أنا بنت عندي 17 سنة، ومن وأنا صغيرة وأنا بعاني من عادة مص الإصبع، وهي مشكلة نفسية محرجة مفيش حد غير أهلي وبعض أقاربي يعرفوها. دي عادة منتشرة عند الأطفال، لكن لما بتستمر بعد البلوغ بتبقى مشكلة نفسية، وقرأت إن حوالي 3% من الناس بس عندهم المشكلة دي، وده رقم مخيف. سبب العادة دي كان قلة اهتمام أهلي بيا وأنا صغيرة، بسبب شغل أمي وتركها لي في الحضانة والمشكلة كبرت معايا. أهلي حاولوا بكل الطرق إني أبطلها، اتعرضت للضرب بكل الأشكال، سواء بالحزام أو بالنار دا غير العقاب النفسي لكن مفيش فايدة. العادة دي بتسبب مشاكل في الأسنان ورحت لدكاترة أسنان كتير، ولما كنت في الإعدادي، في دكتور اسنان نصحني أروح لدكتور نفسي، لكن أهلي ما جربوش الفكرة خالص. كان فيه جهاز بيحطوه في البوق عشان يمنع العادة، لكن أهلي استسهلوا وماجابهوش برضو عشان كان غالي جدًا وانا طول الوقت من جوايا بحط اللوم على اهلي وهما السبب في دا. وبصراحة الموضوع دا بيخليني أحس براحة كبيرة ودايمًا بحب أقعد لوحدي علشان محدش يشوفني وبقيت انسانه منعزلة شوية وبحب قعدة البيت جدًا ومبخرجش كتير والموضوع دا عمل رهاب اجتماعي وضعف في التواصل مع الناس. وانا يئست خالص وبقيت مقتنعة انها هتفضل معايا طول حياتي. تنصحوني اعمل ايه هل اروح لدكتور نفسي؟ وانا كمان بقالي فترة بفكر لو اتجوزت وانا عندي العادة دي هل في راجل ممكن يتقبل موضوع زي دا؟ وهل ممكن الاقي حد تاني عنده نفس المشكلة؟ آسفة لو طولت عليكم.

8

10