هل خطيبي ممكن يعترض لو فرشت شقتي قبل الجواز؟

Question

هو سؤال جه علي بالي 
انا الحمدلله عندي شقتي وكدا وكنت عايز اوضبها واحدة واحدة علشان في ظل الاسعار دي الحاجة عمالة بتغلي 
فهل لو وضبتها وفرشتها قبل ما اتجوز (مافيش واحدة في حياتي) الشخص دا ممكن يعترض علشان هو ماخترش العفش ، انا عارف انه سؤال تافه شوية 😂 بس علشان اتجنب مشاكل قدام

Cookies_37971 🇪🇬 · Accepted Answer

انت ممكن تعمل الحاجات الأساسية بس يعني تدهن الشقه و الابواب وتبقي الشقه جاهزه علي العفش و الاثاث بس هيبقي افضل
وممكن لو معاك فلوس تشتري دهب وتشيله ولما ربنا يرزقك ببنت الحلال تبيعه وتجيبو العفش سوا

Popcorn_37087 🇪🇬 · Answer

اه صدقني بتفرق جامد

Donut_36691 🇪🇬 · Answer

انا شايفة انه عادي يعني نمشي الدنيا انت اكيد هتختار حاجة حلوة لبيتك مش هتستخسر او هتجيب اي كلام زائد انه بعد كده ان شاء الله واحدة واحدة مستقبلا ربنا يكرمكم و تظبطوا الدنيا مع بعض بدماغكم في ظل الظروف دي اللي يلحق يعمل حاجة قبل ما الدنيا تغلا تاني يبقي بيفهم

Apple_37633 🇪🇬 · Answer

انا اشتريت الشقه والعفش والدهب قبل ما اتقدم لأى حد واللى كان هيعترض كنت هشوف غيره

Strawberry_38076 🇪🇬 · Answer

هو على حسب البنت وزوقها  ممكن واحده توافق و ميفرقش معاها  واحده تانيه  تقول لا أنا لازم أختار كل تفصيله في بيتي
فانت خليك في المضمون و اصبر لحد ما تلاقي بنت الحلال و لو خايف على الفلوس تضيع جمدها في دهب الدهب مبيخسرش

Banana_29935 🇪🇬 · Answer

انا كنت بشتري الأجهزة الكهربائية لأن دي غالبا الحاجة اللي البنت مش هتعترض عليها، و بفلوس الباقي ممكن تجيب بيه دهب عشان تحفظ قيمته

Coffee_27700 🇪🇬 · Answer

هي فيه بنات تفرق معاها وبنات لأ.
بالنسبالي أنا عملت كل حاجة بدون الفرش (الأثاث والأجهزة الكهربائية) وجبت مهندس ديكور كويس علشان تطلع الدنيا حلوة. فممكن تعمل كده ولو اعترضت شوف غيرها بقى 🥲
وهات الشبكة برده كسبايك دهب أو جنيهات

Sugar_29587 🇪🇬 · Answer

الشقه من حق الزوجه

Hazelnut_38502 🇪🇬 · Answer

ايوه في بنات كتير بيبقا نفسها انها تجيب العفش وتفرش الشقه بتاعتها على ذوقها

Sugar_29442 🇪🇬 · Answer

انا ك بنت اعترض انا عايزة اختار كل تفصيلة ف بيتي بس العرف عندنا ف البلد ان العروسة عليها فرش الشقة والاجهزة الكهربائية و العريس عليه الاساس و دهب الشبكة والحاجات دي بس عامة لو الشخص كويس والشقة طلعت كويسة ونفس الذوق ف مش هيبقى فيه مشاكل بس اتجنبها واحفظ فلوسك بطريقة احسن ( انا جبت الاجهزة و ادوات المطبخ والحاجات دي عشان برضو الحاجه بتغلى)لو حطيت نفسي مكان عروستك ف لو ذوقك نفس ذوقي معنديش مشكله

Coconut_35671 🇪🇬 · Answer

شايفه انك تعمل الحاجات اللي هتقدر عليها دلوقتي بس متجهزش كل حاجه في الشقه عشان لما بنت الحلال تيجي يبقي اسمها نقيتو حاجات من الشقه مع بعض ف ممكن دلوقتي مثلا تدهن الشقه و الحاجات اللى زي كده(بصراحه معرفش بيتجهز ايه تاني في الشقه بس بقول رأيي😂)