تشوه الوجه

Apple_65355 🇪🇬

منذ 15 ساعة

شعور محبط

#فضفضه السلام عليكم... انا حابب اقول كلمتين للكل الناس بصفه عامه وللبنات بصفه خاصه ... انا واحد عندي ٣٠ سنه بدور علي عروسه ومش لاقي رغم اني الحمد لله عارف ربنا وبصلي ومقتدر ماديا وعندي شقتي ومحل ... !! طب ليه مش لاقي لان للأسف اتولدت بتشوه في نصف الوجه جهة العين وبعض الاصابع مش كامله ..!!! انا بد

Cherry_44067 🇪🇬 اللى أنا واثقة بيه أن كل الناس ربنا مبتليهم بحاجة ممكن حد شايفينه أنه كامل ولكن مليون فالمية عنده ابتلاء . و كمان لصاحب البوست والله ربنا هيكرمك لأنك راضي مش صاخط على قضاء الله .

عرض الكل 19 نصيحة

عبّر عن شعورك بشكل مجهول

#فضفضه

السلام عليكم...
انا حابب اقول كلمتين للكل الناس بصفه عامه وللبنات بصفه خاصه ...
انا واحد عندي ٣٠ سنه بدور علي عروسه ومش لاقي رغم اني الحمد لله عارف ربنا وبصلي ومقتدر ماديا وعندي شقتي ومحل ... !!
طب ليه مش لاقي لان للأسف اتولدت بتشوه في نصف الوجه جهة العين وبعض الاصابع مش كامله ..!!!

انا بدور عن طريق خاطبه ف الاقي الخاطبه بتقولي شوف لك وحده مش مؤهل عالي او عندها اعاقه علشان ترضي بيك حتي لو اعاقه مش ظاهره...

اتكلم عن اهل العروسه.... 
لا احنا مينفعناش حد عنده مشكله .. بنتنا مش اقل من فلانه..!!
مش مسموح حتي بدخولي البيت واقعد اتكلم معاها وتتكلم معايا يمكن يحصل قبول ..!!

اتكلم عن البنت... 
انا ليه اتجوز واحد عنده اعاقه وانا قدامي الشباب الزي الفل كتير ليه احط نفسي ف موقف زميلتي او قريبتي تقولي ملقيتيش غير ده وتتجوزيه...!! ... حبيبتي انتي الهتعيشي مش صاحبتك ولا اختك ولا اهلك علشان تسمعي لتفكيرهم المعاق اسف ف الكلمه يعني .. انتي لو مرتاحه كملي وحطي صوابعك ف عين التخين وخدي الخطوه ووافقي وخلي عندك اصرار لللموضوع مش علشان حد قالك كلمتين يبقي هو صح .. لا اقعدي معاه شوفيه اسمعيه افهميه مش شرط من اول مره اطلبي يكون في قعده تانيه لكن مش من قبل ما يدخل تسمعي لكلام الحوليكي او لنفسك دي مصيبه في حد ذاتها..

اتكلم عن الحياه بشكل عام ...!! 
للاسف لا عارف اشتغل في مكان كويس مع ان عندي خبره ف مجال الكمبيوتر وحاليا بدرس برمجه 
ولا لاقي اصحاب بجد وتقريبا كده بقت كلها مصالح اليومين دول

طب الزيي يعمل اي يموت نفسه ؟! مش منطقي اكيد ..!!.
طب انت راضي .. ايوه راضي ومقتنع مليون ف الميه بقضاء ربنا وقدره وان الله اذا احب عبد ابتلاه .. ❤️

انا نفسي اقول كلمه لكل حد بيفكر كده سواء الاهل او البنت او حتي الراجل انه يصاحب راجل زيه بس عنده مشكله وبيرفض  مصاحبته اقسم بالله انتو الناس مريضه ومعاقه فكرياً وذهنياً لا الشكل بيدوم ولا الفلوس بتدوم ولا الصحه بتدوم بس الانسان لما يبقي ابيض ونضيف من جواه دي بالدنيا ومافيها .. واقسم بالله كل واحد قال كلمه او اتصرف تصرف وجرح بيها حد لهتترد له بس ف وقتها وساعتها هيفتكر كلمته القالها او التصرف العمله تجاه واحد زيي (الدنيا سلف ودين) وهيترد لك قبل ما تتكفن وتدخل قبرك ..!!

مش علشان اتولدت بابتلاء ف يتكتب عليا اعيش حياتي محروم من حجات كتير زي اني اشتغل شغل كويس ف مكان كويس من غير تنمر وحقد ولا ياعم دا انت ٥%  +  ارتبط ببنت كويسه + الاقي صاحب وراجل جدع ف ضهري لكن احنا ف مجتماعتنا العربيه بنفكر بعقلنا وبنفكر ف كلام الناس قبل ما بنشوف احنا عايزين اي علشان نشوف احنا لو عملنا الاحنا عايزينه ده الناس هتقول علينا اي لو كلام حلو تمام نتوكل علي الله ولو كلام وحش لا ياعم فكك ونكبر دماغنا ...

ملحوظه مهمه جدا الكلام للفئه المقصوده من الناس دي الهم الاغلبيه العظمي الباقي الا من رحم ربي تفكيرهم العكس تماما ...
ملحوظه كمان انا مش داخل اقول الكلمتين دول علشان الاقي حد يقولي كلمني هجوزك او كلمني هنبقي اصحاب ..

لا تسلم اوتسلمي .. ربنا عارف انا شوفت اي وعيشت اي وحاسس ب اي وقادر يعوضني فغمضة عين عن كل حاجه حصلت وانا مستني عوضه بجد سواء ف شغل كويس او زوجه صالحه او صاحب راجل ف ضهري ومحسش اني لوحدي ف الدنيا ومش من حقي اعيش زيي زي اي انسان سوي  يمكن اكون مستعجل وده بسبب النفسيه الادمرت من كلام وتصرفات الناس بس انا متاكد ان فرج ربنا كبير وجاي .. 
الحمد لله انا عايش حياتي كويس زيي زي اي حد بالعكس ممكن اكون احسن وده مش تنمر بس زي ما بيقولو من شاف بلاوي الناس هانت عليه بلوته .. !!

حبيت افضفض مش اكتر

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

محتوى للبالغين

قد يحتوي هذا المحتوى على مصطلحات أو حالات غير مناسبة للجميع. اعرف السبب

عبّر عن شعورك بشكل مجهول

عندي ٣ مشاكل للاسف شبه مدمرين حياتي ...

🚫كنت منزلها واتمسحت معرفش ليه.. حبيت اقول علشان القراء ورد ميتعبش نفسه ويقرا تاني ...!!🚫

اول مشكله..!!
انا مدخن VAPE  بس الاول كنت بشرب سجاير او شيشه (معسل)  بالنسبه للسجاير علبه ف يوم واحد واحيانا مكانتش بتكمل اليوم
بالنسبه للشيشه(معسل) كنت بشرب مش اقل من ٤ ل ٨ حجره في اليوم 
بطلت كل ده وبقيت بشرب vape وبس وبعدت عن كل ده .. طب نوع اللكويد ايه بريميوم سولت نيكوتين50%..

طب هل بعاني من مشاكل صحيه بسبب التدخين ؟! الحمد لله لا 
طب اي مشكلتي ؟! مشكلتي اني حاليا بدور علي عروسه والاغلب بتبقي عايزه غير مدخن 
طب انا مدخن بقالي قد اي؟! تقريبا فوق ال ١٠ سنين

تاني مشكله..!!
ادمان العادة السريه 
مدمن للعاده السريه من وانا عندي ١٣ سنه للاسف ... كنت بعملها تقريبا ١٠ مرات ف اليوم وحاليا انا ٣٠ سنه (اعزب) وبعملها مرتين او ٣ مرات بالكتير  والسبب مش بس الفراغ لان حتي لو مشغول ومروح مقتول من الشغل وطالبه معايا اعملها بدخل اعملها واخد دش واطلع انام.. تعبت منها وزهقت غير كده حياتي مش احسن حاجه وانا عارف ان للاسف ممكن تكون لاسباب كتير بس السبب الرئيسي هو الذنب ده (ذنوب الخلوات) بحاول اقرب من ربنا مع العلم انا لغاية ما دخلت اولي ثانوي كنت بصلي الفرض بفرضه في الجامع وفي الصف الاول وكنت بأذن وسعات بصلي بالناس .. بس للاسف والدي افتكر اني هبقي من المتشددين ودعي وقالي انا دعيت ان ربنا يبعدك عن الطريق ده لان كنت بحرم الحرام ومفيش اغاني ولا مسلسلات وعري والكلام ده

ثالث مشكله..!! 
ربنا ابتلاني بظروف خاصه (تشوه خارجي في الوجه) 
الحمد لله مش معترض علي ده ولا كاره ده وعايش حياتي بشكل طبيعي ومش محتاج لاي حد ف اي حاجه ، طب فين المشكله؟!

هحكيلكم المشكله..!!وهيكون معاها حل لموضوع العادة السرية لاني جربته..!!
المشكله ان معنديش اصحاب لا اولاد ولا بنات ..!! 
مش عارف اشتغل شغل كويس في مكان كويس ..!! 
ديما بحس ان الناس بتتعاطف معايا ودي اكتر حاجه بكرها..!!

للاسف كل ما اكلم بنت وتشوف صورتي تعمل بلوك وتقول انت مشوه وانت معاق الا من رحم ربي نسبتهم قليله بس ف الاخر بيمشوا مفيش وحده استمرت والله اعلم اي السبب لان انا نفسي معرفش ..!!

للاسف برضوا كل ما اجي اصاحب حد (ولد) احس ان علشان مصلحه او في استفاده مني او علشان يعرف دخلياتي وخصوصياتي وانا مش بقول لحد حاجه عن حياتي وخصوصياتي انما حد يعرفني ويكون صاحبي للاسف ملقتش الشخص ده لحد دلوقتي..

للاسف برضوا حاليا انا بدور علي عروسه عن طريق خاطبه وجروبات علي النت وبرامج تواصل .. وكل ما حد يشوف صورتي الاقي كميه تعاطف رهيبه وكلام صعبانيات بشكل فظيع ورغم كل ده برضوا مفيش وحده قالت لي في عروسه ولو قالت بتبعت لها صوري وبتقولي رفضت .. !!

طب معلش هو الزيي يعمل اي يموت نفسه ولا يعمل اي ( لا شغل ولا جواز ولا اصحاب ) طب اي انا عايش ليه ...!! نيجي بقي للكارثه الاكبر .. كل الحواليا من قرايب ومعارف عن طريق الاهل فاكرين اني الشخص المفيش منه اتنين فلوس وعز والدنيا والعه معايا والكلام البيتقال ف ضهري وفي وشي قسما بالله يحرق الدم لان مش موجود اصلا .. اه وضعي المادي كويس والحمد لله علي ده بس البيتكلموا دول وضعهم المادي ضعف وضعي يمكن ١٠٠ مره شارين شقق في اماكن جديده ومحلات غير فيلا في الساحل ايجارها بس بمبلغ وقدره غير احدث عربيات واحدث موبايلات ف ايدهم .. بس هو الكحكه ف ايد اليتيم عجبه زي ما بيقولو

واخيرا الحمد لله علي كل الانا فيه انا متاكد ان في ناس اسواء مني بكتير ومتاكد وعارف ان ربنا لا يكلف نفسا الا وسعها بس انا تعبت من الحياه والناس والبيحصل ووضعي في وسط الناس دي

طيب نيجي مثلا لموضوع زي العادة السرية وعلاقتي بربنا ...
لاحظت كتير لما بيبقي في بنت ف حياتي وحاكي لها عن حجات كتير وعارفه وضعي اني بقلل او شبه مبعملش العادة السريه.. طيب وعلاقتي بربنا بتكون احسن بصلي مش بتكاسل وهي بتتابع معايا موضوع علاقتي بربنا ...

هتكلم عن حاجه اخيره وهي موضوع الجواز .. للاسف والدتي كلمت خاطبه عليا وشافت صورتي ولما شافتها قالت لها الاحسن تشوفي له وحده عندها اعاقة علشان يبقو هم الاثنين متساوين ومتجيش تعايره بعد كده وللاسف كمان والدتي مقتنعه بالكلام وجايه تقولهولي .. طبعا انا اتخانقت معاها وحصلت مشكله وصوتنا بقي عالي علي بعض وكان ردي عليها دي وحده معاقه وتفكيرها معاق انتي ازاي جايه تقوليلي كلام اهبل زي ده ومقتنعه بيه ومصدقاه انا مش هتجوز وحده عندها اعاقه لا ظاهره ولا حتي مش ظاهره مش معني كده اني رافض المشكله العندي او معترض علي خلقة ربنا لا بالعكس بدليل انها قبل كده جابت لي عروسه وعندها اعاقه مركبه عين زجاج وانا وافقت بس لما يبقي الكلام بالتجريح ده طبيعي ارفض المبداء من الاساس ووالدتي قالت لي مفيش وحده هتقبل بيك الا قلبل جدا ودور بقي انت وهات وحده ..

وللأسف انا لا في شغلي في بنات ولا بقابل او بحتك ببنات باي شكل من الاشكال ونفسي فعلا الاقي بنت ترضي بظروفي واقولهم اهي موافقه يلا نروح لأهلها..   كل المواضيع دي تعبتني جدا واذتني نفسيا وللاسف هم مش حاسين او شايفين انه عادي

واسف جدا طولت بس حبيت افضفض

نصيحة خاصة

قم بالتبديل لتلقي النصائح بشكل خاص على منشورك؛ وإلا سيكون مرئيًا للجميع.

التجربة أفضل عبر التطبيق

حمّل تطبيق توهيل على هاتفك لتجربة أسرع