مشكلتي إني... معنديش مشكلة. آه، بالظبط كده. مش بهزر. معنديش مشكلة إني اتصدمت في واحدة كنت بحبها من قلبي، حب من طرف واحد، وفضلت أحاول أقرب منها بكل الطرق، وأثبتلها إني جاد ونفسي نكون في علاقة حقيقية. بس هي رفضتني، ببرود، من غير حتى ما تديّني فرصة. ومعنديش مشكلة إن الصدمة دي كانت أكبر من طاقتي، ومع ذلك كتمت، وسكت، وكملت. معنديش مشكلة إن شعري وقع وأنا لسه عندي 22 سنة، وفقدت جزء من مظهري اللي كنت بحبه، اللي كنت حاسس إنه بيديني ثقة وشكل مميز... وراح. بس عادي، ماعنديش مشكلة. معنديش مشكلة إني بصحى كل يوم على شغل مبحبوش، فاقد الشغف تمامًا، منهار من جوا، بس بكمل عشان الدنيا ما تقعش أكتر ما هي واقعة. عشان لازم أكون بطل، لازم "أتحمل"، حتى لو أنا مش قادر. معنديش مشكلة إني بقيت أشك في كل الناس، حتى الطيبين، حتى اللي بيحبوني. أنا اللي ببعد، مش هم. يمكن لأني استهلكت كل طاقتي، وكل ثقتي، وكل قلبي... خلاص. معنديش مشكلة إني بقيت شبه فاضي من جوا، ضايع، والناس شايفاني مقصر، بيقولولي فوق، شد حيلك، كفاية بقى. بيقولولي لازم تفضل سوبر مان، وجريندايزر، وكل الأبطال اللي في خيالهم. بس محدش سأل: هو أنا لسه موجود أصلاً؟ ولا بقيت مجرد قشرة بتمشي وتضحك و"تمام الحمد لله"

0

0