الأولى كانت مجرد تعلق، كنت فاكرها حب، ودفعت كل مشاعري فيها لحد ما اكتشفت إنها سراب. التانية جات من غير ما أتوقع، عرفتني في أيام قليلة يعني إيه إن حد يحبك بجد، بس أنا اللي بعدتها بإيدي، يمكن من خوف، يمكن من تهور، يمكن من غباء… مش عارف. كل اللي متأكد منه إني جرحتها وهي كانت بتدور على أمان، وأنا كنت تايه بدور على اللي مش ليّ. من ساعتها وأنا حاسس إني كسرت حاجة جوايا وجواها. بقيت أقف قدام نفسي وأقول: هو أنا استاهل حب تاني أصلاً؟ ولا خلاص؟ بقيت أخاف أدي ثقة، وأخاف أستقبل حب. بقيت مشوش بين اللي فاتني وبين اللي جاي. النهاردة بقولها بوضوح: الدور جاي على التالتة اللي هتدخل حياتي. بس المرة دي مش هكون نفس الشخص، هكون وحش كاسر، مش عندي طاقة أتعاطف، ولا قلب أدي أمان. مش علشان أنا قاسي، بالعكس، يمكن لأني اتكسرت زيادة عن اللزوم. الحب اللي كان بيخليني أضعف بقى بيخليني أخاف. أنا عارف إن دي مش عدالة، ولا ذنبها، بس للأسف ده اللي أنا بقيت عليه. لو قابلتني التالتة، هتشوفني نسخة تانية من نفسي، نسخة مفيهاش الحنية اللي راحت مع الأولى والتانية… والذنب مش ذنبها، الذنب ذنبي أنا.

3

0