هاي عملت pajama party مع بنات عيله ماما بعد ما ادركت اني مش عارفه اتعامل مع بنات عمتى وصح علشان الموضوع يكون أوضح انا عندي عمتين واحده ولادها شباب والتانيه ولادها بنات بس وبالمناسبة انا كنت فاكره ان بجد انا بعمل كل حاجه ومش بلاقي مقابل بسيط للحب والاهتمام ده بالعكس انا اللي كنت بتصل على بنات عمتى وكمان مكنتش بصاحب حد مش قريبي بالدم علشان العيله هي اللي هتبقى في الأخر بس اللي حصل اني مكنتش فاهمه ليه هما بيعرفوا يتكلموا مع ناس تانيه ويتعاملوا وعندهم صحاب وحياه واني مش الشخص المهم في حياتهم امممم عارفه اني دراما اوييي بس ده اللي كنت بفكر فيه دايما وانا معاهم لحد ما زهقت من التجاهل والاهتمام والحب زهقت وبقى الموضوع مرهق وكأن في دماغك الف سؤال وكلهم بيبدأوا "ليه" وعليهم جيتار لاغنيه يومين وليله بتاعت جدل وشويه ريلز حزينه فااا اللي عملته والحل اللي لقيته كان الهروب هربت لاقرب ناس تانيه وعلشان انا ميته على مقوله العيله هي اللي هتبقى في الاخر روحت لبنات خالتي وخالي رقم واحد وخالي رقم اتنين وخالي رقم ٣ وخالي رقم اربعه معندهوش بنات المهم نرجع لموضوعنا قررت اني أقرب من ناش تانيه واتعامل معاهم واهزر واضحك وقررت اني اعمل pajama party عند بيت تيتا علشان نحسن العلاقات شويه ونقربها بس اللي حصل اني ادركت للحظه اني بهرب من كل حاجه واني عندي مشكله واني مش بعرف اتعامل مع الناس وبكره قرب الناس مني علشان بحس انهن هيشوف الجانب المثير للشفقه فيا ده عارفين اللي هو الجانب الضعيف والاهبل ده علشان كده مكنتش بصاحب حد واستغليت فكره بنات خالتي بالعكس كمان بقيت بضغط عليهم بالاهتمام الزياده والدراما الاوفر اني ابقى الشخص المهم والاوحد فااا لجأوا الوحش حاجه وهي اللي زودت جوايا مشاعر العدوانيه اتجاه الناس وهو "التجاهل" فااا لقيت حل احسن وهو الهروب كالعاده من مشاعري واللي لحد دلوقتي انا تايه فيها وبحاول ادور عليها او لأ الصراحه انا بهرب منها ا بكره التفكير في ليه وازاي ومش معنى والهم ده بحس كله بيتحل بواحد آيس كريم وشويه هواء في البلكونه بس حقيقي الموضوع بقى مرهق وانا خايفه أواجه كل مشاعري او بمعنى اوضح وادق خايفه أواجه اكتر حد بكره في الدنيا وهو نفسي وبالنسبه للكتابه دي فاا دي اعتراف لنفسي اني حد جبان نسبيا واني فاشله اجتماعيا وبس كده باي

2

10