاهم بس جه على لحظه القلم وجه وزعق لصاحبه واتخانق فيه وجالي صالحني وقعد معايا ساعتها مكونتش عايز البريك يخلص عشان افضل قاعد معاه المهم اتصاحبت عليه وبقيت اوقات امشي معاه وانا راجع البيت كان صحبي اوي ربنا يجازيه خير لسه عارفه لحد النهارده 
جه بقا اليوم اللي غير حياتي 180 درجه احنا الفصل عندنا كان 20 طالب يعني كان صغير بس انا مكنتش مصاحب حد المهم كنت ف البريك وخالد غالبا كان غايب وجم تلت ولاد اكبر مني بسنه كانوا بيجروا ورا بعض وواحد شدني وقعني على الارض وانا تلقائيا شتمته او زعقتله الواد معجبهوش الكلام قام جاي هو وصحابه عايزين يضربوني وانا افجرت مع اني هادي جدا جدا بس مسكت التلاته ساعتها كلتهم علقه لحستهم تراب الحوش وطلعت اجري على الفصل ولاول مره اعيط برا البيت قعدت اعيط بحرقه جامد اوي وكنت حاطط راسي على الديسك وبعيد فجاه سمعت صوت حولي برفع عيني لقيت العشرين واحد اللي معايا فالفصل ملمومين عليا وسمعتهم بيقولوا هنقول للاستاذ متخافش ساعتها فرحت اوي من قلبي ان في حد بيطمني واللي فرحني اكتر ان هما عارفين اسمي ولقيتهم راحوا جري ندهوا المدرس وقالوله الحق حذيفة بيعيط ولحسن الحظ نفس المدرس كان عليه الحصه دي لنفس الفصل اللي فيه التلت عيال خدني من ايدي وقالي شاولي عليهم وكمل عليهم ضرب ساعتها فرحت اوي ان العيال اللي معايا ف الفصل عارفيني ومن ساعتها بدات اتعرف عليهم كلهم واتصاحبت عليهم بس بردو التنمر مسابنيش ف حالي 
زي ما قلت انا اسمي حذيفة على اسم الصحابي حذيفة بن اليمان رضي الله عنه
انا ابويا شيخ واحنا عيله متدينه الحمدلله وكل اسماءنا انا واخواتي اسماء الصحابه رضي الله عنهم 
( حذيفه، بسام، اسماعيل، جويرية، معاويه، وماريه )
كنت بتعرض للتمر بسبب اسمي انا كنت الوحيد ف البلد اللي بالاسم دا كان بقا اللي يقول دا اسم بنت والي يقول زوحليقه حفيزه وحاجات كتير كدا المهم انا اللي مستغربه من نفسي دلوقتي هو ان انا عمري ما اشتكيت لامي من  تنمر على اسمي لان انا مكونتش بتضايق اصلا يعني سبحان الله مع اني طفل الا ان انا ايماني كان قوي كنت بقول مانتوا جهله ازاي مسلمين ومش عارفين الصحابي حذيفة وكنت بقول الكلام دا لاي حد كان بيتريق حتى ان في مدرس اتريق على اسمي وقولتهاله بالنص انت ازاي مسلم ومش عارف الصحابي حذيفة بن اليمان المدرس تنح واتكسف ومن ساعتها مقدرش يتتريق على اسمي مع ان انا وغيري وناس كتير جدا شايفين ان اسمي من اجمل الاسماء اللي ممكن طفل يتسمى بيها 
انا دلوقتي 17 سنه ولحد دلوقتي بقابل ناس جاهله كتير مش عارفين الاسم وبيتتريقوا حتى وانا بحجز الدروس في مدرس بيستظرف وبيقولي انت متاكد انك ف اولى ثانوي( لما كنت لسه ف اولى ) وبيضحك ع اساس انه يضحك الاسيستنت وكدا قومت كسفته وقالتله اه قالي دا جسم واحد ف اولى ثانوي قولتله اه تحب اجيبلك شهاده الميلاد قام ساكت واتخانقت طول الثانوي ف اكتر من اسيستنت بسبب انهم بيكتبوا اسمي غلط او ينطقوه غلط ومصرين انهم صح يعني مره كنت بسجل حضور بقول لاسيستنت تكب اسمي بقولها حذيفة قامت التانيه تقول حذيف اقولها لا حذيفة تقول لا حذيف قومت موقف الدور ووقفت الناس اللي ورايا ومسيبتها الا لما قالت حذيفة
دلوقتي انا 17 سنه ثانوي عام 2025 الحمدلله من اكتر الناس اللي اجتماعية ف دفعتي اتعرفت ع ناس كتير جدا جدا جدا ومحبوب جدا وسط الناس  ووسط دفعتي ووسط مدرسيني وحتى الاسيستنت كلهم يعرفوني وبيحبوني وطولت وطولي بقا 170 ووزني حاليا 50 كيلوا لسه رفيع بس بحاول ازيد وحتى لو مطولتش او زيدت انا متقبل نفسي وبحب نفسي زي ما انا ومش مستني راي حد فيا  
فالنهايه حابب اقول متوقفش حياتك عشان حد خلي ايمانك قوي وواجه اي حد يتتريق عليك بالعكس خد التمر وحوله لطاقه ايجابيه وحسن من نفسك عشان نفسك ومتسمعش كلام حد وتخليه يوقفك او يزعلك حتي لو بيهزر او بيتكلم جد قوله تمام وولا كأنك سمعت منه حاجه 
دا كان جزء من حياتي اتمنى يكون استفادتوا منها اي حاجه ولو استفدت دعوه حلوه منك وربنا يوفقنا جميعا ❤

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.