عايزة افضفض واتمنى تنصحوني اعمل اي او تقولولي رأيكو عشان انا مش عارفه احدد مشاعري...... ومعلش مقدماً اني هطول عليكو....... انا حالياً عندي 19 من حوالي 4 سنين كنت معجبه بشخص هو اكبر مني بـ 7 سنين انا مكنتش اعرف سنه في الوقت ده المهم يعني كان تعاملي معاه شبه رسمي أصلاً، هو فاتح محل ميك أب فانا كنت بروح اشتري مكياج او منكير فكان كل فين وفين، وفي الاول كان عادي، بعدها بنت عمه اتجوزت ابن خالتي فهو كل ما اروح يسألني عامله اي ويسألني عن بنت عمه وبتشوفيها ولا لاء وكده، بعد كده لما كنت بروح كنت بحسه بيركز اوي معايا ومع انه كان جايب بنت تشتغل في المحل كان بيدخل يديني هو لما يكون واقف بر ولما اروح ويجي زباين بعدي كان بيسبني للأخر او يقولي خليكي في الاخر احسن علشان اعرف اركز معاكي وانا بدأت انجذبله بس انا كنت عارفه ان دا مجرد إعجاب مراهقه لا أكثر، وبدأت اخد اي حد معايا عشان ما اركزش معاه ولا انشغل عنه لما يكون قدامي فكنت باخد بنت عمي بما انها من سني وعارفه معظم الاوقات اللي بتكون فاضيه فيها، المهم بعد فتره بقيت باخد بالي انه بقى يركز مع بنت عمي اكتر ولو انا اللي بكلمه بلقيه باصص على بنت عليها مع اني اللي بكلمه، فكنت بضايق وبزعل،بس مكنتش ببين حاجه (لان مليش حق أصلاً) وفضلت اخدها برضو، وساعات كنت بروح مع اني مش عايزة حاجة المهم اشوفه بس واتحجج بأي حاجه، والدراسه بدأت وشغلتني عنه وفكرت الاعجاب بدأ يقل، بس كان كل ما أشوفه قلبي يدق جامد اوي، وكنت بعنف نسي واقول ان دا مجرد إعجاب وهيروح، ودعيت ربنا ان لو هو مش من نصيبي يطلعه من قلبي وابطل تفكير فيه، سبحان الله في نفس اليوم حلمت بكابوس بيه وحاجه خوفتني وخلتني انفر منه فتره، بس للاسف المشاعر لسا موجوده، ومن سنتين بطلت اروح المحل الا نادراً ومبقيتش احس زي الاول والحمد لله اعجابي قل(بس برضو لسا في مشاعر) ولما اكون معديه من قدامه ساعات بلاقيه باصص عليا ولو واقفه في مكان هو فيه بحس انه مركز او ان في حد باصص عليا برضو ، وامبارح كنا في خطوبه ابن خالتي وهو راح بس انا مشفتوش عرفت بعدين انه راح بس شفت مامته واخته، واخته تبقى صاحبه اختي من الطفوله وانا مصحباها، المهم لما الخطوبه خلصت وروحنا لقيت ابن خالتي بيقول انه كان موجود وكان بيدور على عروسه وشاف واحده وشكلها عجبته وخالتي قالت ان مامته كانت كل ماتشوف بنت تسألها هي بنت مين وكده، وانا زعلت شويه بس عادي لاني عافه انه مش ليا وهو مجرد اعجاب من طرف واحد، وبعدها بشويه قعت مع اخته (احنا جيران في نفس الشارع وهي اصغر مني بـ.4 سنين) وسئلتها انتو لقيتو العروسه ولا لسا قالتلي معرفش والله، فقولتلها اللي ابن خالتي قاله قالتلي أخيراً العقده اللي عنده هتتفك (كانت قيلالي انه متعقد و مش عايز يتجوز ومفيش بنت عجباه) وقالتلي ابقى قولي لإبن خالتك يبعتلنا الفوتوسيشن عشان نشوف هي انهي بنت وانا هزرت معاها وعادي، وحالياً العروسه منزله صوره ليها هي وصحابها على الواتس فكنت بفكر اخد اسكرين للصوره وابعتها لأخته ويشوفو هي لو بنت منهم، وفي نفس الوقت متردده وبقول الموضوع ميخصنيش، وعلى فكره انا مسلمة من زمان ان هو مش ليا وحتى لو جه وخطبني انا هرفضه ولو انا مرفضتش اهلي هيرفضو، لانه معروف عنه من زمان انه بتاع بنات ومش سالك (الشكله الكبره اني عارفه كده من قبل ما اعجب بيه، واعجبت بيه برضو 😂) فكنت عايزة نصيحه ابعت الصور ولا لاء، واتخلص من المشاعراللي باقيه دي ازاي ....؟؟؟ وأسفه اوي لو اتكلمت كتير وقولت تفاصيل ملهاش لازمه

4

13