عندي مشكله في البيت للاسف انا اخ واحد علي ٣ بنات وانا اكبر واحد ... وعندي ٣٠ سنه ومش مرتبط لسه ولا متجوز المشكله اولا مع اخواتي البنات .. علاقتي بيهم مش زي ما بشوف مثلا ناس حقيقيه اعرفهم فرحانين باخوهم بيحبوه شايفين انه سند وظهر وامان لهم وبيعملو له كل حاجه وبيفرحوه وهو بالنسبه لهم كل حاجه .. للاسف العلاقه عاديه جدا واقل من عاديه بيني وبينهم مش عارف الغلط والتقصير مني ولا منهم ...يعني هم مع بعض بيقعدو يتكلمو ويضحكو ويهزروا معايا انا لا .. بيشترو حجات تسالي وبيجيبو لي .. انا قليل لما بجيب وده مش كره بس لان مش بقدر اجيب ديما لان مصروفي اعلي من مصروفهم .. فبصرف من فلوس شغلي ومش بحب اني اضغط نفسي او اجي مثلا ف يوم فلوسي تخلص واقول عايز فلوس من ابويا مع ان لو طلبت هيديني مش هيتاخر بس انا مش بحب كده ... كلامي معاهم قليل جدا وحتي رغم ان هو قليل يوم ما بنتكلم ف موضوع يخصني كلامهم بعترض عليه وبقول وجهة نظري ومش بيعجبهم وبيقلب بخناق او بسيب البيت وانزل والموضوع ده تعبني .. المفروض اختي لما اكون مخنوق تسمعني تاخدني ف حضنها تريحني .. انا مش لاقي ده ومش بحب اطلب ده من اي حد خالص لان انا شايف ان دي حجات بتتحس مش بتنطلب واذا القدامك مش حاسسها ومش هيعملها من تلقاء نفسه يبقي ملهاش لزمه ولا لها معني ... اتكلم عن علاقتي بوالدتي ووالدي ... علاقتي بوالدي تكاد تكون معدومه اصلا مش بنتكلم الا لو هو عايز حاجه مني او انا عايز حاجه منه وبس وبرضوا ممكن يحصل خناق ومشاكل ... علاقتي بوالدتي كانت كويسه لحد ما دخلت اولي ثانوي كانت عارفه كل حاجه عني مفيش حاجه متعرفهاش ... دلوقتي للاسف لا انا بعدت وبعدت لاتي شايف نفسي كبرت مش كبرت عليها لا بس مينفعش ابقي قاعد مثلا ف الشغل واحكي تفاصيل صغيره زي مثلا هزار وضحك بين شباب بالفاظ ملهاش لزمه او اي موقف محرج او خارج مينفعش ولدتي انها تعرفه اكيد انتو فاهمين قصدي خصوصا الشباب بحكي عن البيحصل ف الشغل ف المجمل بدون تفاصيل ومش بيعجبها برضوا بتبقي عايزه تعرف تفاصيل اكتر .. برضوا والدتي زعلانه ان موبايلي او حاجتي الشخصيه مش متاح ان حد يمسكها ويستخدمها لاي سبب من الاسباب وهي عندها عادي تمسك تليفوني وتفتش فيه صور رسايل اي ابلكيشن تسأل اي ده وليه ولازم ارد .. طبعا الكلام ده كان بيحصل لغاية اولي ثانوي ومن بعدها وانا قفلت الموضوع ده وهي زعلانه لان اي بنت من البنات لو طلبت موبايلها بتاخده وبراحتها بيمشو ويسيبوه مش بيقفو فوق راسها ... عمتي عندها اولاد ومش بتعمل مع اولادها كده وبتحترم خصوصيتهم ووالدتي شايفه اني بطبق ده وعايز يبقي ليا خصوصيتي وهي شايفه ان مفيش خصوصيه بين ام وابنها ... اوضتي مثلا ممنوع ابقي قاعد وموارب الباب او قافل علي نفسي بمفتاح او حتي من غير مفتاح .. انت بتعمل اي وقافل علي نفسك ليه .. !! .. بقعد لوحدي كتير وببقي حابب ابقي منعزل هو طبعي كده يمكن معاهم بس ويمكن ده بسبب مواقف كتير ومعامله وردود وكلام كتير حصل خلاني اتجنب التعامل .. هم برضوا مضايقين من ده خصوصا والدتي ... والدتي بتقف ف صفي ف حجات كتير وبتدافع عني ف حجات كتير سواء بيني وبين اخواتي او بيني وبين والدي .. جات عليا فتره كنت مسافر بره مصر كانو اخواتي قليل اوي لما يكلموني كنت بكلم والدتي كل يوم واحكيلها اه بنتخانق ونزعق وممكن يوم يومين منتكلمش بس كنا بنتكلم لكن اخواتي لا ولما اعاتبهم يقولو ما احنا بنعرف اخبارك من ماما .. علما بان اخواتي الاتنين شغالين مش قاعدين ف البيت والثالثه قاعده لانها في كليه مش شغاله .. وانا بالنسبه ليا لما ببقي شغال بحس نفسي احسن نفسيا وجسديا غير لما ابقي قاعد من غير شغل بتخنق ونفسيتي بتبقي مش احسن حاجه لان بشوف البنات نازلين شغلهم وال نازله كليتها وانا الراجل والكبير قاعد في البيت فبهرب من كل ده بالنوم يا بالنزول كل يوم عل قهوه واروح وهكذا .. ولما بتكلم معاهم بنشد من اقل حاجه وانا نفسي بحس نفسي عصبي اوي مع العلم لو نفس الموقف ده حصل مع حد غريب ممكن ميبقاش نفس رد الفعل ده بحس اني مش طايقهم او مش حاببهم كلهم في البيت .. حاجه مهمه اوي لازم اوضحها .. انا اتولدت عندي مشكله معينه في شكلي ( انا بحس انهم مش متقبلينها مش انهم بيتعاطفوا معايا لا مش متقبلينها اصلا وعلشان كده بيتجنبوني ) مش عارف اعمل اي وعايز ابقي كويس معاهم لاني كويس مع الغريب بس مش قادر ووالدتي بتقولي طول ما انت كده مش هقدر اجوزك واخليك تاخد بنت ناس لان زي ما انت كده معانا انت هتكون كده معاها واسواء بس انا شايف انو لا لان انا هبقي حاببها هكلمها ف عيوبها مثلا براحه وبهداوه ومش هرتبط بوحده انا مش قابل عيوبها اصلا .. (طب انتو اهلي انا لا اقدر اغيركم ولا اقدر اواجهكم بالمش عاجبني لان مش هتفهم صح انا متاكد ) ... تعبت ومش عارف اعمل اي ولا اتصرف معاهم ازاي واقصي حاجه بعملها هي اني اقعد لوحدي بعيد عنهم تجنبا لكل القصه دي .. لدرجة اني حاسس لو جرا لي حاجه هيقولو احسن ارتاح وريحنا (اخواتي) مش امي وابويا ... امي وابويا هيزعلوا وهيتقهروا انا عارف ده .. حد حيقولي اخصائي نفسي يدمل بينكم ويحاول يحل للاسف ده حصل وحصل تغير بس مش تغير دايم ولا التغير الهو انا عايزه ووالدتي كانت بتعترض انا بدفع لك كل شهر ٨٠٠ جنيه جلسات ومش شايفه اي استفاده منها فبطلته علما باني قعدت من ٨ شهور معاه ووقفته بعد الكلام ده

3

10