"أنا عندي 30 سنة وبحاول أتجوز.. ليه المجتمع بيظلمني؟"

Question

#فضفضه

السلام عليكم...
انا حابب اقول كلمتين للكل الناس بصفه عامه وللبنات بصفه خاصه ...
انا واحد عندي ٣٠ سنه بدور علي عروسه ومش لاقي رغم اني الحمد لله عارف ربنا وبصلي ومقتدر ماديا وعندي شقتي ومحل ... !!
طب ليه مش لاقي لان للأسف اتولدت بتشوه في نصف الوجه جهة العين وبعض الاصابع مش كامله ..!!!

انا بدور عن طريق خاطبه ف الاقي الخاطبه بتقولي شوف لك وحده مش مؤهل عالي او عندها اعاقه علشان ترضي بيك حتي لو اعاقه مش ظاهره...

اتكلم عن اهل العروسه.... 
لا احنا مينفعناش حد عنده مشكله .. بنتنا مش اقل من فلانه..!!
مش مسموح حتي بدخولي البيت واقعد اتكلم معاها وتتكلم معايا يمكن يحصل قبول ..!!

اتكلم عن البنت... 
انا ليه اتجوز واحد عنده اعاقه وانا قدامي الشباب الزي الفل كتير ليه احط نفسي ف موقف زميلتي او قريبتي تقولي ملقيتيش غير ده وتتجوزيه...!! ... حبيبتي انتي الهتعيشي مش صاحبتك ولا اختك ولا اهلك علشان تسمعي لتفكيرهم المعاق اسف ف الكلمه يعني .. انتي لو مرتاحه كملي وحطي صوابعك ف عين التخين وخدي الخطوه ووافقي وخلي عندك اصرار لللموضوع مش علشان حد قالك كلمتين يبقي هو صح .. لا اقعدي معاه شوفيه اسمعيه افهميه مش شرط من اول مره اطلبي يكون في قعده تانيه لكن مش من قبل ما يدخل تسمعي لكلام الحوليكي او لنفسك دي مصيبه في حد ذاتها..

اتكلم عن الحياه بشكل عام ...!! 
للاسف لا عارف اشتغل في مكان كويس مع ان عندي خبره ف مجال الكمبيوتر وحاليا بدرس برمجه 
ولا لاقي اصحاب بجد وتقريبا كده بقت كلها مصالح اليومين دول

طب الزيي يعمل اي يموت نفسه ؟! مش منطقي اكيد ..!!.
طب انت راضي .. ايوه راضي ومقتنع مليون ف الميه بقضاء ربنا وقدره وان الله اذا احب عبد ابتلاه .. ❤️

انا نفسي اقول كلمه لكل حد بيفكر كده سواء الاهل او البنت او حتي الراجل انه يصاحب راجل زيه بس عنده مشكله وبيرفض  مصاحبته اقسم بالله انتو الناس مريضه ومعاقه فكرياً وذهنياً لا الشكل بيدوم ولا الفلوس بتدوم ولا الصحه بتدوم بس الانسان لما يبقي ابيض ونضيف من جواه دي بالدنيا ومافيها .. واقسم بالله كل واحد قال كلمه او اتصرف تصرف وجرح بيها حد لهتترد له بس ف وقتها وساعتها هيفتكر كلمته القالها او التصرف العمله تجاه واحد زيي (الدنيا سلف ودين) وهيترد لك قبل ما تتكفن وتدخل قبرك ..!!

مش علشان اتولدت بابتلاء ف يتكتب عليا اعيش حياتي محروم من حجات كتير زي اني اشتغل شغل كويس ف مكان كويس من غير تنمر وحقد ولا ياعم دا انت ٥%  +  ارتبط ببنت كويسه + الاقي صاحب وراجل جدع ف ضهري لكن احنا ف مجتماعتنا العربيه بنفكر بعقلنا وبنفكر ف كلام الناس قبل ما بنشوف احنا عايزين اي علشان نشوف احنا لو عملنا الاحنا عايزينه ده الناس هتقول علينا اي لو كلام حلو تمام نتوكل علي الله ولو كلام وحش لا ياعم فكك ونكبر دماغنا ...

ملحوظه مهمه جدا الكلام للفئه المقصوده من الناس دي الهم الاغلبيه العظمي الباقي الا من رحم ربي تفكيرهم العكس تماما ...
ملحوظه كمان انا مش داخل اقول الكلمتين دول علشان الاقي حد يقولي كلمني هجوزك او كلمني هنبقي اصحاب ..

لا تسلم اوتسلمي .. ربنا عارف انا شوفت اي وعيشت اي وحاسس ب اي وقادر يعوضني فغمضة عين عن كل حاجه حصلت وانا مستني عوضه بجد سواء ف شغل كويس او زوجه صالحه او صاحب راجل ف ضهري ومحسش اني لوحدي ف الدنيا ومش من حقي اعيش زيي زي اي انسان سوي  يمكن اكون مستعجل وده بسبب النفسيه الادمرت من كلام وتصرفات الناس بس انا متاكد ان فرج ربنا كبير وجاي .. 
الحمد لله انا عايش حياتي كويس زيي زي اي حد بالعكس ممكن اكون احسن وده مش تنمر بس زي ما بيقولو من شاف بلاوي الناس هانت عليه بلوته .. !!

حبيت افضفض مش اكتر

Tofu_19483 🇪🇬 · Answer

معاك حق ف كل كلمه قولتها..وأنا كمريضة كانسر وعملت عملية استئصال اتعرضت للرفض بسبب ده وبسبب مرضي وف مره نزلت بوست كنت بسأل فيه يا ترا ممكن ألاقي حد يتقبلني زي ما أنا حد رد عليا بمنتهى البجاحه حتى مراعاش مشاعري قالي وأنا آخد واحده تعبانه ليه وعيالي يورثوا مرضها لما ممكن آخد واحده سليمه من الأول،رغم إن محدش ضامن عمره وكتير خدوا بنات سليمه وتعبوا بعد الجواز ف ملهاش علاقه يعني لكن اكتشفت إن عقول الناس

Tofu_19483 🇪🇬 · Answer

عقول الناس هي اللي مريضه واللي جواه نقص بيطلع أي عيب ف اللي قدامه والإنسان السوي فعلًا هو اللي بيركز ع الجوهر لأن الشكل مش بيدوم لذلك وعدت نفسي إني هسيب موضوع جوازي ده على ربنا وهو قادر على كل شيء زي ما ابتلاني بمرضي هيرزقني بحد يحبني زي ما أنا علشان كده متفكرش كتير ف المواضيع دي أنا من أول مرضي وملقيتش حد جنبي وكل اللي كنت فاكره إنهم صحابي بعدوا عني ف فله ف ستين داهيه أي حد ورأيهم فينا ف الزباله

Apple_65355 🇪🇬 · Answer

ربنا يشفيكي ويعافيكي ويخفف عنك ويجعله في ميزان حسناتك ويجعل نهاية صبرك خير وفرح وسعاده يارب ويعوضك خير ف الاخره قبل الدنيا لان الدنيا فانيه ومتستاهلش بس احنا العاملين لها قيمه للاسف واحمدي ربنا ان ابتلاكي بالابتلاء ده علشان يعرفك مين بيحبك بجد ومين سندك وضهرك ومين وجوده زي عدمه .. الناس مش بتبان غير في المواقف الصعبه وفي الشده ساعتها بتبان النفوس والشخصيات الحقيقه

Apple_65355 🇪🇬 · Answer

والشخص القالك اخد وحده سليمه ده ربنا هيحاسبه ف الدنيا قبل الاخره وهيرزقه بوحده معندهاش اي مشكله بس مجرد ما يتجوزها هيحصلها مشكله ووقتها هيفتكر كلمته لكي ساعتها هيندم اشد الندم وللاسف ممكن يطلق البنت دي لان واضح انه شخصيه مريضه اه هي هتكون ملهاش ذنب بس ربنا هيكرمها بالاحسن منه

Tofu_19483 🇪🇬 · Answer

يارب اللهم آمين ويشفي كل مرضانا المسلمين يارب،الحمد لله على كل حال،وربنا يريح بالك وقلبك ويرزقك من حيث لا تدري ولا تحتسب وكبر دماغك محدش يستاهل زعلك أيًا كان هو مين وادعي ربنا يرزقك بالزوجه الصالحه ويصب عليك الرزق صبا صبا يارب

Apple_65355 🇪🇬 · Answer

للاسف احنا بقينا ف زمن رقم واحد الفلوس ورقم اثنين الشكل لكن لا بنبص للقلوب ولا للدين ولا للقبول الرباني  احنا بنبص علي حجات ف رمشة عين تضيع ونخسرها وبننسي نبص علي الاساسيات الهي مستحيل تتغير لو مهما مر بينا الزمن وفي الاخر الراجل بيندم والبنت بتندم والطلاق بيزيد والبيخسروا ويتبهدلوا الاولاد .. لكن لو بصينا للاساس من الاول مش هيحصل ده كله

Tofu_19483 🇪🇬 · Answer

يومها كنت منهاره من كلامه الصراحه وقلبي وجعني جدًا،بس فيه عقول كده عقول تفكيرها محدود وللأسف ف رحلة علاجي كل مرضى الكانسر اللي زيي واتعرفت عليهم وكانوا متجوزين أول ما عرفوا بمرضهم اتطلقوا كلهم بلا استثناء ف بقول الحمد لله يمكن كنت هتوجع أكتر لو كنت متجوزه وانطلقت علشان مرضي ع الأقل دلوقتي بترفض من ع الباب من قبل ما أتعلق بحد وأبني أحلامي معاه

Tofu_19483 🇪🇬 · Answer

للأسف احنا ف زمن مليان بنفوس مريضه وغير سويه بجد وللأسف نادر جدًا ف زمننا ده لو لقيت حد قلبه نقي نادر جدًا

Apple_65355 🇪🇬 · Answer

دعوتك دي قشعرة جسمي وخلت شعر جسمي يقف وعنيا دمعت قسما بالله ...😭🥹🤍
يارب اللهم امين ولكي بالمثل اضعاف مضاعفه ربنا يجبر بخاطرك ويسعدك دنيا واخره ويحقق لك كل احلامك ويعوضك خير عن كل حاجه وحشه مريتي بيها .. اجمدي واقوي واوعي تضعفي او تيأسي ربنا ارحم بينا من اهلنا وعمره ما هيسيبنا مهما عملنا ❤️ وسيبك من كلام الناس وافعالهم ونظراتهم محدش يستاهل  لنا ولهم  رب يحاسبهم ويارب تشوفي حساب كل واحد قدام عينك 🤲

Apple_65355 🇪🇬 · Answer

اقسملك بالله انا لو في وحده راضيه بيا وعندها مشكله او اعاقه مهما كان اي هي انا هتقدم لها .. ومعنديش مشكله ف اي حاجه .. بس علشان اكون صريح مع نفسي قبل ما اكون صريح معاكي .. لو مشكله ظاهره وواضحه وملفته ممكن مقبلش مش اعتراض علي مرضها بس لان المشكله العندي ظاهره فمش حابب يبقي احنا الاتنين مشكلتنا ظاهره هي دي الفكره بس لكن لو علي الرضا بالنصيب والقضاء والقدر ف انا راضي بالانا فيه ومقتنع مليون ف الميه

Apple_65355 🇪🇬 · Answer

ورفضي لها هيكون بدون اي تجريح .. عادي مفيش قبول او مش مرتاح فقط لا غير لكن لا هجيب سيرة شكل او مشكله عندها واقول انا رافضها للسبب ده لان زي ما انا محبش حد يجرحني بكلمه برضوا محبش اجرح حد واكسره بكلمه او حتي بنظره لكن للاسف الناس اليومين دول بتجرح وببجاحه وكأنه عادي وطبيعي واحنا الناقصين وعندنا مشكله وهم ال ١٠٠% سلام وكويسين الله المستعان 😔

Tofu_19483 🇪🇬 · Answer

الله يرزقك ويريح بالك وقلبك يارب والحمد لله إن الدنيا فانيه..ترا أنا عن نفسي بقى عندي قناعه إني مستحقش أي حاجه قليله وإني جميله أيًا كان اللي حاصل معايا وإني أستاهل أتحب علشان أنا إنسانه ولو ملقيتش ده ف هعيش لوحدي وهفضل أحب نفسي وأهاديها وأفرحها ومش هستنى الحب من بره وبدأت من دلوقتي أجيب لنفسي هدايا وأقول لنفسي إني جميله وأشتري لنفسي ورد،مش مستنيه حد يعملي كل ده أنا هحب نفسي ولو جه اللي يحبني خير

Tofu_19483 🇪🇬 · Answer

لو مجاش اللي يحبني ف أنا بحب نفسي وهفضل أدعمها ومش هتجوز حد ميحبنيش ويقلل مني حتى لو مش هتجوز خالص..أعيش ف راحة البال وحيده ولا أعيش طول حياتي تعيسه مع حد

Apple_65355 🇪🇬 · Answer

يارب اللهم امين وياكي ..  ربنا يرزقك الزوج الصالح اليصونك ويحافظ عليكي ويهنيكي ويسعدك ويعوضك خير عن كل الم ووجع وحزن ودمعه نزلت من عنك ويبدل كل ده بفرحه وسعاده ويحقق لك كل التتمنيه ويكون سندك وضهرك وامانك وراحتك وحضنك وسعادتك 🤍🤍🤍

Cherry_44067 🇪🇬 · Answer

اللى أنا واثقة بيه أن كل الناس ربنا مبتليهم بحاجة ممكن حد شايفينه أنه كامل ولكن مليون فالمية عنده ابتلاء .
و كمان لصاحب البوست والله ربنا هيكرمك لأنك راضي مش صاخط على قضاء الله .

Apple_65355 🇪🇬 · Answer

كلامك صح 100% ... والحمد لله ربنا يديمها نعمه بس 🤍

Cherry_44067 🇪🇬 · Answer

والله حبيتك اوي نفسي تكوني صاحبتي بحبك ف الله

Avocado_63956 🇪🇬 · Answer

انا اسف بس ممكن نتواصل نزلي اي بوست عشان اعرف اتكلم معاكي

Apple_52659 🇪🇬 · Answer

والله احنا المفروض نتعلم منك الثبات والصدق والعقلية الجميلة 
اللي ربنا رزقك بيها 
روح ربنا يبارك فيك وتسلم من شرور الدنيا